AEBek sistema digital berria aktibatu dute enpresa esportatzaileei muga-zergen itzulketa arintzeko
Estatu Batuetako Aduana eta Mugak Babesteko Bulegoak (CBP, ingeleseko sigletan) mekanismo operatibo berri baten aktibazioa iragarri du: CAPE (Consolidated Administration and Processing of Entries). Tresna Nazioarteko Larrialdiko Ahalmen Ekonomikoen Legearen (IEEPA) harira ezarritako muga-zergen itzulketa errazteko diseinatu da. Datorren apirilaren 20an jarriko da martxan, eta, horri esker, enpresek modu taldekatuan kudeatu ahal izango dituzte orain arte banaka izapidetu behar zituzten itzulketa-eskaera ugariak.
Prozedura operatibo berria ACE (Automated Commercial Environment) atari elektronikoaren bidez bideratuko da, eta, bertan, interesdunek aitorpen digital bat aurkeztu beharko dute CSV formatuko datu-fitxategiak erabiliz. Hala ere, AEBko araudia oso zorrotza da izapide hori egiteko legitimazioari dagokionez; izan ere, sarbidea Erregistroko Inportatzaileari (IOR), salgaiak herrialdean sartzearen arduradun gisa ofizialki agertzen den erakundeari, edo jatorrizko eragiketak kudeatu zituen aduana-agenteari (customs broker) baino ez zaio baimenduko.
Estatu Batuetan presentzia fisiko propiorik gabe jarduten duen euskal enpresa-sarearentzat, egitura horrek esan nahi du jarduteko biderik arinena helmugetako aduana-ordezkariekin zuzenean koordinatzea izango dela, horiek baitute gobernu-plataforman jarduteko gaitasun teknikoa.
Eragiketen irismenari dagokionez, CAPE sistema aduana-zikloko egoera oso zehatzetara mugatzen da hasierako fase honetan. Alde batetik, likidatu gabeko inportazioak sartzen dira, aduanaren behin betiko ebazpenaren zain daudenak. Bestetik, duela gutxi likidatutako eragiketei atea irekitzen zaie, betiere itxiera administratibotik 80 egun natural baino gehiago igaro ez badira. Itzulketa bakoitzaren hautagarritasuna bidalketa bakoitzerako banan-banan zehazten da eta ez esportazio-data orokorren bidez, beraz, ezinbestekoa da muga-zergen partida bakoitzaren egoeraren jarraipen tekniko zehatza egitea eskaeraren arrakasta ziurtatzeko.
Euskal enpresentzako inplikazioak
Agertoki berri horren aurrean, Basque Trade & Investment (BasqueTrade), SPRI Taldean integratutako euskal enpresak nazioartekotzeko agentziak, bakoitzaren eredu logistikoaren eta komertzialaren arabera egoera zein den aztertzeko gomendatu die Euskadiko enpresa esportatzaileei.
DDP baldintzetan saltzen duten enpresek (ordaindutako eskubideak dituzten entregak) inportatzaile arduradun gisa jarduten dute normalean, eta, beraz, AEBetan dituzten agenteekin egiaztatu behar dute itzulketarako sarrera egokiak daudela eta beharrezko dokumentazio teknikoa prestatu behar dute. Aitzitik, bezero estatubatuarrak inportatzaile gisa jarduten duen kasuetan, euskal enpresak izapidea zuzenean kudeatu ezin duen arren bere bazkide komertzialei erraztasun berri horri buruzko informazioa emateko aukera du, batez ere muga-zergen kostuek iraganean beren prezioen lehiakortasunean eragina izan bazuten.
