IndeusBerri: industria eta euskara uztartzen dituen informazioaren topagunea
Erronka berri bat dugu gaurko IndeusBerrin albiste nagusi: Adimen artifizialak euskaraz egin dezan abiarazitako Gaitu proiektua euskal hiztunon laguntza eta lankidetza eskatzen duena. ESKUARA egitasmoa ere jaso du buletinak, Arabako 50 langiletik gorako enpresetan euskara sustatzea helburu duena. Araban jarraituz, gaur zortzi Gasteizen egingo den Ekonomilari Euskadunen Biltzarrari buruz EnpresaBIDEAk argitaratutako berriak eta Industria berriaren hiztegitik hartutako Nanomaterial berbak osatzen dute gaurko agerraldia.
Euskal ekonomiaren burujabetza izango du hizpide Ekonomialari Euskaldunen III. Biltzarrak.“Erabakiak guk ez baditugu hartzen beste batek hartuko ditu”, dio Oskar Arantzabal Udako Euskal Unibertsitateko (UEU) ekonomia sailburuak, eta, hain zuzen, hori izango da Ekonomialari Euskaldunen Biltzarrak datorren ostiralean, urriaren 27an, hizpide izango duen gai nagusia: erabakiak norberak hartzeko gaitasuna edota burujabetza, kasu honetan, ekonomikoa. EnpresaBIDEA egunkariaren berriak dio ostegunean egin dutela biltzarraren hirugarren edizioko aurkezpen ekitaldia. Arantzabalez gain, bertan izan dira Ane Sarasua UEUko idazkari nagusia eta Estrella Sanchez Ekonomisten Euskal Elkargoko Gobernu Batzordeko kidea.
ESKUARA, Arabako 50 langiletik gorako enpresetan euskara sustatzeko egitasmoa.Lanabes programaren barruan, Arabako enpresek tresna berri bat dute euskararen erabilera bultzatzeko: Eskuara. Euskararen erabilera sustatzeaz gain, hizkuntza berdintasuna bultzatzea ere helburutzat dauka egitasmo berriak. Une honetan, Eskuara proiektuak bi enpresen atxikimendua du: Aenkomer eta Sirimiri. Hemendik aurrera enpresa kopurua handitzen joatea da asmoa, 2024 urte amaierako 25 enpresetara iritsiko diren aurreikuspenarekin. Proiektuan parte hartzeko baldintza bakarra dago: enpresak bere behar eta neurrira egokitutako konpromisoak hartzea eta betetzea.
GAITU proiektua: Adimen artifizialak euskaraz egin dezan.Erronka berri bat dugu: makinek gure hizkuntza ulertu eta hitz egin dezaten, lehenago irakatsi egin behar diegu. Horretarako, milaka ahots behar ditugu, milaka grabazio ordu euskaraz. Ahots asko eta askotarikoak behar ditugu: adin tarte, genero eta mota guztietakoak. Guztion artean sortzen ari garen ahotsen datu-basea, gero enpresa guztiek erabili ahal izango dute euskarazko tresna eta aplikazio berriak sortzeko, euskaldun guztion onurarako. Horretarako, sartu eta grabatu mesedez 30-300 esaldi inguru . Oso erraza da. Ekarpen polita egingo diogu gure hizkuntzaren eta kulturaren garapenari.
“Nanomaterial” Industria Berriaren Spri Hiztegian. 1-100 nm bitarteko tamainako egiturez osatutako materiala. Mikroeskalako eta makroeskalako materialek ez bezalako propietate optiko, elektroniko edo mekanikoak dituzte; batez ere, fenomeno kuantikoen agerpenaren ondorioz.
Nanomaterialetan egindako ikerketak materialen zientzian oinarritutako nanoteknologiaren ikuspegia du, metrologian egindako aurrerapenak eta mikrofabrikazio-ikerkuntzaren laguntzaz garatu diren materialen sintesiak aprobetxatuz.
