Formesa, digitralizazioaren aldeko apustua egin duen forjaketako eta mekanizazioko enpresa
Formesa metal ez-ferrikoen forjaketan eta mekanizazioan espezializatutako Mungiako enpresa da. Digitalizazioaren eta I+G arloaren aldeko apustua egin du eta, azken urteotan, bere fakturazioaren % 1,5era iritsi da. Konpainiak SPRI Taldearen laguntza jaso du Industria digitala programatik. Programa horren bidez, informazioaren eta komunikazioaren teknologien bidez euskal enpresen eraldaketa digitala lortu nahi da.
1994an sortu zen, egungo zuzendaritza-taldeak Forjas de Lutxana, aurreko jabeak porrot egin ondoren konkurtsoan sartu zen enpresa, erosteko erabakia hartu zuenean. “Erosketa hartatik aurrera, gaur egun Formesa den industria-proiektuari ekin zitzaion, metal ez-ferrikoen forjaketa eta mekanizazioaren sektoreko jarduerari eutsiz”, aipatu du Aitor Lópezek, Formesako zuzendari komertzialak.
Enpresako arduradunak harro daude erosketaren ondoren garai bateko langile guztiak mantendu eta enpresa oso denbora gutxian berrindartzea lortu dutelako. “Hain zuzen ere, jardueraren lehen urtean aurreko jarduera maila berreskuratzea lortu genuen”.
Hala, enpresa bezero historikoen konfiantza berreskuratzen, bezero eta proiektu berriak sendotzen eta, ekitaldi bakoitzean, fakturazioa modu jarraituan handitzen joan da.
Formesa metal ez-ferrikoen forjaketan eta mekanizazioan espezializatuta dago: letoia, kobrea edo aluminioa, adibidez. “Industria arloko hainbat sektorerentzat lan egiten dugun arren, gure jarduera sektore elektrikora oso bideratuta dago eta, bertan, hainbat aplikaziotarako pieza eta osagai kritikoak fabrikatzen ditugu”.
Azken ekitaldietan, I+D proiektuetan egindako inbertsioek fakturazioaren % 1,5 inguru bildu dute. “Batez ere, produkzioa kontrolatzeko, produkzio-ekipoen mantentze-lanak egiteko eta kudeaketa-garapenak egiteko software-tresnetan aplikatu ditugu”
Enpresak, I+G arloko garapenak lantzeko garaian, taldearen zati bat proiektura bideratzen du, “hobetu beharreko arloak identifikatu eta garatu ahal izateko haien kualifikazio handia edo esperientzia eskain dezaten. Gainera, kasu gehienetan, kanpoko aholkularitzaren laguntza jasotzen dugu”. Hori dela eta, “gure digitalizazioan aurrera egitea ahalbidetuko diguten proiektuak lantzeak gure negozioa garatzeko oso tresna erabilgarriak ematen dizkigu”.
SPRI Taldearen Industria Digitala programatik jasotako laguntza hardwarea eta softwarea eguneratzera bideratu da, “gure azpiegitura teknologikoa indartuz”.
Teknologia berriei dagokienez, hurrengo urteotarako erronka eta helburuak dira hauek: sistemak modu jarraituan eguneratzea, etengabeko hobekuntzak bultzatzea, automatizazio berriak ezartzea eta ahalik eta arlo gehien maila altuan digitalizatzea. “Oro har, enpresari dagokionez, gure helburua da hazten jarraitzea, orain arte egin dugun moduan, eta ekitaldi honetako fakturazioa gainditzea”.
SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
