Salutak osasun mentala teknologiatik demokratizatzen duen eredu bat bultzatu du
Zer gertatuko litzateke osasun mentala osasun sistemaren azken katebegia izateari utzi eta bizitza oso baterako lehen urratsa bihurtuko balitz? Hori izan zen Salutaren jatorria markatu zuen galdera, 2019tik ongizate emozionala modu hurbil, eskuragarri eta teknologikoan zaintzea posible dela erakusten duen enpresa. Ikuspegi integral eta gizatiarrarekin, Salutak berrikuntza digitala eta arreta espezializatua uztartzen ditu, oreka mentalerako bidean milaka pertsona laguntzeko.
Iberoamerikan osasun mentala hobetzera zuzenduta, Salutak prebentzioa, jarraipena eta tratamendua barne hartzen dituen proposamen bat garatu du. Bi zutaberen bidez egiten du hori: eguneroko autozaintzarako tresnak eskaintzen dituen aplikazio bat, eta osasun mentaleko profesionalengana heltzeko aukera ematen duen telemedikuntza-plataforma bat, distantzia edozein dela ere. Egitura horri, gaur egun, algoritmo prediktiboen garapena gehitu behar zaio; algoritmo horiei esker, beharrak aurreikusi eta esku-hartzeak are gehiago pertsonalizatu ahal izango dira.
Salutaren ideia pandemiaren aurretik sortu zen, kezka zehatz batekin: Nola lortu dementzia duen adineko pertsona batek bere psikiatra edo neurologoa ikusi ahal izatea, mugitu beharrik gabe. Erantzuna telemedikuntza izan zen, ikuspegi zabalago bati bidea ireki zion tresna berritzailea orduan. Osasun krisi globala iritsi zenean, Salutaren eredua prest egoteaz gain, beharrezkoa zen. Enpresak bere zerbitzuak zabaldu, app bat kaleratu eta nazioartekotzeari ekin zion, lehenik Txilen, gero Kolonbian eta, 2024tik aurrera, Bizkaian.
Gaur egun, Salutak partikularrei zein erakundeei eskaintzen dizkie bere zerbitzuak. Plataformaren bidez zerbitzuetara zuzenean sartzen diren bezero indibidualak ditu, baina osasun-aseguruekin ere laguntzen du, pribatuekin zein publikoekin (Txilen bereziki), bai eta langileen ongizate mentala hobetu nahi duten enpresekin ere. Izan ere, gero eta konpainia gehiagok onartzen dute beren taldeen osasun emozionala zaintzeak eragin positiboa duela. “Frogatu da inbertsio mota hauek % 21 errentagarritasun handiagoa eta % 41 absentismo gutxiago dakarrela”, dio Mauricio Bonilla doktoreak, enpresako zuzendari nagusiak.
Bizkaian, adinekoen egoitzetan egin ditu lehen urratsak, eta aseguru-etxe pribatuetara hurbiltzeko prozesuan dago. Gaur egun, 20 pertsonak eta osasun mentaleko 70 profesionalek osatzen dute taldea, Txilen, Kolonbian eta Estatuan gero eta base handiagoarekin.
Bere ibilbidean zehar, Salutak lorpen garrantzitsuak izan ditu: 150.000 telekontsulta baino gehiago egin ditu; 50.000 familia baino gehiago artatu ditu, eta aintzatespen ugari jaso ditu, hala nola Bilbao Silver Lab saria 2024an, “silver economy”-n egindako proiektuagatik. Salcobrand-eko Open Innovation–en parte hartu du, eta Her Global Impact-en aintzatetsi zuten, emakumeen lidergoarekin eta osasun-arloko berrikuntzarekin duen konpromisoagatik.
SPRI Taldea RIS 3 Euskadi estrategia abian jartzen duen eragileetako bat da, energiaren, fabrikazio aurreratuaren, bio-osasunaren eta nanozientziaren arloetan espezializazio adimenduna bultzatzeko.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
