Euskadik itsas teknologiaren eta offshore energiaren arloko talentuaren prestaketa abiatu du
Ikastaro berri batek prestakuntza integrala eskaintzen du Euskadiko itsas-industriaren sektorearen egungo eta etorkizuneko erronkei aurre egiteko: urrian Euskal Itsas Foroak, Bilboko Ingeniaritza Eskolarekin (EHU) eta enpresa bazkideekin lankidetzan, Offshore Itsas Teknologiari eta Energiari buruzko prestakuntza berritzailea jarri zuen abian.
Bi hilabeteko iraupena duelarik, ekimenak Euskadiko itsas-industria ekosistema indartu nahi du, ezagutza tekniko aurreratuak eta ikuspegi praktiko bat konbinatuz, bai jardunean dauden langileei, bai sektorean esperientzia dutenei edo lehen aldiz hurbiltzen diren profesionalei zuzenduta.
Ikastaro honek itsasontzien operazio eta mantentze oinarriak eta sortzen ari diren teknologiei buruzko ezagutzak barne hartzen ditu, esaterako hidrogeno bidezko propultsioa. Horrela, ikasleek sektoreko erronka operatibo, arauemaile eta teknologikoei aurre egiteko beharrezkoak diren gaitasun guztiak eskuratuko dituzte, berrikuntzan eta jasangarritasunean arreta jarriz.
Itsas sektorea Euskadiko garapen ekonomiko eta sozialerako funtsezkoa da, eta goi-mailako prestakuntza operatibo espezializatua duten profesionalak behar ditu. Horregatik, ikastaro honek itsasontzien oinarrizko ingeniaritzari buruzko irakaskuntza integrala erakusteaz gain, sektoreari aplika dakizkiokeen nazioarteko araudien ulermen praktikoa eskaintzen du, eta parte-hartzaileei nabigazioari eta erregai alternatiboei buruzko oinarrizko ezagutzak ematen dizkie.
Ikastaro honekin batera, Euskal Itsas Foroak talentuarentzat atari berri bat bultzatu du. Plataforma digital bat da, itsas industriaren barruko lan-eskaintzak bistaratzen dituena, eta honako helburu hauek betetzen dituena: langile kualifikatuen eskaera handiari erantzutea, sektore estrategiko honek Euskadirentzat gaur egun duen lehiakortasuna aberastea eta enpresen eta profesional kualifikatuen arteko konexioa erraztea.
SPRI Taldeak laguntza ematen dio euskal enpresari, laguntza-programen bidez, trantsizio teknologiko-digitala, energetiko-ingurumen-trantsizioa eta gizarte- eta osasun-trantsizioa errazteko. Aurkitu zure negozioaren beharretara hobekien egokitzen den programa.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
