Ramiro González Arabako Ahaldun Nagusiak eta Mikel Jauregi Eusko Jaurlaritzako Industriako sailburuak Laudioko Vidrala lantegia bisitatu dute
Beirazko ontziak ekoizten dituen Laudioko Vidrala enpresa Eusko Jaurlaritzako eta Arabako Foru Aldundiko ordezkari instituzionalen elkargunea izan da gaur, Vidralak Aiarako Haranean duen egoitzan industria-berrikuntzarako egin nahi duen proiektuaren potentziala xehetasunez ezagutzeko. Plan horrek industria modu jasangarriago eta errentagarriagoan egitearen aldeko apustua egiten du, esportazioa bultzatuta eta Vidralak lurraldearen garapen industrial eta ekonomikoarekin duen konpromisoa indartuta. Vidrala Taldeak definitutako inbertsio-estrategia sakonaren parte da ekimena. Estrategia selektiboagoa izango da, eta Europako bost lantegien ekoizteko ahalmenak birdoituko ditu, baldintza hobeetan lehiatzea eskatzen duen merkatu-ingurune zorrotzagoari erantzuteko.
Eusko Jaurlaritzaren izenean, Mikel Jauregi Industria, Trantsizio Energetiko eta Jasangarritasuneko sailburuak, Andoitz Korta Industria Sustapeneko sailburuordeak eta Irantzu Allende Trantsizio Energetikoko sailburuordeak hartu dute parte bisitan. Haiekin batera, Ramiro González Arabako Ahaldun Nagusiak eta Ander Larrinaga Garapen Ekonomikoko zuzendariak ere parte hartu dute. Horiek guztiek Vidralak merkatura egokitzeko, jasangarritasunerako, energia-eraginkortasunerako eta produktibitaterako ezarritako hobekuntzak ezagutu dituzte bisita gidatuan.
Lehiakortasun jasangarria ardatz
Bigarren zatian, bisitariak Raúl Gómez Vidralaren CEOarekin, Víctor Tolosa Vidralako Europako dibisioko zuzendari nagusiarekin, Elena Gárate Administrazio eta Kontrol Finantzarioko zuzendariarekin, Galo Álvarez Jasangarritasun eta Garapen Korporatiboko zuzendariarekin, eta Joseba Fernández de Medía pertsonen zuzendariarekin bildu dira, inbertsio-planaren helburu estrategikoak eta tokiko balioa sortzeko egin duten ekarpena aztertzeko. Bileran, industriarako ardatz estrategikoak landu dituzte, besteak beste, honako hauek: energia baldintza lehiakorretan eskuratzeko premia, industria-sarea indartzeko beharrezko laguntza publikoa eta karbono gutxiko prozesuetarako trantsizioaren aldeko apustu inbertitzaile irmoa, ingurumen aldetik eraginkorragoak eta ekonomikoki errentagarriagoak izan daitezen.
Raúl Gómez Vidralaren CEOak nabarmendu duenez, “lehiakortasunari, esportatzeko gaitasunari, merkatura egokitzeari eta errentagarritasunari dagokienez erreferentziazko beira-ekoizle gisa posizionatzeko erronka hartu dugu gure gain. Beira fabrikatzen dugu, behin betiko material jasangarria eta ezin birziklagarriagoa, bai eta elikagaiak eta edariak babesteko ontzirik inerte eta osasungarriena ere, mikroplastikorik ez izateko. Pertsonak, ahalmen teknologikoa, inbertsio-anbizioa eta nazioarteko dimentsioa ditugu Europan, Erresuma Batuan eta Hego Amerikan, testuinguru ekonomiko zorrotzagoan kokatzeko, bezero handiak erakartzeko eta kontsumitzaileak gogobetetzeko. Baina lehiakortasuna behar dugu, ezinbesteko baldintza da. Eskualdeko, gizarteko eta ekonomiako aurrerapenak industria lehiakorra garatzea eskatzen du, eta ezin dugu bakarrik egin. Euskal industriari mehatxu egiten dion testuinguru nahasi honetan, gure konpromiso industriala eta enplegua bermatzekoa errealitate bihurtzeko, inbertsioa eta azpiegiturak lagundu behar ditu”.
“Euskal industria intentsiboa da energiaren erabileran, eta konpromiso publiko-pribatu bat behar du enpresen lehiakortasuna sendotzera bideratutako energia-politika garatzeko, iturri guztietan energia eskuragarria eta prezio bideragarriak bermatuta. Trantsizio berdeak energia-azpiegituran lehiakortasunean oinarritutako oinarri sendoa izan behar du. Hala ere, energia berriztagarrien garapena eta potentzia handiko sarearen elektrifikazio-prozesua oso atzeratuta geratu dira gure inguruko lehiakideekin alderatuta. Azkenaldiko gertaerek, hala nola Ukrainako gerrak edo apirileko itzalaldiak, inoiz baino argiago uzten dute agerian mezu bat: gaur falta zaigun energia lehiakorrerako sarbidea biharko oztopoa izango da. Eskerrak eman nahi dizkiegu gaur egungo erakundeei, gure inguruko lehiakideen aurrean euskal industriak aurrera egitea ahalbidetuko duten politikak garatzen emandako laguntzagatik”, adierazi du Gómezek.
Mikel Jauregi sailburuak euskal industriak deskarbonizazioaren alde egindako apustua eta horretarako enpresek dituzten behar elektrikoak baloratu nahi izan ditu. “Herrialde gisa argi dugu helburua, 2050ean zero emisio garbira iristea. Horretarako, gure industria deskarbonizatzeko erritmoa bizkortu behar dugu, aldi berean lehiakortasuna eta enplegua bermatuta. Prozesu horretan, faktore erabakigarria dugu: industriaren potentzia elektrikoaren eskaera, deskarbonizazio-prozesuei ekin ahal izateko. Arlo honetan apustu handiak egin nahi dituzten enpresak ditugu, baina ezin dira ekimen horiek egikaritu, ez baitago entxuferik, eta Vidrala da horren adibide bat, inbertsioaren eta enpleguaren aldeko apustu handia egin baitu. Euskal industriak elektrizitate-kontsumoaren % 53 hartzen du, eta, horregatik, sare elektrikoaren ahalmena eta erresilientzia handitzeko premia larria dugu. Ahalmen berriko 6.000 megawatt gehiago behar ditugu gure industriari erantzuteko, eta inbertsio argi eta iraunkorra egin behar dugu sare elektrikoa hobetzeko; hilabeteak daramatzagu Estatuarekin lan horretan, inbertsio horiek egin ahal izateko. Gure industria mehatxatzen duen botila-lepo energetikoaren aurrean, potentzia handiagoan ez inbertitzeak eta sarea ez hobetzeak arriskuan jarriko luke Euskadiko 70.000 pertsona baino gehiagoren lanpostua”.
Bere aldetik, Ramiro González Ahaldun Nagusiak nabarmendu duenez, “Vidrala Araban errotutako enpresaren adibide argia da, historian zehar garaietara egokitzen jakin duena. Gaur egun, digitalizatutako instalazioa da, eta aitzindaria da ekoizpen-prozesuetan robotika edo adimen eta ikusmen artifiziala bezalako teknologiak erabiltzen, eraginkortasuna eta lehiakortasuna handitzeko. Ingurunearekin konprometitutako enpresa, mundu osora Araba eta Aiala izena eramaten duena eta, proiektatutako inbertsioei esker, Laudion planta intsignia bat izango duena erakusteko teknologiak aplikatzeak nola lagundu dezakeen gure lurralde osoaren deskarbonizazio industrialean”.
