E&M Combustión enpresak industria-erregailuak garatzen ditu deskarbonizatutako etorkizunerako
E&M Combustión Arteako (Bizkaia) enpresa bat da, eta deskarbonizatutako etorkizun industrialerako errekuntza-sistemak garatzen ditu. Instalazioak handitu ditu teknologia berriak ezartzeko, besteak beste, laser bidezko ebaketa-ekipoak eta soldadura robotizatuko zelula bat.
Enpresa 2004an sortu zuten errekuntza industrialaren sektorean ibilbide luzea zuten profesionalek, “eta hasieratik bereizketa teknologiko eta espezializatua eskaini genuen, berrikuntzaren eta jasangarritasunaren aldeko apustu garbia eginez, une horretan erantzunik ez zuten beharrizan espezializatuen nitxo garrantzitsu bat zegoela uste baikenuen”, azaldu du Iñigo Béjar González E&M Combustión-eko CEOak.
Enpresak hasieratik eskaintzen du erregailu industrialen fabrikazioa “neurrira” prototipo berritzaileen garapenarekin eta “betiere eraginkortasun energetiko handiagoa eta emisio kutsatzaileen maila txikiagoa bilatuz”.
2005ean JBM erregailuen lehen patentea erregistratu zuen, eta 2006an nazioartekotze-prozesuari ekin zion. Lehen bulegoa Txinan jarri zuen, eta, ondoren, bigarrena Indian. 2011n bere jarduera Arteako Sprilurren industrialdera lekualdatu zuen, eta 2019an hidrogenoaren sektorean sartu zen.
“Gaur egun, konpainiak errekuntzako teknologia aurreratuak garatzen ditu hidrogenoa, biogasa, biomasa eta bestelako erregai alternatiboak erabiltzeko, erregai tradizionalez gain. Mundu osoko lantegi industrialetan eta zentral termikoetan lan egiten duten errekuntza-sistemen balio-kate osoa garatzen dugu, diseinuaren eta fabrikazioaren faseetatik hasi eta martxan jarri eta zerbitzu tekniko globala eman arte”.
E&M Combustiónek segmentu estrategikoak gidatzen ditu, hala nola ATEX eta NEC erregailuak, “leherkorrak izan daitezkeen atmosferetan lan egiteko garatutako ekipamendu oso espezifikoak, hala nola findegiak, kimikakoak, petrolio- eta gas-plantak, % 100eko hidrogenozko erregailuak, biogasekin funtzionatzeko ekipoak eta hidrogeno- eta biogas-instalazio kontainerizatu osoak”.
Esportazioak % 70 dira, eta 30 herrialde baino gehiagotara iristen dira, besteak beste, petrolio eta gasaren, elikadura eta edarien, meatzaritzaren, kimikaren, energiaren sorkuntzaren eta metalurgiaren sektoreetan. “Gure hedapenaren mapak askotariko lekuak erakusten ditu, hala nola Txina, India, Indonesia, Egipto, Maroko, Estatu Batuak, Polonia, Mexiko, Txile edo Saudi Arabia eta Arabiar Emirerriak”.
I+G+b arloa da haren zutabeetako bat, eta fakturazioaren % 7 bideratzen du horretara. “Arlo horren barruan, prototipo berritzaileak garatzen ditugu, eta diseinu horiek bezeroaren beharretara egokitzeko gaitasun azkarra dugu”. Bere erregailu industrialak testatzeko instalazio multzo oso batean entseatzen dira, eta azkenik galdara eta plantetan probatzen dira produktu guztiz fidagarri eta, batez ere, berritzaile bat merkaturatzeko.
Erronka nagusia errekuntza-sistemak ikertzen eta garatzen jarraitzea da, etorkizun industrial deskarbonizatu baterako”. Azken urteotan gastu handia egin dugu gure instalazioan ekipamenduak sartzeko; besteak beste, laser bidez ebakitzeko makina bat, zubi-garabi bat eta soldadura robotizatuko zelula bat”.
Prozesuen digitalizazioan, errendimendu altuko modelizazio konputazional fluidodinamikoko (HPC) software bat garatu dute NOx emisio baxuko hidrogenozko erregailuak diseinatzeko, “horrek aukera emango baitigu martxan jarri aurretik ekipoak erabiliko dituen hidrogeno-errekuntzako baldintzen parametroak digitalki aurreikusteko eta baliozkotzeko”.
Etorkizunera begira, haien bereizketa teknologikoa azpimarratzea aurreikusten dute, energia-eraginkortasuna eta emisioen murrizketa bezalako ildo estrategikoekin, “erregai-kontsumoari, eragiketa-malgutasunari eta atmosferako emisioen gutxitze progresiboari dagokienez efizientzia handiagoa duten erregailuen garapenaren bidez, bai eta erregai alternatiboetarako errekuntza-ekipoen eta erregai anitzeko erregailuen garapenaren bidez ere, horiek asko eskatzen baititu industriak merkatuetan erregaien prezioen hegazkortasuna orekatzeko”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
