Datu konplexuak erabaki erabilgarri bihurtu: Ikerfelen proposamena
1985ean, Ikerfel merkatuen ikerketarako eta iritzi-ikerketarako institutu gisa sortu zen. Orduz geroztik, informazio konplexua “marketin, negozio, berrikuntza edo teknologia sailetarako ezagutza argi eta erabilgarri” bihurtzen dihardu. Adimen lehiakorra deritzoguna eskaintzen dugu”, dio Joseba Ezpeleta merkataritza- eta negozio-garapeneko zuzendariak.
Bizkaiko enpresak kontsumitzaileen eta bezeroen portaera eta pertzepzioak aztertzen ditu —B2C zein B2B inguruneetan—, markekin duten esperientzia aztertzen du, eta haien gogobetetasuna eta leialtasuna indartzeko hobekuntzak proposatzen ditu. “Etorkizun posibleetarako prestatzen laguntzen diegu erakundeei”, laburbildu du garapen digitaleko zuzendari Jesus Oleagak.
Joseba Ezpeletak dioenez, “tresna metodologiko ugari erabiltzen ditugu”: ikerketa kuantitatiboa eta kualitatiboa, datuen eta big dataren analisia, erabiltzailearen esperientziaren azterketak (UX Research), emandako kalitate-ebaluazioak eta ‘mystery shopping’, eta aholkularitza estrategikoa. Konbinazio honi esker, joerak aurreratzen ditu, merkatuaren aldaketak sakon ulertzen ditu eta enpresei azkar egokitzen laguntzen die.
Ikerfelek eremu publikoan zein pribatuan jarduten du, batez ere estatu-mailan, Bilboko eta Madrilgo bulegoetatik, Latinoamerikako eta Europako herrialdeetarako ikerketen garapena alde batera utzi gabe. Sektore publikoarentzako azterketa sozialak, politikoak eta iritzi publikokoak egiten ditu; eta hainbat industriatako enpresentzako merkatuen ikerketa-proiektuak egiten ditu: kontsumo eta retail handietatik energia, telekomunikazioak, garraioa edo kultura, besteak beste. Aniztasun horrek zeharkako ezagutza aplikatzeko aukera ematen dio: “ikaskuntzak eta praktika onak eremu batzuetatik besteetara eramaten ditugu, eta horrek aberastu egiten du gure bezeroei ematen diegun balioa”, zehaztu du Joseba Ezpeletak.
Gaur egun, Adimen Artifiziala ikerketa-prozesuetan integratzeko lan egiten du konpainiak. “Honek aukera emango digu gure analisien irismena eta sakontasuna zabaltzeko, bezeroei ikuspegi osoagoa eta zehatzagoa eskaintzeko”, azaldu du Jesus Oleagak.
Etorkizunari begira, Ikerfelek informazio garrantzitsua eman nahi du, arreta zatituta eta iraultza teknologikoak bultzatutako aldaketa azkarrak ezaugarri dituen ingurune batean. “Gure helburua bezeroei eraldaketa horiek ulertzen eta aurreikusten laguntzea da, ikerketa-irtenbide berritzaile eta baliagarrien bidez”, amaitu du merkataritza- eta negozio-garapeneko zuzendariak.
SPRI Taldearen helburuetako bat euskal enpresen eraldaketa digitala da. Besteak beste, Smart Industry, BDIH Konexio, Zibersegurtasun Industriala, Enpresa Digitala edo Inplantalariak laguntza-programen bidez bultzatzen du.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
