Procesim, ETE-en administrazio-zereginak automatizatzen dituen startupa

Procesim urtebete eta gutxiko startupa da eta ETE-en zeregin administratiboak automatizatzen ditu. Prestakuntza-ikastaroak, fakturak prozesatzeko sistema integralak edo bezeroen arretarako zerbitzuak eskaintzen ditu.

Enpresa 2024ko udan sortu zen.  “Nik aluminio-galdaketaren industrian egiten nuen lan proiektuen kudeatzaile, eta hilaren 31 batean, ostirala, bota egin ninduten. Grina ekintzailea eta langabezia baliatu nituen enpresaren eta teknologiaren gaineko nire ezagutzak automatizazio-zerbitzuen salmentan aplikatzeko”, azaldu du Beñat Lomasek, enpresaren sortzaileak.

Bazkide batekin hasi zen lankidetzan eta “enpresak gora egin ahala, programatzaile batekin elkartu nintzen. Orain nire bazkidea da Procesimen. IT enpresa batetik dator eta jauzi profesionala egin nahi zuen bere negozioa muntatzeko. AAren eta automatizazioen merkatuek eskaintzen duten aukera ikusi dugu biok.

Lehenengo lanak “autonomoentzako eta mikroETE-entzako “homemade” garapenak izan dira. “Ondoren, igotzen jarraitu dugu eta ETE-entzako proiektuak egin ditugu fakturazioa automatizatzeko, aplikazioak garatzeko, enpresaren ERPa konektatzeko… Oraingo fasean, aurrekontu handiagoko RAGak, enpresentzako prestakuntzak eta abar egiten ditugu”.

Profil teknikoentzako prestakuntza-ikastaroak ematen dituzte, adibidez, Castelloko Merkataritza Ganberan, edo “CVak aztertzeko aplikazio osoa garatu dugu enpresa batentzat”. Gainera, fakturak prozesatzeko sistema integralak eskaintzen dizkiete aholkularitza kontulariko enpresa hibridoei edo bezeroaren arreta eramaten dute Arabako Foru Aldundian.

Sektore mota guztientzat egin du lan Procesimek, estetikako klinikentzat, marketineko agentzientzat edo obretako kontratatzaileentzat, adibidez. “Orain arlo instituzionalean (udalak, aldundiak, elkarteak…) eta industria-sektorean zentratu nahi dugu. Hala ere, aukera ona bada eta inbound iristen bada, ez dugu aterik ixten. Adibidez, musika-lizentzien banatzaile bat etorri zitzaigun bezeroen arretarako RAG bat eskatzen”.

Soilik sei hilabeteko jardueraren ostean, fakturazioa 56.000 eurora iritsi zen iaz “eta helburua aurten 100.000ra heltzea da”.  Bi bazkide sortzaileek osatzen dute plantilla. “Bata zati operatiboaz arduratzen da (garatzailea) eta bestea kanpo-kudeaketaz (aholkularia). Beste bazkide bat gehitzea da asmoa, etorkizun hurbilean eskaria eta lan-beharrak sortzen jarraitzen badugu”.

Oraingoz ez dute inbertsio zehatzik egin I+Gn, baina etengabeko ikaskuntzarako partidak dituzte, “sektoreko metodologia eta tresna berriei buruzko ikastaroak, hitzaldiak, etab.”.

Datozen urteetarako erronkak dira urte honetan zehar lau kontratu ixtea erakundeekin, “enpresaren egitura formala eratzea eta lantaldea handitu ahal izatea”.

SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.