Zizarek hondakina lurzoru bizia bilakatzen du
Zizare startupa Mungian (Bizkaia) kokatuta dago eta lurzorua birsortzeko soluzio berritzaileak garatzen dihardu. Zehazki, azpiproduktu organikoak zizare-humus eta biologikoki aktiboak diren estraktu likido bihurtzen ditu enpresak, nekazaritza-lurzoruen eta ekosistema degradatuen kalitatea hobetzeko.
“Gure asmoa ez da mikroorganismo isolatuak txertatzea, baizik eta lurzoruaren mikrobio-ekosistema osoa leheneratzea, funtzionaltasun biologikoa berreskuratzeko”, azaldu du Fernando Gutierrezek, Zizareko zuzendariak. Bere bezero nagusiak nekazari ekologikoak eta birsortzaileak, upeltegiak, haztegiak, nekazaritzako elikagaien enpresak eta ingurumena lehengoratzeko proiektuak dira.
Konpainiak mikrobiologiako laborategi propioa du jarduera hori osatzeko. Laborategi horretan, lurzoruaren egoera aztertzen da, biomasaren helburuak zehazten dira laborearen arabera, eta birsorkuntza-prozesuen bilakaera modu objektiboan neurtzen da. “Zizare-humusa ez da ongarri bat bakarrik, mikrobio-bizitzaz betetako ekosistema txiki bat baizik”, nabarmendu du Gutiérrezek. “Kontua ez da soilik nutrienteak ematea, baizik eta lurzoruaren funtzionamendu biologikoa sistema bizi gisa berreskuratzen laguntzea”.
Zizarek esku artean duen proiektu nagusia Arabako Teknologia Parkean Lurzorua Biziberritzeko Zentroa abian jartzea da. Espazio horrek ekoizpena, laborategia eta dibulgazio-jarduerak bilduko ditu, mikrobiologiak lurzoruen birsorkuntzan duen garrantzia nabarmentzeko.
Ekimen honen jatorria Bizkaiko ikastetxe batean garatutako proiektu pilotu bat da. Bertan, enpresak urtean 20 tona hondakin organiko balorizatzea lortu zuen, konpostajearen eta bermikonpostajearen bidez. Esperientzia horretatik abiatuta, Zizarek nekazaritza-ustiategietako lurzoruaren biologia hobetzeko proiektuetara eta ingurumena lehengoratzeko ekimenetara zabaldu du bere jarduera, adibidez, errepideko ezpondak berreskuratzera. Horrez gain, enpresa soluzio berriak garatzen ari da, hala nola hondakin-ur deszentralizatuak tratatzeko zizaredun bioiragazkiak.
Bere hasieran SPRI Taldeko Ekintzaile programaren laguntza izan zuen proiektuak. Etorkizunera begira, konpainiaren helburua da Lurzorua biziberritzeko zentroa estatuko erreferentziazko azpiegitura gisa finkatzea. “Oinarri sendoak ezarri nahi ditugu, eta lurzoruaren funtzionamendu biologikoa berreskuratuko duten ereduetarantz jo. Lurraren biziberritzea lurraldearen erresilientzia eta segurtasun kontua ere bada”, ondorioztatu du enpresako zuzendariak.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
