Enpresa-garapenerako
euskal agentzia
Enpresa-garapenerako
euskal agentzia
Ekimena sortu da Javier Zarraonandiak –Eusko Jaurlaritzako Industria sailburuordeak- eta Ainhoa Ondarzabalek –Euskadiko Nazioartekotze Agentziako kontseilari delegatuak- Arabiar Emirerri Batuetara egin duten bidaiaren ondoren.
2020an egingo den ekitaldi horrek 2.500 milioi eurotik gorako 134 lan lizitatu zituen iaz bakarrik.
SPRI Taldean integratutako Euskadiko Nazioartekotze Agentziak (Basque Trade & Investment) aholkularitza eskaintzen die 2020ko Dubaiko Erakusketa Unibertsaleko lizitazioetan interesatuta dauden enpresei. Javier Zarraonandia –Eusko Jaurlaritzako Industria sailburuordea- eta Ainhoa Ondarzabal -Euskadiko Nazioartekotze Agentziako kontseilari delegatua- duela gutxi izan dira Arabiar Emirerri Batuetan, eta bidaia haren ondorioz, erakunde publikoak zehatzago aztertu ditu herrialde hark Euskadiko enpresa-sareari eskain diezazkiokeen aukera komertzialak.
Erakusketa Unibertsala Dubain egingo da 2020an (EXPO 2020), eta aukera interesgarria da euskal enpresen negozioentzat, bai ekitaldiaren dimentsio globalagatik, eta baita ere, aurreikuspenen arabera, bisitari asko izango dituelako, 25 milioi lagun inguru. EXPO 2020 ekitaldiaren antolakuntzak dagoeneko esleitu ditu 3.200dik gora kontratu mundu osoko enpresentzat, horietatik %57 ETEek eskuratu dituztelarik. Dubaiko Erakusketa Unibertsalak 2.500 milioi eurotik gorako 134 lan lizitatu zituen 2017an bakarrik.
Kontratu gehienak esleituta badaude ere, bereziki diseinu, ingeniaritza eta eraikuntza arloetakoak, oraindik badaude aukerak euskal enpresentzat. Aurreikusi da 2018an lizitatuko dela herrialde parte-hartzaileen pabilioiak, pabilioi bereziak eta hondakinen kudeaketarako nahiz zerbitzuetarako azpiegiturak eraikitzeko proiektua. Era berean, aukerak zabalduko dira sektore hauetan espezializatutako enpresentzat: hiriko plangintza, informazio teknologiak, energia berriztagarriak, hondakin operatzaileak, multimedia eta ikus-entzunezkoak, ekitaldien kudeaketa, cateringa eta elikadura, marketina eta ticketinga.
Kontratu horiek eskuratzeko, EXPO 2020ko hornitzaile gisa akreditatu beharra dago. Behin erregistratu ondoren, enpresek zabalik dauden lizitazioei buruzko informazioa jaso dezakete, eta webgune horretan bertan adieraz diezaiekete antolatzaileei lizitazioren batean interesaturik dauden. Enpresa interesatuek informazio gehiago eska dezakete Euskadiko Nazioartekotze Agentzian, 944 037 162 telefonora deituta edo agavin@basquetrade.eus helbidera idatzita.
Procurement Overview IP - March 2018
