Emaia Health, emakumeen prebentzio kardiobaskularrerako plataforma digitala asmatu duen smart up-a
Emaia Health Donostiako start up bat da, urtebete baino gutxiagoko bizitza duena, eta emakumeen prebentzio kardiobaskularrerako plataforma digitala eskaintzen du. Produktua merkaturatu aurreko baliozkotze klinikoaren fasean dago. Bind 4.0 programan hartu du parte Keralty enpresa eragile gisa duela.
Enpresa Donostiako Miramon Parke Teknologikoan sortu zen iazko abuztuan, Maider Alonso eta Iván Macía sortzaileen interes pertsonalak eta profesionalak bultzatuta. “Haurdunaldiko konplikazioak, hala nola preeklampsia edo haurdunaldiko diabetesa, A ebidentzia-maila duten etorkizuneko gaixotasun kardiobaskularren iragarle goiztiarrak direla dioen ebidentzia zientifikotik sortu zen. Haurdunaldia eta emakumearen epe luzerako osasun kardiobaskularra lotzen dituen soluzio digitalik ez zegoela ikusita, talde sortzaileko kideok (industria farmazeutikotik eta ikerketa biomedikotik gentozen) artatu gabeko eta behar mediko frogatua duen espazioa identifikatu genuen”, azaldu du Maider Alonsok.
Emaia klinikoki balioztatutako eta adimen artifizialean oinarritutako plataforma digitala garatzen ari da, emakumearen prebentzio kardiobaskularrera bideratua. Prozesu horretan, konpainiak mugarri garrantzitsuak lortu ditu dagoeneko: lehenengo laguntza publikoak lortu ditu (Ekintzaile eta Txekintek, SPRIren eta Gipuzkoako Foru Aldundiaren eskutik hurrenez hurren), eta Vicomtechekin lankidetza teknologikoa formalizatu du bazkide eta partner teknologiko gisa.
“Gaur egun, aurrerapausoak ematen ari gara ingurune errealeko baliozkotzean, sektoreko partnerrekin batera, eta teknologia, ebidentzia klinikoa eta osasun digitaleko garapen-estrategia argia integratzen dituen soluzio berritzaile gisa kokatu gara”.
Vicomtechen BIND 4.0 programan hartu du parte Keralty (Kolonbian eta Latinoamerikan erreferentziazko aseguruen taldeetako bat) trakzio-enpresa gisa izanda. Kolaborazioa zailtasun obstetrikoak dituzten emakumeen datu klinikoei buruzko atzera begirako azterketa batean datza, “haurdunaldian eta erditu ondoren Emaiaren prebentzio pertsonalizatuko ereduaren premia medikoa eta bideragarritasuna baliozkotzeko helburuarekin”.
Ospitale eta kliniketara, aseguru-etxeetara eta lehen mailako arreta
Ospitale eta kliniketara, aseguru-etxeetara eta lehen mailako arretara bideratzen da enpresa, B2B ereduaren pean. “Produktu nagusia emakumeentzako prebentzio kardiobaskular pertsonalizatuko SaMD plataforma da, bi modulu dituena: bata pazienteari zuzendutakoa (laguntza klinikoa emateko aplikazioa ugalketa-zikloan zehar eta LLM morroi klinikoarekin), eta bestea osasun arloko profesionalei zuzendutakoa (biomarkatzaileetan oinarritutako arrisku-estratifikazioa duen CDSS, eta score kardiobaskular indibiduala profesionalarentzat)”.
Enpresak 6 langile ditu, talde sortzailearen eta kolaboratzaileen artean. Orain, merkaturatu aurreko baliozkotze klinikoaren fasean dago, baina 2026rako lehen diru-sarrerak I+G zerbitzuen bidez sortzea aurrez ikusi du, bere lankidetza aktiboen esparruan.
Baliabide ia guztiak I+Gko jardueretara bideratzen dituzte. “Oraindik ez dugu sail propio bereizirik; hori beharrean, Vicomtech enpresa teknologikoarekin (enpresaren sortzaileetako bat da) egindako aliantza estrategikoaren bidez egituratzen dugu I+G arloa”.
Ekintzaile programaren bidez SPRI Taldetik jasotako laguntza prototipo teknologikoa garatzera, merkatu-azterketa egitera eta negozio-plana prestatzera bideratu da. Horren bidez, “baliozkotze klinikorako eta egun martxan dugun pre-seed inbertsio-txanda egiteko oinarriak finkatu ditugu”.
Epe laburrera begirako erronkak dira maiatzerako “erditze ondoko moduluaren MVPa osatzea eta ebidentzia kliniko sendoarekin baliozkotzea. Ondoren, MDR I. motako autozertifikazioa lortzea eta 2027. urtearen hasieran merkaturatzea aurrez ikusi dugu, ospitaleekin eta aseguru-etxeekin lehen SaaS B2B kontratuak sinatuta”. 2028rako, haurdunaldirako eta menopausiarako moduluak sartu nahi dituzte, “emakumearen ugalketa-bizitza osorako irismena zabalduz”, eta nazioartekotzea bultzatu.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
