HA Ilarduya, galdategietarako lehengaien hornitzaile liderra
HA Ilarduya ia 110 urteko ibilbidea duen eta Zornotzan kokatuta dagoen enpresa da. Galdategietarako lehengaien hornitzaile liderra da Iberiar penintsulan. Produkzio-azpiegitura propioa du eta, horri esker, galdategietarako produktuen gama zabalena eskain dezake. HA Group Alemaniako multinazionalaren baitan dago eta Zornotzakoa da Taldearen I+G arloko bederatzi zentroetako bat. Bizkaiko enpresak SPRI Taldearen Hazinnova programako laguntzak jaso ditu. Programak ETE-entzako doako aholkularitza espezializatua eskaintzen du haien negozioen berrikuntzarekin lotuta.
Ehun urte baino gehiago dituen enpresa hau 1918an sortu zen Bilbon Ilarduya y Cía izenarekin galdaketa-industriarako produktu osagarriak merkaturatzeko. Hasiera batean, honako lehengai hauekin egiten zuen lan batez ere: harea, ikatza edo harrikatza. “Pixkanaka-pixkanaka, produktu gehiago sartzen hasi zen, galdategi bateko edozein lehengairen hornitzaile integral bihurtzeko”, azaldu du David Zoritak, HA Ilarduyako CEOak.
Negozioa hazten joan zen eta, 1969an, gaur egun kokatuta dagoen tokira eraman zuten: Zornotzara. Une hartan bertan lortu zuten Huttenes Albertus (HA) lizentziaren baitan produktu kimikoak fabrikatzeko lankidetza-hitzarmena. Huttenes Albertus Alemaniako bi familiak osatutako multinazionala da. “Galdategietarako produktu kimikoak fabrikatzeko teknologia utzi ziguten. Jauzi esponentziala ekarri zuen horrek; izan ere, HA Group galdaketarako produktu kimikoen teknologian mundu mailako liderra da”.
Hala, negozio-eredua aldatu egin zen, arlo kimikoa eta metalurgia konbinatuta, “eta, ondorioz, galdategi batek funtzionatzeko behar duen ia guztia hartu genuen. Merkatuko produktuen gama zabalena lortu genuen horrela”.
Urte hartan bertan, 1969an, Alemaniako HA multinazionalak akzioen % 25 erosi zuen, eta 2014an % 100era igo zen partaidetza hori. “Baina tokiko kudeaketa eta kultura bere horretan mantendu dira. Finantzen aldetik oso sendoa den taldea balio eta kudeaketa familiarragoekin ondo nahastea lortu dugu. Horrek produktuen gama integrala mantentzea ahalbidetu digu”.
HA Ilarduyak produktuen bi lerro nagusi ditu. Arlo kimikoan, galdaketako erretxinak daude; horixe da produktu konplexuena. “Erretxinak produzitzeko ardura eta konplexutasun handia eskatzen duten produktuak dira, eta lehiatzeko garaian abantaila dugu. Izan ere, erreaktore propioak (edukiontzi bertikal handiak) dituzten operadore bakarrak gara. Horri esker, bezeroaren beharretara egoki gaitezke, eta malgutasuna eta hornidura bizkorra eskaini”. Erretxinekin batera, pintura erregogorrak eskaintzen dituzte galdaketa-moldeetarako eta aurrez estalitako hareetarako, hainbat sektoretarako: balbulak, txorrotak eta oil&gas.
Metalurgia
Bigarren lerro nagusia metalurgia da, eta hor daude ferroaleazioak, galdaketako hareak (kromita, olibinoa, magnetita edo bauxita, adibidez), urratzaileak eta elikadura-sistemak. “Ferroaleazioak azken produktuak behar dituen propietateak izan ditzan erabiltzen dira. Adibidez, ibilgailu batentzako balazta-disko batek harikortasuna izatea eta, aldiz, meatzaritzarako pieza batek behar adinako gogortasuna izatea.
Bezero gehienak sektore hauetakoak dira: automobilgintza, eolikoa, meatzaritza, eraikuntza, makina-erreminta eta balbulagintza. “Galdategiek beren produkzio-prozesuko etapa guztietan erabil ditzaketen lehengai guztiak ematen dizkiegu: moldaketa, galdaketa eta akabera, besteak beste. Eskaeraren arabera egiten dugu lan”.
61 langile dira guztira eta urteko fakturazioa 35 eta 40 milioi euro ingurukoa da. Mundu mailan liderra den multinazional batean sartuta dagoenez, merkatua Iberiar penintsulara, Afrika iparraldera eta Hego Amerikara mugatzen da.
I+G arloa ezinbestekoa da IHA Ilarduyarentzat. “Bi berrikuntza-geruza ditugu. Haietako bat Alemaniatik dator eta 120 laguneko laborategia du. Bertatik sortzen dira teknologia arloko gure hobekuntza guztiak. Bestetik, lehia-zentroa, instalazio pilotua, ere badugu. Bertan, industria-eredu bat erreplika daiteke, eta, hala, galdategiek beren garapenak egin ditzakete”. Taldeak 13 eta 14 milioi euro artean bideratzen ditu I+G arlora; hau da, fakturazio globalaren % 2.
Bigarren berrikuntza-geruza Zortzontzan dago eta berta dago HA Groupek bost kontinenteetan hedatuta dituen I+G arloko bederatzi zentroetako bat. “Hemen bi pertsona ditugu esklusibotasunez lanean. Horri esker, soluzioak neurrira eskain ditzakegu, modu malgu eta arinean”.
Hazzinnova programaren bidez SPRI Taldearengandik jasotako laguntzak talentua kudeatzera (prestakuntza-plana eta lana ebaluatzeko sistemarekin) eta hornikuntza-katea hobetzera bideratu dira.
Etorkizunera begira, erronkak jasangarritasunarekin, lehiakortasunarekin, digitalizazioarekin eta talentuaren garapenarekin lotuta daude. “Ekinbarri proiektuan hartu dugu parte. Proiektu horrek pertsonak kokatzen ditu lehia mailako abantaila-elementu gisa, konpromisoa, barne-komunikazioa eta taldeko lana indartuz”.
SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
