SEIN, urtean industriako hornikuntzen 43.000 eskari kudeatzen dituen ETEa
SEIN industriako hornikuntzetan espezializatutako enpresa da eta egunean 200 eskari tramitatzen ditu Euskadiko trakzio-enpresa nagusientzat. Soluzio pertsonalizatuak eskaintzen ditu eta hainbat hornitzaile elkartzen ditu, bezeroei zerbitzua erraztuz.
Enpresa 2005ean sortu zen industriako hiru hornitzaileren fusiotik: Arrasateko Memesa, Azpeitiko Etxeberria Biltegiak eta Abadiñoko Lausa. “Haien eremuetan oso zentratuta zeuden eta indarrak batu zituzten merkatu handiagoa hartzeko eta hainbat lekutako bezeroei zerbitzu hobea emateko”, azaldu dute Josu Ansola marketineko arduradunak eta Leire Azkarate finantza-arduradunak.
Enpresaren bulego nagusiak eta biltegi logistikoa Arrasaten daude eta merkataritza-sarea du Euskadi osoan zehar.
Eboluzio teknologiko garrantzitsua izan du azken urteetan zehar. “Katalogoa digitalizatu dugu eta enpresaren webgunea berritu dugu, online dendarekin eta bezeroentzako gune pribatuarekin. Hori guztia 2021az geroztik egin dugu, orduan aldatu baikenuen ERPa SPRIren dirulaguntza bati esker. Horrekin guztiarekin, sektoreko mutlinazionalen zerbitzu propioak eskain ditzakegu tokiko bazkide baten hurbiltasuna eta malgutasuna galdu gabe”.
SEIN industria-hornikuntzan dago espezializatuta, hala nola ebakitzeko tresnetan, lubrifikatzaileetan, korrosio-kontrako olioetan, torlojuetan, trokelgintzan eta urratzaileetan. “Industria-hornikuntzak lan handia eskatzen die enpresei eta gure lana lan hori erraztea da. Zerbitzuak eskaintzen dizkiegu haien balio erantsian jar dezaten arreta”.
Altxatze-sistemen berrikuspena eta mantentze-lanak ere eskaintzen dituzte hornitzaileen bitartez.
Merkatuko marka liderrekin egiten dute lan, hala nola Loctite, Bosch edo Parkerrekin, “kalitatea bermatuz beti”. Ehunka hornitzaile eta produktuen 30.000 erreferentzia baino gehiago dituzte, “baina malguak gara produktu espezifikoagoak edo bereziagoak bilatzeko”. SEINek urtean 43.000 eskari baino gehiago tramitatzen ditu, 200 inguru egunean. “Lau banaketa-furgoneta ditugu eta lurralde ia osoa hartzen dute barne. Egunero egiten dute lan. Tokiko kanpo-hornitzaile bat ere badugu, Langarri”.
Askotariko sektoreekin egiten dute lan eta Euskadiko trakzio-enpresarik handienak daude haien bezeroen artean, hala nola Ulma, Fagor, Danobat, ITP, Gestamp edo Cie. “Gure bezeroetako asko makina-erremintaren sektorekoak, sektore eolikokoak, siderurgiakoak eta automobilgintzakoak dira”. Martxoan, Barakaldoko BECeko Makina Erremintaren Bienalean egongo dira lehen aldiz stand batekin.
33 langile ditu guztira eta urteko fakturazioa zazpi milioi euro ingurukoa da. Euskadin daude kontzentratuta haien salmentak. “Zerbitzua da gure bereizgarria, soluzio pertsonalizatuak eskaintzen ditugulako eta hainbat hornitzaile elkartzen ditugulako bakar batean, horrek dakarren gastuaren eta denboraren aurrezkiarekin. Bezeroek asko baloratzen dute hori, kudeaketa azkarragoa delako”.
Etorkizuneko erronka merkatua eskualde gehiagotara zabaltzea da, “orain Debagoienan, Debabarrenan, Urola Kostan eta Durangaldean kontzentratzen baikara nagusiki”. Gainera, marka nagusien banaketari eutsi nahi diote eta eguneroko prozesuak digitalizatzen jarraitu. “Adimen artifizialean oinarritutako salmenten agentea integratu dugu, eta Microsoften proiektu pilotu baten parte da”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
