IndeusBerri: industria eta euskara uztartzen dituen informazioaren topagunea

11 enpresa berrik bat egin dute LANDUEkin Durangaldeko eremu sozioekonomikoan euskara sustatzeko konpromisoarekin. Martxoaren 24an egindako ekitaldian sinatu zuten LANDUE ekimenarekin atxikimendua 11 enpresa berrik eta honenbestez 26 enpresa dira komunitate honetako kide egin direnak 2021ean ekimena sortu zenetik. Ekitaldian, sartu berri diren enpresekin batera egon dira Landueko kide diren gainerako 15 enpresak, baita ekimenaren bultzatzaile diren Durangaldeko Mankomunitateko presidente Mireia Elkoroiribe, Bizkaiko Foru Aldundiko Xabier Arauzo eta Eusko Jaurlaritzaren izenean Miren Dobaran.

Zibersegurtasun Industriala 2023 laguntza programa abian da urriaren 2ra arte. Industria adimendunerantz egindako eraldaketak eta honek dakarren konektibitateak agerian uzten dute zibersegurtasuna funtsezko tresna dela Euskadiko industria-enpresak gero eta hobeto prestatuta egon daitezen eraso zibernetikoei aurre egiteko, eta mehatxu hauen aurrean beren datuen eta prozesuen segurtasuna bermatzeko beharrezko baliabideak izan ditzaten. Arrazoi hauengatik, eta Euskadiko industria-sektorearen zibersegurtasuna eta lehiakortasuna bermatzeko, Zibersegurtasun Industriala programak itzuli beharrik gabeko 18.000 € diru-laguntzak eskaintzen ditu enpresa eta urte bakoitzeko.

LANHITZ programaren 2023ko deialdia argitaratu da. Eusko Jaurlaritzak ireki du LANHITZ programaren aurtengo deialdia, martxoaren 29tik maiatzaren 2ra zabalik egongo dena. Dirulaguntza eskatzeko lau multzo ezarri dira: Ekintza solteak, Diagnostikoa eta Euskara plana, Urteko kudeaketa plana eta Proiektu estrategikoak. Kultura Sailak 2 milioi euroko aurrekontua bideratu du Lanhitz programaren bidez banatzeko. LanHitz, lana eta hitza, euskara eta eguneroko lana uztartu eta indartzeko ekimena da. Programa honen helburua enpresetan euskararen presentzia eta erabilera areagotzea da, baina baita euskara entitatearen kudeaketa-sisteman txertatzea ere.

“ESTEREOLITOGRAFIA” Industria Berriaren Spri Hiztegian. Inprimatzeko teknologia-mota, non, molderik eta erremintarik erabili gabe, eta hiru dimentsioko prototipoetatik abiatuz, patroiak eta ekoizpen-piezak sortzen diren. Gai sintetiko likidozko gainazal bat hartu eta, laser-izpiak erabiliz, fotopolimerizatu egiten da, gogortzen den arte. Fotopolimerizazioa geruzaz geruza egiten da; hartara, molekula-kateak elkartu, eta polimeroak eratzen dira.