Eusko Jaurlaritzak epea ireku du startup disruptiboek irtenbide digitalak eman diezazkieten 20 euskal ETEri
Berrikuntza irekiko BIND plataformak startupei eta scaleupei zuzendutako deialdi berri bat egin du, BIND SME programaren 5. edizioan parte hartzeko. Ekimen hori euskal ETEak digitalizatzeko erronkei startup disruptiboekiko lankidetzaren bidez erantzuteko asmoarekin sortu da. Horretarako, parte hartuko duten 20 ETEek sektorearen 7 erronka proposatu dituzte honako esparru hauetan: antolamendu efizientea, negozio eta bezero digitala, industria adimenduna, zibersegurtasuna eta jasangarritasuna eta trantsizio energetikoa.
Startupak ETEek hautatuko dituzte proiektu errealak eta ordainduak garatzeko. Horren bidez, parte-hartzaileek merkaturako zuzeneko sarbidea lortuko dute, eta erreferentziazko bezeroek haien soluzioa balidatuko dute. Era berean, startup horiek Eusko Jaurlaritzak eta SPRIk garatutako BINDen azelerazio-programaren zerbitzuak jasoko dituzte. Programa horrek prestakuntza, mentoring pertsonalizatua eta berrikuntzaren eta ekintzailetzaren euskal ekosistemarekiko konexioa eskaintzen ditu. Horrek guztiak agerikotasun handiagoa eta erreferentzia gehiago dakartza sektorean, eta horrek startupen hazkundea bultzatzen du.
BIND SME programa Eusko Jaurlaritzako Industria, Trantsizio Energetiko eta Jasangarritasun Sailak SPRI Taldearen eta haren Up!Euskadi plataformaren bitartez sortutako berrikuntza irekiko BIND plataformaren parte da. 2016an sortu zenetik, eta enpresa handiekin, ETEekin eta erakundeekin egindako 3 ekimenen bidez, dagoeneko 250 startup azeleratu eta 250 proiektu baino gehiagoren garapena bultzatu du.
BIND SMEren 5. edizio honetan, 7 urte baino gutxiago dituzten, legez eratuta dauden eta gutxieneko produktu bideragarri bat garatu duten startupek eta scaleupek parte hartu ahal izango dute. Interesdunak deialdian inskribatzeko epea urriaren 20an amaituko da.
Startupen soluzioak 7 erabilera-kasutarako
BIND SMEren edizio berri honetan parte hartuko duten ETEek soluzioak bilatu nahi dituzte honako arlo hauetan: antolamendu efizientea, negozio eta bezero digitala, industria adimenduna, zibersegurtasuna eta jasangarritasuna eta trantsizio energetikoa. Startupek, zehazki, honako 7 erronka hauetan aurkeztu ahal izango dituzte beren teknologiak:
- Barne-prozesuen optimizazioa eta digitalizazioa
- Merkataritza-kudeaketaren digitalizazioa eta optimizazioa
- Erabiltzaile-esperientzia eta merkatu-azterketa
- Eragiketaren eta haren logistikaren konektagarritasuna eta azterketa
- Kalitate-ikuskapena ikuspen artifizialarekin
- Zibersegurtasuna prozesu eta produktu konektatuetan
- Ingurumen-inpaktuaren neurketa eta murrizketa
BIND SMEren 5. edizioan, industriaren, manufaktura aurreratuaren, zerbitzuen, elikaduraren eta energiaren sektoreetan erreferenteak diren EAEko 20 ETEk hartuko dute parte: Draxton, automobilgintzarako galdaketa-enpresa; Lanik, egituretan espezializatua; Vicrila, beira-fabrikazioan diharduena; Industrias Mail, liderra tresna berezien fabrikazioan; Loramendi, erreferentziazkoa galdaketarako soluzioetan eta makinerian; GHI Hornos, aluminioaren tratamenduan diharduen enpresa; Bronymec, polimeroen banaketan eta mekanizazioan espezializatua; Loire Gestamp, liderra estanpazio-makinerian; Eralki, makineria dardarakorraren produkzioan diharduen ingeniaritza-enpresa; Composites Martiartu, pieza teknikoen diseinuan eta fabrikazioan espezializatua; Zikotz, eraikuntza-enpresa; Gistek, aseguru-etxeentzako IT sistemak garatzen dituen enpresa; Echebarria, industria-hornigaien banatzailea; AAC Acústica, akustikan eta luminikan aditua den ingeniaritza-enpresa; H2Site, erreferentziazkoa hidrogenoaren sorkuntzan eta bereizketan; Grupo Kirol, kirol-apustuetarako softwarea garatzen duen enpresa; Techlab Systems, kalitate-kontrolerako ekipamenduak eta softwarea garatzen dituen enpresa; AZ3 Oeno, upeltegientzako zerbitzuetan espezializatua; Oilasko Berriak, haragi-produktuak banatzen dituen enpresa; eta Xardexka, prestatutako platerak banatzen dituen food service-ko enpresa.
Lau edizio arrakastatsuren ondoren, BIND plataformak 40 arrakasta-kasu baino gehiago ditu ETEen eta startupen arteko lankidetzan. Izan ere, BIND SMEren 4 edizioetan 40 startupek eta 90 ETEk hartu dute parte. 5. edizioan, urriaren 20ra arte onartuko dira startupen hautagaitzak. Aurkeztutako erabilera-kasuetarako soluzioak dituzten zortzi urtetik beherako startupak eta scaleupak hemen inskribatu ahal izango dira.
BIND-i buruz
BIND industria adimendunaren berrikuntza irekiko plataforma publiko-pribatu bat da, Industria, Trantsizio Energetiko eta Jasangarritasun Sailak SPRI Taldearen bitartez sortua. BINDek hiru ekimen ditu: BIND Corporate, BIND SME eta BIND GovTech, Euskadiko enpresak, ETEak eta sozietate publikoak mundu osoko startup disruptiboekin konektatzeko, haiekin berrikuntza-proiektuak garatzea helburu. 2016an jarduera hasi zuenetik, 250 startup eta scaleup baino gehiago bizkortu dira, eta 350 proiektu baino gehiago garatu dira, 9,6 milioi euroko fakturazioa gaindituta. Era berean, plataforma erreferente gisa kokatu da sektorean, industriaren digitalizazioari eta lurraldeko enpresa-sareari emandako laguntzagatik.
