Beniok talentua kudeatzeko eta enpresa kultura eraldatzeko eredua sendotu du
2020ko martxoan Tolosan sortutako Benio startup gipuzkoarrak bere lan ongizatearen eta garapen profesionalaren kudeaketa eremua sendotu du. Konpainiak online plataforma bat eskaintzen du, harpidetza bidez (SaaS) erabil daitekeena. Lan-giroa diagnostikatzeko, gaitasunak garatzeko eta erakundearen kultura indartzeko teknologia eta giza laguntza eskaintzen du, langileen esperientzia eraldatzeko eta enpresen emaitzak hobetzeko helburuarekin.
Benio talde onurarako plataforma gisa hasi zen, baina tresna integral bihurtu da, enpresei barne-kultura hobetzen eta gaitasunak garatzen laguntzen diena. Hiru arlo nagusitan ardazten da orain: langileen esperientzia, gaitasunen araberako kudeaketa eta enplegatzaile marka.
Berez, plataformak lan-giroaren eta arrisku psikosozialen diagnostikoak egiteko aukera, garapen-plan pertsonalizatuak diseinatzeko laguntza eta onura eta ordainsari komunikazioa modu argi era eraginkorrean kudeatzeko tresnak eskaintzen ditu. Honetaz gain, prozesuaren fase guztietan enpresei laguntza eskaintzen dieten adituak daude, konponbideak enpresaren beharretara egokituz.
Beniok duen berrikuntza nagusienetako bat teknologiaren eta giza laguntzaren konbinazioa eskaintzen dutela da. “Ez dugu soilik software bat eskaintzen: enpresei prozesu osoan laguntzen diegu diagnostikotik heziketa eta jarraipenera arte”, azpimarratzen du Ilazki Zalakainek, Benioren CEOak. Izan ere, konpainiak elkarlanean dihardu Gizagune eta Ope Consultores bezalako aholkularitza-enpresa estrategikoekin eta adituak gehitzen ditu arrisku psikosozialen esku-hartze homologatuak eta gaitasun-garapenerako programak eskaintzeko.
Benioren bezeroen artean, esaterako, Ikusi dago, azken hiru urteetan langileen gogobetetasuna eta leialtasuna hobetu dituena; edo Orbinox, arriskuen diagnostikoarekin hasi eta eta egun eraldaketa kulturalaren prozesu batean dagoena. Gainera, Arbola Consulting Pertsonak eta Ope Consultores bezalako aholkularitza-enpresek plataforma erabiltzen dute gaitasunen kudeaketarako euren proiektuetan.
Etorkizunari begira, Beniok bere plataforman hobekuntza teknologikoak sartzeko asmoa du. Hala nola, adimen artifizialaren erabilera ekintza planak eta diagnostikoa optimizatzeko. Honetaz gain, beraien presentzia komertziala eta marketin jarduerak handitu nahi ditu, Gipuzkoako eta inguruko erakunde gehiagorengana iristeko.
Softwarea, datu eta giza laguntza uztartuz, Benio aliatu estrategiko gisa sendotzen ari da, bere barne-kultura indartu, langileak zaindu eta errendimendua hobetu nahi duten enpresentzat.
SPRI Taldearen helburuetako bat euskal enpresen eraldaketa digitala da. Besteak beste, Smart Industry, BDIH Konexio, Zibersegurtasun Industriala, Enpresa Digitala edo Inplantalariak laguntza-programen bidez bultzatzen du.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
