Oroik bere hazkundea Erdialdeko Europan sustatzen du Kaleido VR erosita
Donostiako Oroi enpresak, sektore soziosanitariorako errealitate hedatuko soluzioetan espezializatuak (XR), nazioarteko hazkunde-estrategian beste aurrerapauso bat eman du, egoitza Txekiar Errepublikan duen Kaleido VR konpainia erosita. Hedapen horrekin, Oroik bere hazkundea bizkortu du Erdialdeko Europan, eta bere bezero-sarea zabaldu du, 1.000 baino gehiago izateraino gizarte-, osasun- eta asistentzia-arloetan.
“Erosketa hau oso urrats garrantzitsua da guretzat. Tamainaz handitzeaz gain, gizarte-esparrurako soluzio teknologikoetan Europako erreferentziazko plataforma gisa dugun lekua indartu dugu”, azaldu du Jorge Maylinek, Oroi-ko CEOak. Gipuzkoako enpresaren hirugarren operazio korporatiboa da, FeelU Frantzian (2024) eta VR Pharma Espainian (2025) integratu ostean.
Kaleido VRren integrazioak gaitasun teknologiko berriak eta Txekiar Errepublika, Alemania eta Eslovakia bezalako merkatuen tokiko ezagutza sakona eskaintzen du. Txekiar konpainiak garatzen dituen irtenbide terapeutikoei eta zaintzakoei errealitate birtualean oinarritutako prestakuntza-programak gehitu zaizkie, eta, hala, Oroiren eskaintza eta gizarte- eta hezkuntza-sektorearen behar berriei erantzuteko gaitasuna handitu dira.
Enpresa gipuzkoarrak lehendik ere bazuen nolabaiteko jarduera Alemanian edo Suitzan, baina erosketa hori lehen ezarpen sendoa da eskualdean, eta aukera ematen dio bere eragina eta presentzia komertziala azkarrago handitzeko.
Konpainiak gaur egun Espainian, Frantzian, Belgikan eta Erdialdeko Europan jarduten du, eta banatzaileak ditu Estatu Batuetan eta Australian. Hazkunde progresibo eta jasangarrian oinarritutako ibilbide-orria du, garapen propioa eta eskuratze estrategikoak konbinatuz. Azken urteetan, Oroik % 170 inguruko fakturazio-igoera izan du, sendotze-fasean dagoen merkatuetan.
Nazioartekotze-prozesu horretan, erakundeen laguntza funtsezkoa izan da. “Merkatu berri batean murgiltzen garenean, askotan falta zaigu tokiko ezagutza, kontaktuak edo erreferentzia onak dituen lege-aholkularitza. Alde horretatik, SPRIren eta Basque Trade & Investmenten laguntza ezinbestekoa izan da”, azpimarratu du CEOak. Oroi-ren asmoa, etorkizunean, bere plataforma eta edukiak sendotzea da, eta potentzial teknologiko eta demografiko handia duten beste herrialde batzuetara hedatzea, hala nola Erresuma Batura, Eskandinaviako herrialdeetara edo Ipar Amerikara.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
