Delta, arte grafikoen erreferentea Gipuzkoan
Delta arte grafikoen sektorean lan egiten duen Donostiako enpresa familiarra da. Dagoeneko 37 urte bete ditu, eta Gipuzkoan lider eta erreferente da sektorean. Etorkizuneko erronka produktuak eta zerbitzuak etengabe hobetzea izango da. SPRI Taldearen Renove Smart Industry programako laguntza jaso du. Programa horrek 4.0 industria bultzatzeko makineria eta ekipamendu aurreratuaren erosketa finantzatzen du.
Enpresa 1989an sortu zen Jesús Larrearen ekimen enpresarialaren ondorioz; hark, Óscar eta Gonzalo Sola anaiekin elkartuta, hasieran auzoko kopistegia bat sortu zuen Donostiako Eustasio Amilibia kalean. “Urteak joan eta urteak etorri, Delta garai berrietara egokituz joan da. Beti egon gara merkatuko eskaerei erne, langileak etengabe trebatzen eta makineria berritzen. Horri esker, formatu txiki zein handiko inprimaketaren erreferente bihurtu gara”, ziurtatu dute egun enpresa zuzentzen duten Alvaro eta Gonzalo Sola anaiek.
2007an, enpresei zuzendutako zerbitzuetara bideratzea erabaki zuten, eta ekoizpen guztia Donostiako Zuatzu enpresa-parkeko 800 metro karratuko nabe batean zentralizatu zuten, eta gaur egun bertan jarraitzen dute lanean.
Eskaintzen dituen zerbitzuen artean denetarik aurki daiteke: formatu txikiko inprimaketa (txartelak, zigiluak, aldizkariak, koadernaketak, triptikoak, flyerrak, karpetak, gutun-azalak, eskuliburu teknikoak edo kartelak), edota formatu handiko garapena, inprimaketa eta errotulazioa (roll-upak, photocall-ak, banderolak, kartelak, inprimatutako biniloak, binilo dekoratiboak, ebakidura-biniloak, seinaleztapena eta abar). Horrez gain, mota guztietako ibilgailuak errotulatzen dituzte, planoak zein zigilu digitalak egiten dituzte, eta lasterketetarako dortsalak ere inprimatzen dituzte. Azkenik, euskarri zurrunen gainean ere egiten dute lan; esaterako, kaxetan, oihalezko zein paperezko poltsetan, gutun-azal babestuetan, egurretan edo PVCan.
Aipatzekoa da Delta “deco” (dekorazioa) eta errotulazioaren munduan indartsu sartu dela, “azoka-standak, erakustokiak, bulegoak, beirateak eta, azken batean, edozein espazio errotulatzeko aukera eskainiz”. Hala, Deltako errotulazio-adituen taldeari esker, gaur egun espazioak berritu eta berriak sor daitezke, “bakoitzaren beharretara egokituta eta obra handietan sartu beharrik gabe”.
Une honetan, enpresak 16 langile ditu lantaldean, eta urteko fakturazioa 1,6 milioi eurotik gorakoa da.
SPRIren aldetik jaso duten azken laguntza Smart Industry Renove Plana izan da. Diru hori teknologia berridun makineria erostera bideratu dute, “gure ekoizpena azkarragoa, eraginkorragoa eta ingurumen-inpaktu txikiagokoa izan dadin”.
Etorkizuneko erronkei begira, helburua produktuak eta zerbitzuak etengabe hobetzea da, “egindako lanean kalitaterik onena eskainiz eta, ahal den neurrian, lan horiek berehala entregatzen saiatuz. Gure helburu nagusia bezeroak pozik geratzea gure arretarekin zein kalitate handiko lan eta akaberekin”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
