Euskadik ‘powertrain’ teknologia aurreratuetan nazioartean duen presentzia bultzatu du Detroiten
Euskadik nazioarteko misio batean parte hartu du Ameriketako Estatu Batuetako Detroit hirian, Michigan estatuan, “powertrain” teknologia aurreratuak jorratzeko, eta , ICE, (P)HEV eta BEV sistemak hartu dira barne. Mugikortasun aurreratuaren esparruan euskal ekosistema industrialaren kokapena indartzera bideratutako topaketa honek aukera eman du Europako beste erreferentziazko polo batzuekin harremanak estutzeko, besteak beste, Belgika, Bavaria eta Austria Garaia, eta industria-berrikuntzan aitzindari diren Europako 16 enpresa bildu ditu orotara.
AutomotiveTech Belgium-ek bultzatu du ekimena, eta erakunde estrategiko hauen laguntza izan du bertan antolatu eta garatzeko: Bayern Innovarial, Automobil Cluster Upper Austria, Flanders Investment & Trade, Detroit Regional Partnership eta Basque Trade & Investment (BasqueTrade), SPRI Taldean integratutako euskal enpresak nazioartekotzeko agentzia.
Topaketa honetako euskal ordezkaritzari dagokionez, Gaindu, Loramendi eta Aurrenak enpresek parte hartu dute, eta arrakastaz erakutsi dute Euskadiko industria-sarearen gaitasun teknologikoak, egungo automozio-sektorearen eraldaketarako kritikoak diren arloetan.
Merkatuaren aurrerapenak eta erronkak
Lan-jardunaldietan, abangoardiako diziplinei lotutako azken aurrerapenak eta merkatuaren erronkak partekatu dira, esaterako, potentzia-elektronika, kudeaketa termikoa, testing-a, bai eta industrializazioa, automatizazioa eta fabrikazio aurreratua ere.
Ildo honetan, misioaren programa bere ikuspegi praktiko eta komertzialagatik nabarmendu da, balio estrategiko handiko agenda bat eskaini baitu Ipar Amerikako merkatuan. Zehazki, jardunaldiek, tech showcaseak, B2B negozio-topaketak eta zuzeneko benchmarking teknologikoko saioak barne hartu ditu munduko korporazio handietako (hala nola Ford, General Motors, Magna, Valeo, BorgWarner eta Nissan) erosketa-, ingeniaritza- eta berrikuntza-arloetako arduradun nagusiekin.
Horrez gain, Caresoft Global enpresa espezializatuarekin egindako bisiten eta analisi teknikoko saioen bidez osatu da eskualdeko jarduera.
Ekintza horien bidez, BasqueTrade-k euskal enpresak automozioko hub global nagusiekin konektatzeko eta sektoreari laguntzeko duen konpromisoa berresten du, mugikortasun aurreratuaren esparruan nazioarteko lankidetzarako aukera berriak azkartuz eta sendotuz.
