Euskadik sendotu egin ditu Txina eta Turkiarekin dituen harreman komertzialak
SPRI Taldean sartuta dauden euskal enpresak nazioartera zabaltzeko elkartea den Basque Trade & Investment-ek (BT&I),, hainbat ekintza egin ditu urtean zehar merkataritza-harremanak indartzeko eta Euskadiren eta Txina eta Turkia bezalako herrialde estrategikoen arteko nazioarteko lankidetza sustatzeko.
Ildo horretatik, azken bi asteetan bi bilera nabarmen izan ditu Txinako Herri Errepublikak Espainian dituen ordezkariekin eta Turkiako enbaxadarekin, merkatu horietan euskal enpresentzat negozio-aukerak sendotu eta zabaltzeko asmoz.
Lehen bilera maiatzaren 3an izan zen, Txinako Herri Errepublikaren enbaxadarekin, eta Chang Hexi Ekonomia eta Merkataritza Gaietarako sailburuak eta Tong Meng agregatu komertzialak parte hartu zuten.
Bi eskualdeen arteko harreman komertzial garrantzitsua dela eta, topaketa funtsezkoa izan zen Euskadiren eta Txinaren arteko lankidetza indartzeko. Txina bazkide komertzial garrantzitsua da Euskadirentzat, eta 3. postuan dago euskal enpresa gehien dauden herrialdeen zerrendan 112 ekoizpen-instalazio eta 116 merkataritza-bulegorekin. Guztira, EAEko 228 instalazio eta bulego daude Asiako herriade honetan, eta EAEko 146 enpresa ordezkatzen dituzte, batez ere fabrikazio aurreratuaren, automatizazioaren eta energiaren sektoreetan.
Jardunaldian, alde biko harremanean interesgarriak diren hainbat gai landu ziren, besteak beste, Ulermen Memoranduma (MoU, ingelesezko siglengatik), Euskadik Jiangsu eskualdearekin abendutik duen gai bat, iraunkortasunaren eta hezkuntzaren arloetan aukera berriak aztertzeko.
BT&I-k Turkiarekin duen harremana ere aztertu du berriki, euskal esportazioetarako garrantzi estrategiko handiko merkatua baita, bereziki automozioaren eta fabrikazio aurreratuaren sektoreetan.
Apirilaren 29an Turkiako Enbaxadarekin egindako bileran, Euskadiren eta Asiako herrialdearen arteko harremanaren egungo egoera aztertu zen, hainbat ordezkari instituzionalen partaidetzarekin, hala nola Nüket Küçükel Ezbercienbaxadorearena eta Nur Alkış lehen kontseilariarena.
Turkiak euskal enpresen 33 lantegi eta bulego ditu, batez ere Istanbulen eta Marmara eskualdean, eta 23 euskal enpresa ordezkatzen ditu automobilgintza, fabrikazio aurreratua eta trenbide sektoreetan. Turkian ezarritako euskal enpresa horietako hiru bileran izan ziren eta beren esperientzia partekatu zuten.
Harreman komertzial horretan izandako azken aurrerapenak ere azaldu ziren; esaterako, martxoan Esmirna eskualdearekin berretsitako MoUa.
“Akordio honek lotura ekonomikoak hobetzeko eta elkarren intereseko arloetan lankidetza sustatzeko plataforma egituratu bat eskaintzen du, hala nola energian, teknologia berdeetan, 4.0 industrian eta Smart Citie-etan, gure lurraldeen eta enpresen arteko lankidetzarako aukera izugarriak eskaintzen baitituzte”, adierazi zuen enbaxadoreak.
