Surphasek teknologia aurreratua garatzen du ura gezatzeko eta tratatzeko prozesuak optimizatzeko
Surphasek teknologia aurreratua garatzen du mintzetan oinarritutako prozesu industrialak optimizatzeko, batez ere gezatzearen eta uraren tratamenduaren arloan. Enpresa Euskal Herriko Unibertsitateko spin-off gisa bezala sortu zen, gainazalen zientzian, material aurreratuetan eta mintzen teknologietan hainbat urtez ikertzen aritu ondoren.
Konpainiak behar argi bat hauteman zuen uraren, bioteknologiaren edo industria kimikoaren sektoreetan, non zikintze-arazoek eta energia-kontsumo handiak zuzenean eragiten baitiote prozesuen eraginkortasunari. “Gure ikuspegia beti izan da ikerketaren eta aplikazio industrialaren arteko arrakala ixtea, jasangarritasunean eta lehiakortasunean benetako eragina duen teknologia baten bidez”, azaldu du Iliane Rafaniello Surphaseko CEO eta sortzaileetako batek.
Prozesu industrialak optimizatzeko teknologia
Enpresak garatutako teknologia sentsore aurreratuetan oinarritutako gailu bat da, prozesu industrialetan erabiltzen diren mintzen egoera denbora errealean monitorizatzeko gai dena. Sistemak zikinkeriaren metaketa detektatzen du, eta garbiketen eraginkortasuna ebaluatzen du, algoritmo iragarleekin datuak kudeatzeko eta bistaratzeko plataforma bati konektatutako soluzio ez-inbaditzaile baten bidez.
Teknologia honi esker, instalazioek aurrea har diezaiekete zikintze-gertaerei, instalazioaren errendimenduari eragin aurretik. “Instalazioen operazioa optimizatzen laguntzen dugu, eta energia- eta mantentze-kostuak murrizten”, adierazi du Rafaniellok. Enpresak nabarmentzen duenez, mintzen balio-bizitza % 10 eta % 20 bitartean handitzea, energia-kontsumoa % 10 inguru murriztea eta garbiketako produktu kimikoen erabilera % 25eraino murriztea ahalbidetzen du sistemak.
Gaur egun, uraren sektoreak eta ur industrialaren gezatzearekin eta tratamenduarekin lotutako enpresek piztu dute teknologia horrekiko interes handiena. Hala ere, Surphasek petrokimika, elikadura eta edariak edo industria-prozesu aurreratuak bezalako industrietarako aplikazioetan ere lan egiten du. “Gure teknologiaren indarguneetako bat da moldakortasuna eta hainbat industria-ingurunetara egokitzeko gaitasuna”, dio Rafaniellok.
Konpainiaren erronka nagusietako bat zientzia-arloan sortutako teknologia industriarako irtenbide sendo eta bideragarri bihurtzea izan da. Prozesu horretan, ikerketa, ingeniaritza, industrializazioa eta baliozkotzea konbinatu behar izan dira operazio-ingurune errealetan.
Surphase-ren teknologiaren garapenean, jasangarritasuna funtsezkoa da. Enpresak energia-kontsumoa murriztu, produktu kimikoen erabilera minimizatu eta baliabideetan intentsiboak diren industria-prozesuen eraginkortasuna handitu nahi du. “Gure kasuan, jasangarritasuna eta berrikuntza teknologikoa guztiz eskutik doaz”, nabarmendu du Rafaniellok.
Surphasek SPRIk eta beste erakunde batzuek sustatutako enpresen berrikuntzarako eta garapenerako programa publiko batzuen laguntza izan du, eta Merkataritza Ganberaren laguntza ere izan du nazioartekotzeko lehen ekintzetan. Gainera, EIC Accelerator Europako Programan hautatu dute enpresa, eta 2,5 milioi euroko diru-laguntza eman dio teknologiaren industria- eta merkataritza-eskalatzea bizkortzeko.
Etorkizunari begira, gatzgabetze-sektoreko enpresa nazional eta nazioartekoetan lehen gailu-sorta bat instalatzeko lanean ari da konpainia. Surphasek aurrera egin du ere bere teknologia merkatu estrategiko berrietara egokitzeko eta nazioartean hazteko. “Orain buru-belarri ari gara garapen zientifiko eta teknologiko guztia benetako industria-hedapen bihurtzen”, amaitu du Iliane Rafaniellok.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu. Gainera, laguntza- eta zerbitzu-programetara sar zaitezke.
