Euskadik presentzia indartu du Europako Batzordearen Industrial Forum foroan
Eusko Jaurlaritzak, SPRIren bitartez, Industrial Forumen 10. osoko bileran parte hartu du Bruselan, Europako Batzordeko Barne Merkatuaren, Industriaren, Ekintzailetzaren eta ETE-en Zuzendaritza Nagusiak antolatuta, Vanguard Initiativa Europako eskualdeen sarearen ordezkari gisa. Cristina Oyón, SPRIko zuzendari ondokoa, izan da Euskadiren ordezkaria bileran.
Jardunaldian zehar, Europako industria-politikaren etorkizunerako funtsezkoak diren gai estrategikoak jorratu dira. Lehenik eta behin, European Competitiveness Fund (ECF) delakoaren proposamena eztabaidatu da. Aurrekontu-tresna berri horrek 409.000 milioi euro finkatuko ditu industria-lehiakortasunari laguntzeko, bereziki sektore estrategikoetan eta ETE-etan.
Halaber, kontratazio publikoaren sistema inbertsio-tresna eraginkor, iraunkor eta Europako helburuekin lerrokatu bihurtzeko moduari buruzko gogoeta egin dute. Azkenik, “Apply AI” estrategia aurkeztu da, Europako industrian adimen artifiziala eta robotikoa bizkortzea helburu duena, enpresa txiki eta ertainei arreta berezia eskainiz.
Saioan, “Recommendations and working principles for the Industrial Forum 2.0″ dokumentua aurkeztu dute, Foroaren hurrengo ziklorako (2026 – 2029) proposamenak jasotzen dituena. Plataforma hori industriaren, ikerketaren eta Europako erakundeen arteko elkarrizketarako gune egituratu gisa sendotzea da helburua, Europan lehiakortasuna, berrikuntza eta industria-hazkundea bultzatuko duten politikak elkarrekin diseinatzeko.
Hona hemen gomendio aipagarrienak:
- Foroa industria-politikak egiteko tresna nagusia dela aitortzea.
- Lan-plan bat ezartzea, aldizkako bilerak eta kontsulta azkarreko mekanismoak dituena.
- Politika industrialen koherentzia bultzatuko duen parte-hartze instituzional aktiboa eta zeharkakoa sustatzea.
- Praktika inklusiboak indartzea eta gaikako lantalde berriak sortzea.
Bilera amaitzean, CECIMO, EIT Manufacturing, Vanguard Initiative, VTT eta Orgalim dokumentuaren sinatzaile diren erakundeek Industrial Forum 2.0 sendoagoa sortzea eskatu dute, Europako industria-politiken definizioan eragin eta eragiteko gaitasun handiagoa izango duena.
SPRIren bidez parte hartuta, Euskadik berretsi egiten du Europan industriaren etorkizunari buruz egiten diren eztabaidetan aktore aktibo gisa duen eginkizuna, bai eta politika berritzaileagoak eta industria-eraldaketaren erronkekin koherenteak diren politikak definitzeko inplikazioa ere.
Dokumentu osoa HEMEN kontsulta dezakezu.
