Euskadik WOMEX proiektuaren baitan egindako ETE esportatzaileetan emakumeen parte-hartzeari buruz egindako azterketa aurkeztu du Hungarian

WOMEX – The role of women in the competitiveness of exporting SMEs Europako proiektuak genero-berdintasuna politika publikoetan eta Europako ETEen nazioarteko lehiakortasuna sustatzen duten zerbitzuetan txertatzeko helburuarekin prestatutako ibilbide-orrian aurrera jarraitzen du. Helburu horrekin, Hungariako Pécs hirian egin da orain gutxi proiektuaren Interregional Policy Learning Event (IPLE) izeneko hirugarren topaketa. Nazioarteko jardunaldi horrek aukera eman du Europako ETE esportatzaileetan emakumeek duten parte-hartzearen inguruko azterketa konparatua sendotzeko. 

Topaketan hainbat lurraldetako bazkideek eta haien eskualde-ekosistemetako ordezkariek parte hartu zuten. Horien artean izan zen Basque Trade & Investment (BasqueTrade), SPRI Taldean integratutako Euskadiko enpresen nazioartekotze-agentzia, Euskadiren ordezkari gisa.

Lan-saioetan, parte hartu zuten lurralde guztiek egindako eskualde- mailako azterketen emaitzak partekatu zituzten. Ondorioetan agerian geratu zen eskualdeen artean desberdintasun ekonomiko eta sektorialak egon arren, oraindik ere nazioarteko jarduera duten enpresetan emakumeek lidergo-postuetara iristeko orduan erronka komunak eta zeharkakoak dituztela.

Euskadiko ondorioak

Lankidetzako esparru horretan, BasqueTradek Euskadiko ETE esportatzaileetan emakumeen ibilbide profesionalari buruz modu espezifikoan egindako azterlanaren ondorio nagusiak aurkeztu zituen. Aurkezpenean nabarmendutako alderdien artean, honako hauek daude:

• Nazioartekotzearen inpaktua: atzerriko merkatuetara irekitzea da emakumeen garapen profesionalerako aukera berriak sortzen dituen faktore nagusia eta horrek enpresa-ingurune anitzagoak eta lehiakorragoak sustatzen ditu.
• Erronka estrukturalak: ardura handiko postuetara iristea oraindik zailtzen duten hainbat baldintzatzaile identifikatu dira, bereziki esparru hauetan: kontziliazioa, eragin-sareetarako sarbidea eta genero-estereotipoek bizirik jarraitzea.
• Hobetzeko estrategiak: egoera horri aurre egiteko, sentsibilizazioa indartzearen eta berdintasun-politiken benetako aplikazioa bermatzearen garrantzia azpimarratu da. Era berean, erreferente eta jardunbide egokiei ikusgarritasuna eman behar zaiela nabarmendu da, epe luzeko ikuspegi estrategikoaren barruan.

Europa mailako benchmarka

Ekitaldiaren agendan emakumeek zuzendaritza-postuetara iristea mugatzen duten arrazoi kulturalak aztertzeko lantegia ere egin zen. Bertan, besteak beste, honelako fenomenoak izan ziren hizpide: “kristalezko sabaia” eta “zementuzko sabaia”. Topaketan, gainera, Europako hainbat enpresatan arrakastaz ezarritako neurriak aztertu ziren, hala nola: Inklusio-protokoloak, malgutasun-politikak eta talentua garatzeko ekintza espezifikoak.

Hungarian bildutako ekarpen guztiak WOMEX proiektuak gaur egun prestatzen ari den eskualdeen arteko benchmark edo azterketa konparatiboa egiteko erabiliko dira. Horren guztiaren azken helburua da emakumeen talentua nazioartekotze-estrategietan modu eraginkorrean txertatuz haien lehiakortasuna hobetuko duten tresnak eskaintzea ETEei.