Euskarazko albisteak automatikoki errazteko lehen sistema sortu dute Vicomtechek eta TOKIKOMek
Adimen artifizialak informazioaren eskuragarritasuna hobetzeko aukera berriak zabaltzen jarraitzen du. Ildo horretan, TOKIKOMek, euskarazko tokiko hedabideen sareak, eta Vicomtech zentro teknologikoak euskarazko albisteak automatikoki sinplifikatzeko lehen sistema publikoa garatu dute. Euskara ikasten ari diren pertsonei informazio gaurkotasuna gerturatzeko diseinatutako soluzio teknologikoa.
TOKIKOM sareko hainbat komunikabidetan txertatuta dago jada tresna, eta lengoaia naturala prozesatzeko teknologia aurreratuak erabiltzen ditu kazetaritza edukiak hizkuntza maila eskuragarri batera automatikoki egokitzeko. Sistemak albiste bakoitza aztertzen du, ideia nagusiak bereizten ditu eta euskara sinpleago batean idatzitako bertsio berri bat sortzen du, testuaren funtsezko informazioa eta jatorrizko esanahia mantenduz.
Proiektua Vicomtech eta TOKIKOMen arteko lankidetzaren emaitza da. Urte bateko prozesuan, bi lantaldeek ikuspegi teknologikoak garatu eta baliozkotu dituzte, halako irtenbideen alderdi konplexuenetako bat bermatzeko: jatorrizko edukiaren informazio-fideltasuna zaintzea. Thierry Etchegoyen Vicomtecheko ikertzaile eta garapenaren arduradun taldeko kideak Jesús Callejarekin batera azaldu duenez, “hizkuntza-ereduek albisteen jatorrizko edukia eraldatzen duten interpretazioak edo aldaketak ez sartzea izan da erronka nagusietako bat. Gai horrek garrantzi berezia hartzen du zenbait elementutan, hala nola adierazpen edo aipu testualetan, non tresnak bitartekoek jasotako hitzen zentzua bere osotasunean mantendu behar baitu”.
TOKIKOMetik nabarmendu dutenez, ekimenaren helburua ez da informazio arloko profesionalen lana ordezkatzea, baizik eta ulermen zailtasunak edo hizkuntza oztopoak aurkitu ditzaketen kolektiboei gaurkotasunerako bidea errazteko bide osagarri bat eskaintzea. Horregatik, albiste sinplifikatuak argi eta garbi identifikatuta eta bereizita agertzen dira erredakzioek landutako edukietatik.
Euskarari aplikatutako hizkuntza-teknologien garapenean beste aurrerapauso bat da proiektu hau. Era berean, AAk irisgarritasuna eta ezagutzaren hedapena hobetzeko tresna gisa duen zeregina indartzen du. TOKIKOM Plataforman integratutako tokiko hainbat hedabidetan eskuragarri dago jada tresna, besteak beste, Goiena, ALEA, GUKA, Aiaraldea, Txintxarri eta ERRAN.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu. Gainera, laguntza- eta zerbitzu-programetara sar zaitezke.
