Lehendakariak goraipatu egin du euskal enpresek ‘Made In Euskadi’ produktuaren ospea bermatzeko egin duten ahalegina
Imanol Pradales Lehendakaria, Mikel Jauregi Industria, Trantsizio Energetiko eta Jasangarritasuneko sailburuarekin batera, BIEMH – Makina Erremintaren Nazioarteko Biurtekoaren 33. edizioaren inaugurazio ofizialean izan da. Fabrikazio aurreratuaren alorreko nazioarteko topaketa nagusietako bat da BIEMH.
Hitzaldian, Lehendakariak goraipatu egin du euskal enpresek nazioarteko merkatuetan ‘Made In Euskadi’ produktuaren ospea bermatzeko egin duten ahalegina, eta azpimarratu du Euskadik bere burua babestu behar duela etorkizunerako prestatzen den bitartean. Era berean, Pradalesek nabarmendu du euskal enpresek aukera handia dutela Europako berrindustrializazioaren berritasunekin aprobetxatzen badira, eta neurri sendoak eskatu ditu merkatua babesteko, burokratizazioa bultzatzeko, I+G+b indartzeko eta produkzio-ekipoak berritzeko.
Ildo horretan, Lehendakariak gogorarazi du Eusko Jaurlaritzak ‘Renove Smart Industry’ programa indartu duela, Euskadiko industria-sarearen modernizazio teknologikoa bizkortzeko. Arreta ETEetan jarrita, haien hazkundea, eskalatzea eta balio-kate estrategikoetan integratzea erraztuko da, eta Euskadin duten lurralde-errotzea sendotu. Fabrikazio Aurreraturako funtsezko teknologiak ditu ardatz programak, Industria Planaren sektore eragileetako bat: robotika, adimen artifiziala edo biki digitalak. Era berean, Pradalesek adierazi du Eusko Jaurlaritzak laster argitaratuko dituen hainbat deialditatik lehena dela hau, eta berrikuntza eta inbertsio produktiboak sustatzeko besteei gehituko zaiela.
Eusko Jaurlaritzak Industria Planaren bigarren Proiektu Eraldatzailea ere jarri du martxan, fabrikazio aurreratuari aplikatutako robotikarena. 50 milioi euro inbertituko dira eta 500 lanpostu berri sortu, Euskadiko industria- eta teknologia-sarea eraldatu eta prestatzeko, eta, hala, jarduera ekonomiko gehiago eta kalitatezko enplegua sortzeko.
BIEMH – Makina Erremintaren Nazioarteko Biurtekoak sektoreko nazioarteko azoken egutegiari emango dio hasiera, martxoaren 2tik 6ra, Bilbao Exhibition Centren. 34 herrialdetako 1.503 enpresa bilduko dira, eta 3.350 produktu berritzaile baino gehiago aurkeztuko dituzte. Ekimenak 33 edizio eta sei hamarkada baino gehiago beteko ditu eta, hala, makina-erremintako eta fabrikazio aurreratuko eragile nagusientzako erreferentzia globaleko ekitaldi gisa duen posizioari eutsiko dio. Eragile horiek abangoardiako teknologiaren, soluzio integralen eta lankidetza- eta negozio-aukera berrien bila joaten dira.
‘CARPE BIEMH’ izenburupean, edizio honek unea aprobetxatzera gonbidatzen ditu enpresak, bisitariak eta erakundeak, zuzeneko industria- eta teknologia-erakusleihoa eskaintzeko duten gaitasuna indartuta; industria aurreratuan eta ezagutza aplikatuan erreferentziazko Europako polo gisa sendotuko da Euskadi.
Inaugurazio ekitaldian Lehendakariarekin batera izan dira Mikel Jauregi, Industria, Trantsizio Energetiko eta Jasangarritasuneko sailburua eta BECeko presidentea; José Pérez Berdud, AFM Clusterreko presidentea; José Ignacio Ortiz de Urbina, AIMHEko presidentea; Jordi García Brustenga, Industriako Estatu idazkaria; Amaia del Campo, Barakaldoko alkatea; Ana Otadui, Bizkaiko Batzar Nagusietako presidentea; Unai Andueza, Ekonomia Sustapeneko eta Proiektu Estrategikoetako Foru Diputatua; Xabier Basáñez, BECeko zuzendari nagusia; eta Xabier Ortueta, AFM Clusterreko zuzendari nagusia, besteak beste.
Irekiera hitzaldien ondoren, segizioak inaugurazio bisita egin du, eta bertatik bertara ezagutu ditu azokan dauden sei pabiloietako stand garrantzitsuenetako batzuetan aurkeztutako berrikuntzak. Bere hitzaldian, José Pérez Berdudek, AFM Clusterreko presidenteak, industria sektorearen eta manufacturing aurreratuaren funtsezko zeregina defendatu du: «industria sortu zuen sektorea gara, eta haren gaitasunak eta eguneroko bilakaera ahalbidetzen ditugunak. Ez gehiago, ez gutxiago. Atzoko munduak, gaurkoak, eta inoiz baino gehiago etorkizun jasangarriaren munduak behar gaitu».
Halaber, Pérez Berdudek azpimarratu du nazioarteko garrantzia duen 33. BIEMH bezalako ekitaldi batek sektorearentzat duen garrantzia: «Estatuan egiten diren industria ekitaldi guztien artean nagusia da, tamainagatik, presentziagatik, balio-proposamenagatik eta, batez ere, eraginagatik. Manufacturing-aren jaia da, industriaren gala; produktibitatearen Oscar sariak gara». Inaugurazio-ekitaldiaren ondoren, lehendakariak sektoreko hainbat enpresa bisitatu ditu, bere
proiektuez eta berrikuntzez interesatuz.
2025ean, makina-erremintaren eta fabrikazio aurreratuko teknologien sektoreak 2.207,62 milioi euroko behin-behineko fakturazioa lortu zuen, eta horrek %4,99ko jaitsiera ekarri zuen 2024arekin alderatuta, nazioarteko ziurgabetasunak eta azpisektoreen portaera desorekatuak markatutako testuinguruan. Esportazioei dagokienez, 1.739,88 milioi eurokoak izan ziren, %0,55eko atzerakada arinarekin; hala ere, maila altuetan mantendu ziren, industriaren nazioarteko izaera sendoa islatuz.
AFM CLUSTERek fabrikazio aurreratuaren eta digitalaren arloko 800 enpresa baino gehiago biltzen ditu, eta horietatik 205 azokan egongo dira, BIEMHen erakusketa-gunearen zati garrantzitsu bat hartuz.
