Eraldaketa digitala
Elkarrizketak 15 Azaroa, 2019

IDDOk industrian fabrikazio gehigarriaren garapena azkartzen laguntzen du

Gipuzkoako aholkularitza enpresa horrek bere ezagutza eta esperientzia eskaintzen ditu fabrikazio gehigarriaren erronkei aurre egiteko
-

 

Gero eta gehiago dira euren ekoizpen prozesuetan fabrikazio gehigarriaren arloko konponbideak garatu nahi dituzten enpresak, baina aurrean dituzten arazo nagusietako bat da ezin asmatzea zein den euren beharrizanetarako teknologiarik egokiena, fabrikaziorako materialei eta material horiek urtzeko teknologiei dagokienez. Ordiziako IDDO enpresa orain dela urtebete luze jarri zen abian, eta helburutzat du bere bezeroei orientabideak ematea fabrikazio gehigarriak dakartzan erronka guztiei aurre egiteko. Erronka horiei buruz mintzatu gara IDDOko sortzaileetarikoa eta CEOa den Javier Martínez Redinekin.

 

Zein da IDDOren jatorria?

2018ko abuztuaren amaieran eratu ginen ofizialki, Ordizian, metalaren bidezko fabrikazio gehigarrian espezializatuta dagoen IK4-Lortek teknologia zentroaren ‘spin-off’ moduan, Mondragon Korporazioko bi industria-enpresarekin lankidetzan. Egia esan, eraketa ofizialaren aurretik ere bageneraman ia urtebete, 2017tik, negozio plana eta eredua lantzen, hausnartzen ea zer motatako eskaintza egin ahalko genion sektoreari.

 

Eratu eta handik gutxira aurkeztu ginen BIND 4.0 programarako —industria adimenduneko ‘startup’en bizkortzaile publiko-pribatua, SPRI taldearen bitartez Eusko Jaurlaritzako Ekonomiaren Garapen eta Azpiegitura Sailaren babesa jasotzen duena—, eta trakzio enpresen aldetik bost trakzio eskaera jasotzera ere iritsi ginen. Azkenik, birekin sinatu genituen akordioak: Petronor-Repsolekin eta Matricirekin. Lankidetza horiek zirela eta, ospea hartzen eta inguruan ezagunak izaten hasi ginen, eta horrek aukera eman zigun proiektu gehiago sustatzeko Gestamp, Danobat, Ampo edo Vicinay bezalako enpresekin.

 

Zer zerbitzu mota eskaintzen duzue IDDOn?

Ohartu ginen bezeroek euren negozioetan fabrikazio gehigarria sartzeko urratsak egin nahi zituztenean traba eta zalantza askorekin egiten zutela topo. Honelako galderak sortzen zitzaizkien eta oraindik ere sortzen zaizkie: “Nola hasiko naiz?, Zer motatako teknologia erabiliko dut?, Nola eragingo dit fabrikazio gehigarria erabiltzeak?, Prestakuntza eman behar ote diot nire lantaldeari?, Nola txertatuko dut fabrikazio gehigarria nire prozesuan?, Zer material erabiliko ditut?, Ekonomikoki bideragarria ote da? Guk egina genuen bide hori eta bageneukan 10-15 urteko esperientzia eta ezagutza fabrikazio gehigarriaren arloan eta metalgintzan; ezagutzen ditugu industrian erabiltzen diren fabrikazio gehigarriko teknologiak, eta neutralak eta inpartzialak gara, hau da, ez dugu makinarik saltzen, gure helburu bakarra baita bezeroari lagun egitea fabrikazio gehigarrirako bide horretan. Horregatik guztiagatik erabaki genuen aholkularitza eta ingeniaritza teknologikoko enpresa bat sortzea, industrian fabrikazio gehigarriaren garapena azkartzen lagunduko duena, enpresen ondoan egongo dena integrazio horretan eta nola lagundu ahal dien erakutsiko diena.

 

Alde batetik, lantaldeei prestakuntza ematen edo kultura hori barneratzen laguntzen dugu, dituzten aukerak uler ditzaten. Prototipoen eta lehen serieen fabrikazioan jardun dezakegu: geure makineriarik ez dugun arren, baditugu akordioak ‘service provider’ekin. Ingeniaritzako, fabrikazio gehigarrirako diseinuko eta optimizazio topologikoko zerbitzuak eskaintzen ditugu. Pieza edo produkzio bat ziurtatzeko prozesuan ere laguntzen dugu. Labur azalduta, fabrikazio gehigarrirako bidea leuntzen diegu bezeroei, eta eskutik eramaten ditugu prozesu osoan zehar.

 

Egin dituzuen proiektuen adibideren bat azaldu ahal diguzu?

Esaterako, badira euren produktuei hautsezko estaldura eman nahi dieten enpresak, iraunkorragoak izan daitezen, eta hori fabrikazio gehigarriaren bitartez egin liteke. Guk lagundu egiten diegu prozesu horiek euren instalazioetan industrializatzen. Bezero batzuek eskatzen digute fabrikazio gehigarriaren arloko negozio aukerak balidatzeko, dela lizentzia edo patenteen erosketaren bidez, dela enpresak erosita. Guk aholku ematen diegu gai horietan. Besteak beste, sorkidetzako ‘workshop’ak egiten ditugu zuzendari eta ingeniariekin, edota prestakuntza tailer bereziak diseinatzaileentzat. Beste alde batetik, eska diezagukete biltegi bateko piezak 3Dtan digitalizatzeko, noiznahi inprimatu ahal izan daitezen.

 

Prototipoak azkar sortzeko proiektuak egiten ditugu. Esaterako, barruan hozkuntzarako hutsuneak dituzten moldeak, mekanizazioaren bidez fabrikatu ezin direnak; barrutik hozten diren metalezko barauts bereziak; irudi geometriko konplexuak, bestelako baliabideekin egin ezin direnak; polimeroz fabrikatutako posizionamendu tresnak, eta abar. Hainbat eta hainbat kasu daude.

 

Zeintzuk dira fabrikazio gehigarriko soluzioak gehien eskatzen dituzten sektoreak?

Fabrikazio gehigarria sektore guztientzat da egokia. Automobilgintzan teknologia horiek ez dira oraindik tirada oso luzeetarako erabiltzen. Ibilgailu industrialetan, luxuzkoetan edo tresnerian ikusten dira. Luxuzko ibilgailuetan, barrualdeko piezak sortzen dira maletegiaren atea zabaltzeko, adibidez, edo aurreko panel pertsonalizatuak fabrikatzeko. Energian eta Oil & Gas alorrean, berriz, mekanizazioaren bidez fabrikatzen zailak diren piezak sortzeko erabiltzen da fabrikazio gehigarria. Ekipamenduko ondasunen alorrean, barne-erabilerarako tresnak eta ordezko piezak fabrikatzeko. Aeronautikan emango luke balio gehien, baina sektore horretan atzeratuta dabil, ziurtagiriak direla eta. Ikusi dugu nola fabrikatzen duten gehikuntzaren bitartez hegazkinetako segurtasun uhalen belarriak, baina oraindik kosta egiten da egiturazko piezetarako ziurtapena lortzea. Hala ere, uste dut berebiziko aukera dela aeronautikarako eta industria aeroespazialerako, pieza arin-arinak fabrika daitezkeelako, pisu handia kentzen dutenak. Dena helduko da.

 

Uste duzu Euskadi erreferentzia bihurtzen ari dela 3D inprimaketari dagokionez?

Berrikuntza gune bat sortu da, eta unibertsitateek eta teknologia zentroek parte hartu dute. IK4-Lortek zentroak eta Mondragon Unibertsitateak abian jarri dute Industriako Fabrikazio Gehigarriko Masterra, eta nahiko arrakasta handia izaten ari da. Gero, beste enpresa batzuk hasi dira inprimatzeko makineria fabrikatzen, eta beste batzuek 3D inprimaketako zerbitzuak eskaintzen dituzte bezeroaren neurrira. Kultura hori barneratzeko jardunaldi asko ere egiten ari dira. SPRI bultzaka ari da berrikuntza guneekin, eta fabrikazio gehigarriaren berri zabaltzen laguntzen ari da, jardunaldietan babesa emanez.

 

Nondik nora doaz fabrikazio gehigarriaren etorkizuneko joerak industriaren eremuan?

Argi dago makinen produktibitatea hobetu egingo dela. Hauts geruzak urtzeko makinak laser bakarrarekin hasi ziren, eta orain lau ere badituzte. Horrek azkartu egiten du fabrikazioa. Metal hautsaren fabrikatzaileak gero eta gehiago dira, eta inbertsioak egiten ari dira produktuaren kostuak txikitzeko. Horri guztiari esker, teknologia gero eta merkeagoa da.

 

Lotutako albisteak

AT  Mecasol-ek  digitalizazioaren  eta  jasangarritasunaren  aldeko  apustua  sendotzen  du  bere  hazkunde  industrialean

AT Mecasol-ek digitalizazioaren eta jasangarritasunaren aldeko apustua sendotzen du bere hazkunde industrialean

Bizkaiko enpresak bere gaitasun produktiboak hobetu ditu eta soluzio pertsonalizatuak eskaintzen dizkie mekanizazio eta soldadura arazo konplexuei.

Nuuk  Mobility-k  Espainiako  bi  gurpileko  flotarik  handienak  kudeatzen  ditu

Nuuk Mobility-k Espainiako bi gurpileko flotarik handienak kudeatzen ditu

Bizkaiko enpresak 14.000 ibilgailu baino gehiago administratzen ditu Espainian eta Portugalen. Bere bezeroen artean Correos, Burger King edo Popeyes daude.

Erakarrek  LED  panel  jasangarri  eta  adimendunak  fabrikatzen  ditu

Erakarrek LED panel jasangarri eta adimendunak fabrikatzen ditu

Gipuzkoako enpresak tinta elektronikoaren teknologia sartu berri du bere eskaintzan, energia kontsumo baxuarekin eta ikuspen handiarekin.

RKL  Integral-ek  larrialdietarako  planak  prozesu  digital  adimendunetan  bihurtzen  ditu

RKL Integral-ek larrialdietarako planak prozesu digital adimendunetan bihurtzen ditu

Enpresa bizkaitarrak VES izeneko software bat garatu du, segurtasun integraleko planak digitalizatzen eta automatizatzen dituena.

Altersys,  bidesarietako  matrikula  bidezko  kobrantza  adimendunean  espezializatutako  enpresa

Altersys, bidesarietako matrikula bidezko kobrantza adimendunean espezializatutako enpresa

Enpresa bizkaitarrak ia hamar urte eman ditu softwarea garatzen, eta bere lehen hardwarea patentatzeko prozesuan dago, trafikoa aztertzeko kamera propioa.

Labelan,  labeak  eta  galdarak  konpontzen  espezializatutako  Zegamako  ETEa

Labelan, labeak eta galdarak konpontzen espezializatutako Zegamako ETEa

Enpresak SPRI Taldearen zibersegurtasun-programaren laguntza jaso du eta digitalizazioaren aldeko apustua egiten du, 3D piezak diseinatzearen bidez.

Ariadna  Grid,  eraldaketako  40.000  zentro  elektriko  baino  gehiago  kudeatzen  dituen  ETEa

Ariadna Grid, eraldaketako 40.000 zentro elektriko baino gehiago kudeatzen dituen ETEa

Zornotzako enpresak tentsio baxuko sare elektrikoa monitorizatzen duen plataforma bat eskaintzen du, sarean arazoak edo galerak ekidite aldera

Laura  Francos  (SMARTPM):  “Prozesuak  digitalizatu  eta  automatizatzea  edozein  enpresaren  esku  dago”

Laura Francos (SMARTPM): “Prozesuak digitalizatu eta automatizatzea edozein enpresaren esku dago”

SMARTPM enpresak MIC plataforma garatu du ETE industrialen digitalizazio progresiboa errazteko, hainbat teknologia garapen-mailatara egokituz.

Zucchetti  Spainek  enpresen  kudeaketa-prozesuen  digitalitzazioan  laguntzen  du

Zucchetti Spainek enpresen kudeaketa-prozesuen digitalitzazioan laguntzen du

Enpresa bizkaitarrak enpresa-kudeaketarako software soluzioak garatzen ditu. 4.000 bezero baino gehiago ditu industriaren, zerbitzuen eta aholkularitzen sektoreetan, eta horietatik 1.200 Euskadin daude. Gaur egun, Latinoamerikan barneratzea aztertzen ari da.

Lantekek,  software  industrialean  munduko  liderrak,  36.000  bezero  baino  gehiago  ditu  dagoeneko

Lantekek, software industrialean munduko liderrak, 36.000 bezero baino gehiago ditu dagoeneko

Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du

Joan blogera

Jarrai gaitzazu

Kanal espezializatuak eta eguneroko gaurkotasuna gure sareetan.