Mausa, fabrikazio aurreratuaren bidez industriarako soluzioak eraldatu dituen familiako ETEa
Mausa Oiartzungo familiako ETEa da eta industriako fabrikazio aditiboan dago espezializatuta duela bederatzi urtetatik. Espainiako inprimatzeko makina hibrido (mekanizatua eta 3D) bakarra du. Etengabeko berrikuntza da enpresaren bereizgarria. Online eskaintzen plataforma bat sortu berri du bere webgunean, eta bezeroek segundo gutxian egin dezakete produktuaren eskaera bertatik. SPRI Taldearen laguntza ekonomikoa jaso du BDIH Konexio programaren bidez. Programa horren baitan, Basque Digital Innovation Hubek ETE-en esku jartzen du fabrikazio aurreratuko aktiboen eta zerbitzuen sare konektatua, prestakuntzarako, ikerketarako, testatzeko eta baliozkotzeko.
Familiako enpresa 1974an sortu zen Oiartzunen, egungo kudeatzaileen aitaren ekimenez. “Nire aita Emilio Garcia da, ingeniaria, eta oso gogoko zituen moldeak. Mekanizazioarekin eta fresaketa tradizionalarekin hasi zen”, aipatu du Amalia Garcia Office Managerrak. Carla Prada Marketineko arduradunarekin batera hartu du parte elkarrizketa honetan.
Hurrengo mugarri nagusia 1979an izan zen, zenbakizko kontrola zuen lehen makinarekin. Urtebete geroago, hari bidez ebakitzeko makinekin lan egiten zuen Gipuzkoako lehen enpresa bihurtu zen, eta 1982an plastikoa injektatzeko makinak sartu zituzten. “Mausan beti egin dugu teknologiaren alde”.
2017an, bigarren belaunaldia sartu zen enpresaren zuzendaritzan. “Diego anaia eta ni”, adierazi du Amalia Garciak. “Prototipoen garapena geldoa eta garestia zela ikus genuen eta 3D inprimagailuen alde egitea erabaki genuen, prozesuak azkartzeko eta gure bezeroei soluzio berritzaileak eskaintzeko”.
Mausak milaka produktu eskaintzen ditu, hala nola elektrolinerentzako euskarriak, ebaketa-likidoen ahoak, oinetakoen zolak, roboten karkasak, protesien estaldurak, ibilgailuen motorren kolektoreak, gailuentzako euskarriak edo itsasontzietako saretak. “Plastikozko edozein pieza fabrikatzen dugu 3D teknikarekin, bezero bakoitzaren beharretara egokituz eta diseinua optimizatuz, funtzionalitatea eta errendimendua hobetuz”. Askotariko bezeroak ditu: robotikaren, automobilgintzaren, medikuntzaren edo itsasontzien sektoreak.
2022an, inprimatzeko makina hibridoa integratu zuen, Matsuuraren Lumex Avance-25, eta 3Dan inprimatu eta mekanizatu egiten du aldi berean. “Espainiako bakarra da”. Gainera, online eskaintza-plataforma bat gehitu dute webgunean, bezeroek produktuaren eskaintza eskuragarri izateko segundo gutxian. “Prezioaren gaineko orientazioa eskain diezaiokezu bezeroari uneoro. Eta webgunean bertan eros dezakete edo gurekin harremanetan jar daitezke”.
19 langile daude Mausaren plantillan eta iaz urtean 2,2 milioi euroko fakturazioa izan zuen. Hortaz, % 120 handitu du fakturazioa 2017tik, 3D teknologia integratu aurretik. Orduan zuten langileen kopurua ere ia hiru aldiz txikiagoa zen. I+G garrantzitsua da enpresarentzat eta berrikuntza-proiektu bat egiten dute urtero.
SPRI taldearen BDIH Konexio programaren dirulaguntza esmaltatze-lerroak garatzeko erabili dute, teknologia hibrido aurreratuen bitartez: “gure Lumex Matsuura makinaren fabrikazio hibridoaren teknologiari esker, mugikortasun elektrikora bideratutako produktua hobetzea espero dugu”.
2028ra bitarteko plan estrategikoan dituzte ezarrita etorkizuneko erronkak, bost ardatzetan: operazioak, pertsonak, merkatuen garapena, jasangarritasuna eta berrikuntza. “Sektorearentzako enpresa erreferentea izan nahi dugu gure izateko moduaren, berrikuntzaren, pertsonen zaintzaren eta jasangarritasunarekiko konpromisoaren bitartez. Sortzaileen tradizioarekin jarraitzea da asmoa”.
Mausak atzerrira zabaldu nahi du. “Puntualki saltzen dugu Indian, Egipton eta Italian. Baina Frantzian eta Mexikon jarriko dugu fokua. Eskari gero eta handiagoari erantzuteko eta gaitasunak handitzen jarraitzeko “egoitza handiagoa bat bilatu nahi dugu, gure egungo instalazioen espazioak mugatzen baikaitu”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
