ZeniaLabs automatizazio adimendunean zentratzen da, motor industrial gisa
Azken urteotan, industriak engranajeak eta makinak izateari utzi dio, eta datu, sentsore eta erabaki automatizatuen ekosistema bihurtu da. Eraldaketa horri erantzunez sortu zen ZeniaLabs. Bizkaian duen egoitzatik, ingeniari talde txiki batek adimen artifiziala, sentsorika aurreratua eta konputagailu bidezko ikusmena sistema industrialetan nola integratu aztertu du, metodo konbentzionalak iristen ez diren tokietan esku hartzeko helburuarekin.
Enpresaren ideia 2019an sortu zen, urteetako ikerketa eta esperimentazioaren emaitza. Sortzaileek hutsune bat hauteman zuten: industria-instalazio askok lehendik instalatuak zituzten ekipoak, baina ez zuten prozesu konplexuak optimizatzeko aukera ematen zuen “adimen punturik”. Merkatuan eskuragarri zeuden sistemak ez ziren nahikoak, eta automatizazio konbentzionalak ez zuen lortzen instalazio bakoitzaren behar espezifikoak asetzea. Egiaztapen horretatik sortu zen ZeniaLabs, soluzio integralak, modularrak eta hainbat industria-ingurunetara moldagarriak garatzeko helburuarekin. Konpainia 2020an hasi zen bere lehen proiektuekin lanean.
Bere lanak hardwarea eta softwarea konbinatzen ditu garapen berean. Besteak beste, abiadura handiko hardwarea eta firmware pertsonalizatua diseinatzen ditu, eta datuak denbora errealean interpretatzeko eta sentsoreen, gailuen eta sistemen arteko komunikazio sendoak ezartzeko gai diren ikusmen-sistemak eta adimen artifiziala ere eskaintzen ditu. Horri esker, enpresak tren- eta portu-sektoreetako ikuskapen- eta mantentze-robotetatik hasi eta pertsonak eta kargak automatikoki garraiatzeko sistemetaraino iristen diren proiektuetan esku hartu du. Kasu askotan, garapen horiek zibersegurtasuna, hodeiko edo tokiko datuen prozesamendua, errealitate areagotua eta fabrikazio gehigarria dituzte, eta proiektu bakoitzaren eskakizun espezifikoetara egokitzen dira beti.
ZeniaLabs-ek estatuko nahiz nazioarteko bezeroekin lan egiten du, eta zentro teknologikoekin eta Europako enpresekin lankidetzan aritzen da ikerketa- eta berrikuntza-proiektuetan. Bere lanik aipagarrienen artean, hauek daude: ECHOES proiektuan, lurreko, sateliteko eta hegazkineko komunikazio-satelite baterako softwarea garatzea; trenbide- eta portu-prozesuak hobetzera bideratutako ESMERA eta GALATEA proiektu europarrentzako sistema robotikoak, eta TRINITY proiektuan, robotentzako posizionamendu-sistema zehatz eta duala. Proiektu horietako batzuk enpresekin egindako kontratu zuzenei dagozkie; beste batzuk, berriz, Europako, Espainiako edo autonomia-erkidegoetako programek (SPRI Taldearen Hazitek, adibidez) lagundutako ikerketa-ekimenei.
Lantalde txikia du, baina askotarikoa eta esperientziaduna, eta ingeniaritzan doktoreak, hainbat master teknologikotako ingeniariak eta I+G+Bn ibilbide luzea duen project manager bat ditu. Urtero praktiketako graduko eta masterreko ikasleak sartzen dira, talentu gaztea eta lanerako aukera berriak integratzeko.
Etorkizunera begira, ZeniaLabs-ek automatizazio adimendunak oraindik irtenbide finkorik ez duen esparruak esploratzen jarraitzen du. Bere ibilbideak islatzen du ikerketa aplikatua, ingeniaritza eta sormenaren konbinazioak aldaezinak ziruditen prozesu industrialak eralda ditzakeela, erakutsiz oso egituratutako sektoreetan ere berrikuntzak bide berriak ireki ditzakeela.
SPRI Taldeak enpresei laguntzen die 2024ko Adimen Artifizial Aplikatua eta Datuaren Estrategia laguntza-programaren bidez. Programa horrek Euskal Autonomia Erkidegoko konpainietan AAren erabileran oinarritutako proiektuak babesten ditu, frogapen-efektua dutenak eta Euskadin teknologia horren eskaintza eta eskaria aktibatzea ahalbidetzen dutenak, enpresei lehiakortasuna handitzeko tresnak emateko helburuarekin.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
