Erakarrek LED panel jasangarri eta adimendunak fabrikatzen ditu

Erakar enpresak Irunen du egoitza, eta hiri- eta merkataritza-inguruneetarako soluzio bisual adimendunak diseinatzen eta fabrikatzen ditu. Zehazki, neurrira egindako LED panelak fabrikatzen ditu, SDK eta API sistema irekiekin. Horri esker, kanpo-plataformekin integratu daiteke, adibidez, hiri-kudeaketako sistemekin edo garraio-azpiegiturekin. “Erakarren balio erantsia integrazio gaitasuna da: gure produktuak ez dira pantaila soilak, beste plataforma batzuekin komunikatzen diren sistema irekiak baizik”, azaldu du Andres Comeronek, konpainiako zuzendari komertzialak. 

Bezero nagusiak enpresa integratzaileak eta enpresa teknologikoak dira, eta horiek, aldi berean, erakunde publikoekin egiten dute lan, hala nola udalekin edo aldundiekin. Erakarrek parte hartu duen proiektu garrantzitsuenetako bat Santanderren izan da, Telefónicaren Smart City plataformarekin integratutako 25 LED panel instalatu baititu. Garraiorako pantailez eta smart cityetarako ez ezik, aparkaleku, aireportu, retail, kirol instalazio, kontrol gela eta kiosko interaktiboetarako soluzioak ere eskaintzen ditu Erakarrek. 

Duela gutxi, Erakar-ek tinta elektronikoaren teknologia gehitu du bere eskaintzan, kanpoko seinaleztapenerako irtenbide berritzaile eta jasangarri gisa. Pantaila horiek e-booken antzekoak dira, eta energia-kontsumo txikia dute, ikuspen handia eguzki-argi betean ere, eta erresistentzia handia dute baldintza klimatiko txarren aurrean. Bateriarekin eta eguzki-panelarekin modu autonomoan funtzionatzen dutenez, garraio-geltokietan instala daitezke, obra zibilik eta konexio elektrikorik gabe, eta atzerako argiztapen duala dute, gauez ere irakurri ahal izateko. 

Lau langile ditu Erakarrek, eta teknologia berri propioen garapenean aurrera egitea du helburu. Gaur egun, kanpoaldeetarako kiosko interaktibo pertsonalizatuak merkaturatzen eta software propioa sortzen ari da buru-belarri, bere soluzioen aplikazioak Smart Cityen eremutik harago zabaltzeko, sektore pribatuan hazteko helburuarekin. 

SPRI Taldearen helburuetako bat euskal enpresen eraldaketa digitala da. Besteak beste, Smart Industry, BDIH Konexio, Zibersegurtasun Industriala, Enpresa Digitala edo Inplantalariak laguntza-programen bidez bultzatzen du. 

SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.