Ikermanek bere 25. urteurrena ospatu du enpresaren hedapenean oinarrituta

Ikerman ingeniaritza-enpresa Gasteizen kokatuta dago, eta makina bereziak diseinatzen eta fabrikatzen ditu. Neurrira egindako soluzioak eskaintzen ditu, bezero eta sektore bakoitzaren beharretara egokituta. Proiektuak garatzen ditu, operazio zehatzetarako banakako makina espezifikoetatik fabrikazio-lerro automatizatuetara eta lan-zelula autonomoetara. Aurten, 2025ean, bere 25. urteurrena betetzen du. 

Malgutasun horri esker, askotariko bezeroak ditu, sektore hauetan: automobilgintza, aeronautika, urratzaileak, kautxua, lerro zuria, eraikuntza, enbalajea, defentsa, meatzaritza, mantentze-lanak eta garraioa. Bere proiektu garrantzitsuenen artean, urratzaileetako ekoizpen-prozesuen automatizazioa, tamaina handiko artezgailuetako barra-karga automatizatua, artezketa-harrien saiakuntzarako biraketa-makina edo pneumatikoen fabrikazio-prozesurako instalazioak nabarmentzen dira. 

Berrikuntza da Ikermanen sustatzaileetako bat. Bezeroen lehiakortasuna hobetzeko eta eboluzionatzen ari den merkatura egokitzeko soluzio berriak etengabe bilatzeko lan egiten du konpainiak. Izan ere, helburu horrekin, SPRI Taldearen hainbat programatan parte hartu du, hala nola Renove Maquinaria, Industria Digitala eta Zibersegurtasun Enpresariala programetan, eta oso emaitza onak lortu ditu. 

Gaur egun, hiru bazkidek eta zortzi langile espezializatuk osatutako taldea du Ikermanek. Bere bezeroak bertakoak dira batez ere, baina automobilgintzarako instalazioetako makineria hornitzailea da Brasil, Mexiko, AEB, Finlandia, India edo Txinan, besteak beste. Enpresak nazioartekotzea indartu nahi du, eta bere zorroa merkatu estrategikoetan zabaldu. Etorkizuneko planen artean, makineria aurreratuagoa eta 3D inprimaketa bezalako teknologiak txertatzea dago, barne-fabrikazioko gaitasuna hobetzeko eta lehia-abantailari eusteko. 

Euskal enpresen nazioarteko proiektuak bultzatzea da SPRI Taldearen helburuetako bat; izan ere, Basque Trade and Investment Nazioartekotzeko Euskal Agentziaren bidez, leihatila bakarraren bidez bere baliabide eta laguntza guztiak jartzen ditu enpresen eskura, adibidez Elkartu, Gauzatu edo BEINT eta Global Training Bekak.   

SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.