GOMUTAK: Patologia mentalak dituzten eta gizarte-bazterkeria arriskuan dauden pertsonen bizi-kalitatea hobetzea
Ekimen honen helburu nagusia da bere eguneroko bizitzan patología mentala eramateko zailtasunak dituen gizarte-bazterkeria arriskuan dagoen pertsona orori laguntzea eta gure gizarteaten estigmak apurtzea. Bere fundatzailea, Juan Ignacio Llorente Orbea sopelaztarrak proiektuaren nondik norakoak azaldu dizkio Nahia Martinez Gondrari Uriola.eusen
Juan Ignacio Llorente Orbea (1999, Sopela) Gomutak plataformako sortzailea da. Duela urte eta erdi, ‘Getxo Wanted’ lehiaketa irabazi eta 10.000 euroko diru laguntza jaso zuen bere ideiari ekiteko. Ordutik, bere proiektuarekin diardu Gizarte Hezkuntza graduko ikasle den bitartean. Gomutak plataformaren nondik-norakoak azaltzeaz gain, gazte ekintzaile bezala bizitako oztopo eta beldurren inguruan mintzatu gara berarekin.
Nola erabaki zenuen ekintzaile izan nahi zenuela?
Betidanik izan dut argi nik sortutako proiektu batean lan egin nahi nuela. Horregatik, 16 urte nituenetik helburu hori nola lortu nezakeen pentsatzen ibili naiz.
Ekintzaile bilakatzearen kontua ausaz gertatutako zerbait izan zen: egun batean Getxo Wanted izeneko iragarki bat ikusi nuen eta informatu eta gero jakin nuen gazte ekintzaileei diru-laguntzak emateaz arduratzen zirela. Beraz, lehiaketan parte hartzea erabaki nuen eta azkenean, irabazi egin nuen. Modu horretan, duela urte bat eta erdi Gomutak sortu zen.
Zer da Gomutak?
Gomutak gaixotasun mentalak dituzten pertsonen bizi kalitatea hobetzeko balio duen aplikazio digitala da. Izan ere, pertsona hauen eta haien ingurukoen bizitza-soziala guztiz baldintzatuta dago eta Gomutak plataformak laguntza eskaintzen die egoera berdinean dauden beste pertsonekin harremanetan jartzeko. Modu horretan, laguntza sare bat eraikitzen dute eta nahiz eta gaixotasun-mental bat pairatu, pertsona horiek sozializatzen jarraitzen dute. Hori guztia euskarri digitalen bidez.
Gomutak-en webgunearen barnean, eskuragarri daude Bilbo inguruko elkarteen informazioa baita osasun-mentalari buruzko eduki eta gidak. Horrez gain, psikologo, psikiatra edota nutrizionisten kontaktuak ere aurki ditzakezue webgunean.
Bakarrik lan egiten duzu edo lan-talde baten laguntza jasotzen duzu?
Gaur egun bakarrik lan egiten dudan arren, badakit behar izatekotan aldundiko teknikarien, osasun mentaleko profesionalen edota erakundeen laguntza dudala.
Bestalde, proiektuaren hasieran programatzaileekin eta web-diseinatzaileekin aktiboki lan egiten ibili nintzen webgunea sortzeko. Izan ere, martxa teknologikoa ez da nire alorra eta laguntza behar izan nuen.
Nolakoa izan zen ekintzailetza prozesua?
Hasieran ez nekien nola ekin ezta enpresa bat nola sortu. Ikasi dudan guztia esperientziaren bidez izan da eta kasu gehienetan nire kontura ikasi dut.
Lehen esan bezala, dena Getxo Wanted lehiaketako iragarkia ikusi nuenean hasi zen. Bertan parte-hartu eta irabazi ondoren nire proiektua sortzeko ia 10.000 euroko diru laguntza jaso nuen. Horrek asko lagundu zidan.
Zer da ekitearen gauzarik zailena?
Ia gauza guztietan bezala, zailena hastea da. Izan ere, hasieran inori ez zaio zure proiektua interesatzen eta jende gutxik lagunduko zaitu edo egingo du zure alde. Horregatik, lehenengo fase hori nahiko konplikatua da. Zertaz gai zaren erakutsi behar duzu eta ordu asko lan egin behar dituzu. Gainera, zure lana interesatzen ez zaien bezero askorekin hitz egitea ere egokituko zaizu eta hori momentu batzuetan desmotibatzailea izan daiteke.
Eta garrantzitsuena?
Garrantzitsuena ondo zehaztutako plan bat edukitzea dela esango nuke, ideiak argi izatea. Horrekin batera, pertsona ekintzaileak bere buruarekiko segurtasun handia izan behar du baita ekiteko gogoak ere. Esan bezala, hasiera zaila da eta jende askok ezetz esango dizu. Horregatik da hain garrantzitsua beti aurrera jarraitzeko indarra mantentzea.
Zer da inportanteagoa, ideia berritzaile bat izatea edo ekintzailearen jarrera?
Jarrera da gauzarik garrantzitsuena. Askotan uste dugu ideia on bat daukagula eta jende guztiak baietz esango digula. Horregatik, ezetz esaten digutenean lur jota gelditzen gara. Bestalde, uste dut askotan berritzaile edota iraultzaileak diruditen ideietan galtzen garela. Ez da beharrezkoa gurpila berrasmatzea, premia bat bilatzea eta horri konponbidea ematea besterik ez dugu egin behar.
Inoiz sentitu duzu zalantzan jarri zaituztela gaztea izateagatik?
Uneoro. Osasun eta gizarte arloan lan egiten dut eta bertan 50 urtetik gorako gizon-emakume trajedunek egiten dute lan. Asko harritzen dira nire adineko gazte bat lan eremu honetan lanean ikusten dutenean.
Gaur egun, ziurgabetasun-garaiak bizi ditugu eta baliteke ekiteko unerik onena ez izatea. Zer deritzozu?
Inoiz ez da horrelako zerbait hasteko momenturik onena. Izan ere, norberaren kontura lan egitea ziurgabetasun hutsa da. Egun borobilak izan ditzakezu, egun negargarriak izan ditzakezun bezala. Azkenean, prozesu ekintzaile bat lanpostu “arrunt” bat baino askoz ezegonkorragoa da.
Hala ere, uste dut edozer gauza egin nahi baduzu hobe dela ahalik eta azkarren hastea. Beste aldetik, Covid-19ak erakutsi digu eguneratzeko eta teknologia berriak erabiltzen ikasteko momentua dela.
Porrotaren beldurrak geldiarazi eta gure helburuak ez lortzera bultza gaitzake. Ekintzaile gazte gisa, nola egin diezu aurre beldur horiei?
Beldurra denok sentitzen eta daukagun zerbait da, baina hemendik hogei urtetara zure burua nola ikusi nahi duzun pentsatu behar duzu. Zerbait berria saiatu nahi baduzu, probatu eta esperimentatu, eta txarto ateratzen bada behintzat esperientzia horretatik ikasiko duzu. Hobe da saiatzea zalantzarekin gelditzea baino.
Bukatzeko, zein aholku emango zenieke ekiteko asmoa duten gazteei?
Ez bakarrik jende gazteari, baizik eta ekiteko gogoak dituen edonori: has zaitez. Beldurrak edo zalantzak hor egongo dira beti. Ez duzu inoiz sentituko hasteko une egokia denik, beraz, has zaitez ahalik eta azkarren.
info+: www.gomutak.com
Lotutako albisteak
Alterity, robotika mugikorrarentzat eta mugikortasun elektriko arinarentzat bateriak fabrikatzen dituen enpresa bizkaitarra
Elkarteak SPRI taldearen nazioartekotze-programaren laguntza bat jaso du, eta bezeroak ditu jada Italian, Suitzan eta Herbehereetan
Sariki, metrologian liderra den ETEa: “BIND SMEk zure erronketarako soluzioak dituzten startupekin konektatzen zaitu”
Gipuzkoako ETEak 40 urte beteko ditu 2025ean, eta BIND SMEren, Eusko Jaurlaritzak sustatutako eta startupekin berrikuntza irekian jarduteko programaren, 2. edizioan parte hartu zuen
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
EatAmigo, ostalaritzako eskaerak automatizatzeko AA erabiltzen duen tresna
Gipuzkoako enpresak jatetxeekin, ostalaritza kateekin eta elikagai banaketa enpresekin egiten du lan estatu mailan, eta duela gutxi Mexikon lortu du lehen bezeroa.
Lorra, lau hamarkada inguru Bizkaiko nekazaritzako elikagaien kooperatibismoaren funtsezko zutabe gisa
Gaur egun, erakundearen lehentasuna zahartutako sektore honetako erretiroak ordezkatzea da, belaunaldi-erreleboaren bidez.
Surphasek merkatuan parekorik ez duen teknologia garatzen du eta gatzgabetzeko planten eraginkortasuna handitzea lortzen du
Donostiako ETEak, Europako Batzordearen 2,5 milioiko dirulaguntza lortuta, iragazkien egoera aurreikusten du denbora errealean; hala, geldialdi teknikoen % 60 murrizten du
Kimaiwi: “Gure proposamen teknologikoa balioztatzean eta nazioarteko turismo-industriaren aurrean proiektatzean zentratu gara”
Startup arabarrak online irtenbideak garatzen ditu turismo-sektorearentzat, eta hazkunde eta babes handia izan du bere bederatzi hilabeteko bizitzan.
WonderShop, WordPress-erako (“WP”) diseinatutako plugina, online denden jabeei katalogoen kudeaketa errazten die
Garatzen eta merkaturatzen duena WoonderSoft da. Enpresa gipuzkoarrak nazioarteko asmoak ditu eta bere produktuak interesa piztu du beste herrialde batzuetan.
NAW: “Gure abantaila lehiakorra 10 urte bitarteko kirol-oinetako minimalista eskaintzea da”
Silvia Echeverríak, NAWren sortzaileak, oinetako minimalistak postura-osasunean eta garapen biomekanikoan haurtzarotik helduarora arte nola eragin dezakeen azaltzen du.