SEA2LAND proiektuak ongarri jasangarriak ekoizten ditu arrain-lehengaietatik abiatuta
Elikagaiak ekoiztea, klima-aldaketa eta hondakinak berrerabiltzea erronka ederra dira. SEA2LAND proiektu europarrak desafio horri aurre egin dio, teknologiak hobetuz eta egokituz, oinarri biologikoko ongarriak (BBF) ekoizteko mantenugaiak berreskuratzeko helburuarekin, arraina eta akuikulturako azpiproduktuak prozesatuz. Neiker Nekazaritza Ikerketa, Berrikuntza eta Garapenerako Euskal Erakundea izan da proiektuaren koordinatzailea.
SEA2LAND proiektuak bederatzi teknologia inplementatu ditu zazpi kasutan arrantza-sektoreko sei eremu adierazgarritan, Ipar itsasoan, Baltikoan, Atlantikoan, Kantauri itsasoan, Mediterraneoan eta Itsaso Adriatikoan. Azti itsas eta elikadura ikerketa zentroak eta Barna animalia-pentsuetarako osagaiak egiteko arrain-azpiproduktuen tratamenduan espezializatutako enpresak egin dute pilotua Kantauri itsasoan.
Kantauriko pilotuak arrain-azpiproduktuen mantenugaiak berreskuratu ditu prozesu bioteknologikoen bidez, bioongarri berriak sortzeko lehengai izan diren osagaiak lortzeko. Helburua lortzeko, Aztik eta Barnak hidrolisi entzimatikoa edo arrain-azpiproduktuen autolisia bezalako teknologiak erabili dituzte.
SEA2LAND partzuergoa 11 herrialde desberdinetako 26 kidek osatu dute: Europar Batasuneko bederatzi estatu kidek (Espainia, Norvegia, Estonia, Belgika, Italia, Portugal, Frantzia, Malta eta Kroazia) eta Europar Batasunetik kanpoko bi herrialdek (Suitza eta Txile). Parte hartzen duten erakundeak askotarikoak dira: ikerketa-erakundeak; arrantza-, nekazaritza-, ongarri- edo teknologia-industria; kudeaketa eta hedapena; negozio-planen garapena; eta nekazarien ordezkaritza.
Europako proiektua 2021ean hasi zen, eta lau urteko lanaren ondoren, ‘Ongarrien aurrerapena: nekazaritza jasangarrirako irtenbideak’ izeneko azken ekitaldiarekin amaitu da. Ekitaldia ekainaren 5ean egin zen, Bruselan, Europar Batasuneko Aste Berdean. Bertan, Aztiko eta Neikerreko ordezkariek ‘Ongarri zirkularrak ekoizteko teknologiak’ izeneko hitzaldia eman zuten.
SEA2LAND proiektua Europar Batasunak finantzatu du Horizonte 2020 programaren esparruan; 8,8 milioi eurotik gorako laguntza jaso du.
SPRI Taldea RIS 3 Euskadi estrategia abian jartzen duen eragileetako bat da, energiaren, fabrikazio aurreratuaren, bio-osasunaren eta nanozientziaren arloetan espezializazio adimenduna bultzatzeko.
