Apirilaren 3 eta 4an egingo den topaketa horretan antolatuko da lehen Talentuaren Foroa, unibertsitateko ikasketak bukatzen ari diren gazteei zuzendua dagoena
SPRI Taldean integratutako Nazioartekotzeko Euskal Agentziak (Basque Trade & Investment) datorren apirilaren 3 eta 4an parte hartuko du Deustuko Unibertsitateak bere Bilboko campusean antolatuko duen Enplegu eta Ekintzailetza Foroan. Topaketa horretan egingo da lehen Talentuaren Foroa, unibertsitateko ikasketak bukatzen ari diren gazteei zuzendua dagoena.
Agentziak stand propio bat izango du Deustuko Unibertsitatearen Eraikin Nagusiko klaustroetan, non talentu programei buruzko informazio guztia eskainiko baitie unibertsitateko ikasleei.
Gainera, apirilaren 4an (goizeko 10:30etik 11:30era) saio informatzaile bat egingo da Garate Aretoan, eta bertatik bertara azalduko dira Nazioartekotzeko Euskal Agentziaren funtzionamenduarekin lotutako gaiak, hala nola bere programak eta atzerrira irteteko esperientziak.
BECen maiatzaren 6 eta 7an egingo den Intergune+ 2019 ekitaldiaren (Nazioartekotzearen urteroko hitzordua Euskadin) berritasunetako bat da datorren astean Deustun antolatuko den Talentuaren Foroa. Unibertsitatea eta enpresa elkarri konektatzeko espazio propio bat da, gaurko ikasleek eta biharko nazioartekotzearen arloko profesionalek jakin dezaten nolako gaitasun, trebezia, talentu eta prestakuntzak eskatzen dituzten globalki lehiatu nahi duten enpresek.
Hala, Intergune+ barruan egingo den Talentuaren Lehen Foroa gehienbat unibertsitateko ikasketak amaitzen ari diren gazteei zuzendutako topaketa bat da, helburutzat daukana gazte horien interesa piztea nazioartekotze arloko karrera profesional bat egin dezaten, eta baita ere bermatzea nazioarteko profila duten adituak izango ditugula etorkizunean.
Atal hori bereziki zuzendua dago Nazioartekotzearekin lotutako graduetako azken ikasturteak egiten ari diren ikasleei eta BEINT eta Global Trainning programetako bekadun ohiei.
Euskadiko Nazioartekotze Agentzia iaz sortu zen Eusko Jaurlaritzak arlo horretan dauzkan gaitasunak eta aktiboak integratu eta sendotzeko, eta bere ekintzaren eraginkortasuna, kalitatea eta irismena hobetzeko. Nazioartekotze arloko programa eta zerbitzuen arteko bereizketa funtzionala desagerraraziko da horrela, enpresen premia zehatzei hobeto egokituz.
ETEentzako, merkatuak dibertsifikatzeko, atzerriko bekak, nazioarteko lizitazioak, itzuli beharrik gabeko dirulaguntzak esportazioak sendotzeko, ezarpenak egiteko laguntzak edo nazioartekotzeko prestakuntza espezifikoa.
Interesgarria, ezta?