Eusko Jaurlaritzak 50 milioi euro gehiago emango dizkio garapen teknologikoaren bitartez industria-ehundura eraldatzeko programari

Eusko Jaurlaritzak gaur onartu du Hazitek programari 50 milioi euro gehiago emateko erabakia, Euskadiko industria-ehundura garapen teknologikoaren bitartez eraldatzeko. Hortaz, programak 169 milioi euroko zuzkidura izango du, Mikel Jauregi Industria, Trantsizio Energetiko eta Jasangarritasuneko sailburuak Euskadiko ezkutu industrialaren lehenengo neurri-paketearen aurkezpenean jakinarazi zuenez. Neurri hori Industria Babesteko Taldeak egindako bileraren ondoren hartu da.

Hala, 2026ko errekorreko aurrekontuari beste 87 milioi euro gehituko zaizkio orain, gure ETEak eraldatzera eta dibertsifikatzera bideratuta. Guztira, Eusko Jaurlaritzak 277 milioi euro bideratuko ditu ETE-entzako laguntzetara; hau da, 2025eko aurrekontuarekin alderatuta, % 51,4 gehiago.

Mikel Jauregik azpimarratu duenez, “berrikuntza eta garapen teknologikoan inbertitzea funtsezkoa da gure industriak hurrengo mailara jauzi egin dezan”. Industriako sailburuaren iritziz, “ziurgabetasun une hauetan, gure industriari lagundu nahi diogu berrikuntzaren aldeko apustuan, bere produktuak bereizteko eta lehiakortasunean eta erresilientzian irabazteko”.

Proiektu eraldatzaileak, estrategikoak eta lehiakorrak bultzatzeko

Programa horrek proiektu eraldatzaileak, estrategikoak eta lehiakorrak garatzea sustatzen du, betiere ikerketa industrialekoak, garapen esperimentalekoak eta/edo entseguen eta esperimentazioaren azpiegituretakoak, enpresa-sektorekoak eta Euskadi 2030 Industria Planean ezarritako lehentasunezko arlo eta sektoreetakoak badira.

Deialdiaren zenbateko osotik 47 milioi euro proiektu lehiakorrak finantzatzeko erabiltzen dira (4 milioi euroko hazkundea izan du), 70 milioi euro proiektu estrategikoak finantzatzeko (20ko hazkundea) eta 52 milioi euro proiektu eraldatzaileentzat (hasierakoaren bikoitza).

Diruz lagundu daitezkeen proiektu mota hauei laguntzea du helburu programak:

• Proiektu Eraldatzaileak (52 milioi euro)

Ikerketa industrialeko, garapen esperimentaleko, entseguak eta esperimentazio eraldatzaileak egiteko azpiegiturak erosteko eta haien ezaugarri eta bereizgarriengatik desberdinak eta berdingabeak diren proiektuak lagundu daitezke diruz, Euskadi 2030 Industria Planaren lehentasun estrategikoekin bat baldin badatoz eta IRABAZI eta HAZI sektore estrategikoen lehiakortasuna eta Euskadik potentzia industrial berritzaile gisa duen irudia hobetzen baldin badituzte.

Euskadin inpaktu ekonomiko eta estrategiko handia duen lidergo industrialean oinarritzen dira proiektu eraldatzaile horiek, eta inpaktu adierazgarria dute Euskadiko ekonomian, 20 milioi €-tik gorako inbertsioekin eta kostu operatiboekin. Halaber, proiektu horiek kalitatezko enplegua sortzen dute, enpresa-ehundura indartzen dute edo inbertsioak erakartzen dituzte.

Proiektu eraldatzaileek balio-kate osoan zehar trakzio-efektuak sortzeko edo enpresekin eta beste sektore batzuetako eragileekin zeharkako sinergiak sortzeko gaitasuna dute, eta Klusterren Erakunde Dinamizatzaileen (ODC) laguntza jasotzen dute, egiturazko eraldaketak sustatzeko ikuspegi integralaren eta elkarren artean konektatutakoaren bitartez.

Proiektu eraldatzaileek berrikuntza maila altua dute haien arloko teknologiaren edo ezagutzaren uneko egoerari dagokionez, eta Zientzia, Teknologia eta Berrikuntzaren Euskal Sareko eragileekin jarduten dute, sektorean edo xede-merkatuan potentzial eraldatzailea izango duten soluzioak sortzeko.

Era berean, diruz lagunduko dira I+Gko jarduerak, produktu, prozesu edo zerbitzu berriak edo hobeak lortzeko baliagarriak diren ezagutza berriak sortzera bideratutako proiektu eraldatzaileen saiakuntza- eta esperimentazio-azpiegiturak eskuratzea, eta izaera eraldatzaileko teknologia berriak integratzea, patente berriak sortzea eta oinarri zientifiko-teknologikoko enpresak (startupak).

 Proiektu Estrategikoak (70 milioi euro)

 Diruz lagundu daitezke Euskadi 2030 Industria Planean ezarritako sektore estrategikoen barruan sartzen diren ikerketa industrialeko edo garapen esperimental estrategikoko proiektuak, Ikerketaren eta Garapen Teknologikoaren eta Berrikuntzaren arloan lankidetza publiko-pribatua sustatzen baldin badute, eta Euskadiko ekonomian trakzio-efektua baldin badute, ETEen esku-hartzea eta Horizon Europe Programarako sarbidea sustatuz.

Horrela, produktu, prozesu edo zerbitzu berriak edo hobeak lortzeko erabilgarriak diren ezagutza berriak sortzera begirako I+G+b arloko jarduerak, eta ezaugarri estrategikoa duten teknologia berriak integratzeko eta oinarri zientifiko-teknologikoa duten patente eta enpresa berriak (startupak) sortzeko jarduerak ere lagunduko dira. Hori guztia enplegua sortzera, euskal enpresa-ehundura dibertsifikatzera, eta enpresa-lehiakortasuna hobetzera bideratuta dago.

• Proiektu Lehiakorrak (47 milioi euro)

I+Gren arloko proiektu lehiakorrak dira produktu, prozesu edo zerbitzu berriak garatzeko edo dagoeneko existitzen direnak nabarmen hobetzeko ikerketa industrialeko edo garapen esperimentaleko proiektuak.