Altersys, bidesarietako matrikula bidezko kobrantza adimendunean espezializatutako enpresa
Altersys enpresak Bilbon du bere egoitza, eta ibilgailuak automatikoki kobratzeko softwarea garatzen jarduten du 2016tik. Zehazki, matrikula bidezko kobrantza automatikoan espezializatu da, erabiltzaileak makina batekin interakziorik egin gabe edo kreditu txartela eman beharrik gabe. “Ibilgailua detektatzen dugu, matrikula erregistratuta dagoen edo titularra nor den kontsultatzen dugu, eta hortik aurrera hasten da dirua biltzeko prozesua”, azaldu du David Martinek, konpainiako sortzaile eta CEOak. Azpimarratzekoa da konpainia bizkaitarra aitzindaria izan dela Euskadin horrelako teknologien erabileran.
Altersysen lorpen garrantzitsuenetako bat Bizkaiko ‘free flow’ bidesari-sisteman parte hartzea izan da, Gertek enpresa buru duen proiektua. Altersysek garatutako teknologiari esker, egunean bi milioi ibilgailuen igarobide inguru prozesa daitezke, matrikulak modu guztiz automatizatuan aztertuz, sailkatuz eta balioztatuz. “Transakzioei eta datu-prozesatzeari dagokienez, gure proiekturik handiena da”, nabarmendu dute konpainiatik.
Gainera, Altersysek nazioarteko bezeroak ditu Estatu Batuetan eta Australian, besteak beste. Adibidez, Washington estatuan edo San Diegon (Kalifornia) kobrantza sistema ezberdinak garatu ditu. “AEBetako merkatua oso konplexua da, estatu bakoitzak bere trafiko zuzendaritza nagusia baitu. Horrek suposatzen du kobrantza metodo eta araudi ezberdinak integratzea”, adierazi du CEOak.
Softwarean duen ezagutzaz gain, Altersys bere jarduera hardwarearen garapenera dibertsifikatzearen aldeko apustua egiten ari da. Gaur egun, trafikoa aztertzeko kamera propioa diseinatzen ari da, eta gailu hori patente-prozesuan dago jada. Horretarako, ingeniaritza enpresekin kolaborazioak bilatzen ditu, baita azpiegitura egokiak ere froga errealak egiteko.
Bere hazkundea jarraituz, Altersys Euskadiko Mugikortasun eta Logistika Klusterrean integratu berri da, ekosistemako beste erakunde batzuetara hurbiltzeko eta elkarrekin finantzatzeko eta garatzeko aukera berriak izateko.
SPRI Taldearen helburuetako bat euskal enpresen eraldaketa digitala da. Besteak beste, Smart Industry, BDIH Konexio, Zibersegurtasun Industriala, Enpresa Digitala edo Inplantalariak laguntza-programen bidez bultzatzen du.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
