Recgas, liderra gas-instalazioetarako ekipamenduaren fabrikazioan
1999an, Iñaki Berasaluzek eta Luis Ignacio Olaecheak Recgas sortu zuten. Enpresa bizkaitarrak gaserako ekipamenduak fabrikatzen ditu, hala nola erreguladoreak, segurtasun-balbulak, PE/Metal trantsizioak, iragazkiak, gas-neurgailuetarako osagarriak eta gehiegizko fluxu-balbulak. Etxeko eta merkataritzako sektoreetan lan egiten du, etxe partikularrei zein tamaina askotako negozio eta enpresei irtenbide espezializatuak eskaintzeko.
2000. urtean hasi zen bere produktuak merkaturatzen, AENORren N marka ziurtagiria lortu ondoren, “produktua Espainian saltzeko ezinbesteko baldintza”, azaldu du Lander Berasaluze salmenta-zuzendariak. Bi urte eta gero, 2002an, ‘ISO-9001 enpresa-erregistroa’ lortu zuen, “ekoizpen-prozesuaren kalitatea egiaztatzen duena”. 2008tik, enpresak Berasaluze familia du buru, bigarren belaunaldiak ordezkatuta.
Instalazioak Alonsotegin (Bizkaia) daude, eta 1.000 metro karratu baino gehiagoko azalera dute. Bertan, gaserako 300.000 ekipamendu-unitate baino gehiago egiten ditu urtean, eta mundu osoan banatzen ditu. Bere lantaldea hainbat arlotako 20 profesionalek baino gehiagok osatzen dute; horrela, “kalitatezko piezak eskaintzeko konpromisoa betetzen dugu”, azpimarratu du salmenta-zuzendariak.
Merkatu iberikoan Recgasek %50etik gorako merkatu-kuota du. “Horrek Espainiako eta Portugaleko lider bihurtzen gaitu”, adierazi du Lander Berasaluzek. Baina bere jarduera ez da penintsulara mugatzen. Europan (Bulgaria), Asian (Hego Korea, Saudi Arabia edo Indonesia) eta Latinoamerikan (Kolonbia, Mexiko edo Peru) hedatutako bezero-zorroa du.
Bizkaiko enpresak beti izan du helburu bera: gas energetikoak kontrolatzeko ekipoak fabrikatzea. Orain arte jatorri fosileko gasak ziren, gas naturala eta propanoa esaterako, baina orain biometanoa edo hidrogenoa bezalako gas berdeekin lan egiten du. “Zabaltzen jarraitu nahi dugu, eta munduan zehar merkatu gehiagotan lan egin”, dio Lander Berasaluzek.
Etorkizunari begira, Recgasek hainbat proiektu ditu buruan. “Produktu berriak garatzen ari gara, eta industria-eremurako gailuak fabrikatzeko dugun gaitasuna handitzea espero dugu”, ondorioztatu du salmenta-zuzendariak.
Euskal enpresen nazioarteko proiektuak bultzatzea da SPRI Taldearen helburuetako bat; izan ere, Basque Trade and Investment Nazioartekotzeko Euskal Agentziaren bidez, leihatila bakarraren bidez bere baliabide eta laguntza guztiak jartzen ditu enpresen eskura, adibidez Elkartu, Gauzatu edo BEINT eta Global Training Bekak.
