Preocak jasangarritasuna bultzatzen du era guztietako industria-enpresetan
Preoca Gasteizen kokatuta dago, eta enpresei ingurumen-zerbitzuak eskaintzen espezializatuta dago. Aholkularitzan, ingeniaritzan eta prestakuntzan oinarrituta, konpainiak gero eta zorrotzagoa den ingurumen-araudira egokitzen laguntzen die bezeroei, irtenbide integralak eskainiz administrazio-izapideak betetzeko edo gaitasun teknikoa lantzeko, besteak beste. Hainbat sektoretako enpresa txiki eta ertain industrialekin lan egiten du, mekanizazio-enpresak edo kimika industriak, adibidez.
“Arazo nagusia ezjakintasuna da. Enpresa askok ez dute argi zein baldintza legal bete behar dituzten”, azaldu du David Torres Preocako zuzendari teknikoak. Testuinguru horretan, azken urteotan gehien hazi den zerbitzuetako bat lege-eskakizunen identifikazioa eta segimendua da, eta hori ere funtsezkoa da ISO 14001 eta antzeko arauen ziurtagiria duten erakundeentzat.
Gainera, enpresak proiektuak diseinatzeko eta abiarazteko zerbitzuak eskaintzen ditu, baita ingurumen-baimenak, jarduera-lizentziak eta baimen sektorialak izapidetzea ere. Lan horiek dokumentazio teknikoa prestatzea, neurketak egitea eta administrazio publikoarekin, batez ere Eusko Jaurlaritzarekin, harremanak izatea dakarte. Preocaren beste zerbitzu aipagarri bat da merkantzia arriskutsuak errepidez garraiatzeko segurtasuneko aholkularitza da. Nahitaezkoa da garraiolari izan gabe hondakin edo produktu arriskutsuen bidalketa kudeatzen duten enpresentzat ere.
Prestakuntzaren arloan, Preocak online ikastaroen katalogo bat eta enpresa bakoitzaren behar zehatzetara egokitutako neurrira egindako programak konbinatzen ditu. Prestakuntza horiek bezeroaren instalazioetan nahiz campus digitalaren bidez eman daitezke, eta gai praktikoak jorratzen dituzte, hala nola larrialdiak kudeatzea edo substantzia arriskutsuak maneiatzea. “Informazioa emateaz gain, baldintza horiek nola aplikatu ere aholkatzen dugu, eta enpresaren ingurumen-behar gehienak betetzen saiatzen gara”, azpimarratu du Torresek.
Bederatzi langile ditu, eta SPRIk bultzatutako zenbait programatan ere parte hartu du, hala nola Hazinnova eta Industrial Cybersecurity programetan. Etorkizunari begira, Preoca arlo estrategiko berri batean murgilduta dago: ingurumen-zarata neurtzeko erakunde gisa akreditatzea. Urrats horri esker, enpresak balio arautzailea duten neurketak egin ahal izango ditu, eta, hala, bere zerbitzu eskaintza eta ingurumen-kontrolaren esparruan duen posizionamendua handituko ditu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
