IndeusBerri: industria eta euskara uztartzen dituen informazioaren topagunea

Euskaltzaindiak eta UZEIk 2022ko hitza aukeratu dute: «zorioneko». Irulegiko eskua dela eta, hitz horrek hedabideetan eta sarean izan duen erabileran oinarrituta hautatu dute urteko hitz. Aranzadi Zientzia Elkarteak azaroan ezagutzera eman zuenez, baskoieraz idatzitako lekukotasun zaharrena den brontzezko pieza horretan «sorioneku» hitza irakur daiteke. Arangurengo Irulegi mendiko aztarnategian aurkitutako brontzezko eskuan, «orain arte baskoieraz ezagutzen den testu zahar eta zabalena» dago idatzita, Aranzadi Zientzia Elkarteak aurten ezagutzera eman duenez.

Leartibai Sarien lehen edizioko sariak banatu dituzte eskualdeko ekintzaileen artean. Lea-Artibai eskualdeko ekintzaileen lana saritu, ekintzailetzaren kultura zabaldu, eredu kooperatiboa bultzatu eta balio erantsi handiko enpresa berritzaileak bultzatzeko asmoz abiarazitako ekimena da. Orain arte urtero antolatu den Lea-Artibaiko Enpresa Proiektu Lehiaketaren aurreko hamalau edizioei lekukoa hartzen die Leartibai Sariek, eta Bizkaiko Foru Aldundiaren Udal Gaztedi programaren, Lea-Artibaiko Kooperatiben Mahaia Elkartearen eta Lea-Artibai eskualdeko 12 udalen laguntzari esker antolatzen dira.

IAMETZA Interaktiboa Indeus Elkarrizketak solasaldian. Elisabeth Pombo, Iametza Interaktiboa enpresako kudeatzailea da solaskide Indeus Elkarrizketak saioan. Beraren eskutik egin dugun ibilbide interesgarrian jakin dugu Iametza 2008.urtean eratu zela hiru enpresen arteko elkargune gisara: alde batetik ARGIA, bestetik ANTZA eta azkenik ADUR, horrenbestez komunikazioa, diseinua eta teknologia uztartuz. Bi punturen arteko loturatik abiatuta, Euskarabildua jardunaldia eta Beste Kaleak proiektua ere izan ditugu mintzagai, beste hainbat konturen artean.

TESTU-MEATZARITZA Industria Berriaren Spri Hiztegian. Testu batetik abiatuz, ordenagailuaren bidez kalitate handiko informazioa lortzeko prozesua, helburu duena aurrez ezagutzen ez den informazio berria aurkitzea, idatzizko hainbat baliabidetatik informazioa automatikoki ateraz. Informazioa eskuratzeko erabiltzen diren baliabideak askotarikoak izan daitezke: webguneak, liburuak, mezu elektronikoak, aipamenak, artikuluak eta abar. Ereduak eta joerak diseinatuta, kalitate handiko informazioa lortu ohi da; horretarako, adibidez, patroien ikaskuntza estatistikoa erabiltzen da.