Indar Karterak, BBK Fundazioak, Eusko Jaurlaritzak eta Tekneik osaturiko partzuergoak Ayesa Digital erosi du 480 m€-ren truke

• Euskal partzuergoak konfiantza mantenduko du egungo zuzendaritza-taldearen kudeaketan, eta taldearen jarraipenaren alde egiten du. Partzuergoak ematen duen akzio-egonkortasunari esker, Ayesa Digital negozio autonomo bihurtuko da, bere hazkunde-plana garatzen jarrai dezan, bai zorroari eta bai gaitasun teknologikoei dagokienean
• Euskal partzuergoak Ayesaren negozio digitala erosi du, antzinako Ibermática barne. 2022tik, bere fakturazioa hirukoiztu egin du ―569 milioi eurotik gorakoa da― eta ia 50 milioi euroko Ebitda sortzen du, 11.000 langile baino gehiagorekin; horietatik 2.000 Euskadin

Donostia, 2025eko abenduaren 31a.- Indar Karterak (Kutxabanken inbertsio-ibilgailua), BBK Fundazioak, Eusko Jaurlaritzak Finkatuz-en (Finantzen Euskal Institutuaren inbertsio-ibilgailuaren) bidez, eta Tekneik (bazkide teknologikoa) osatutako partzuergoak A&M Capital Europeri eta Manzanares familiari Ayesa Digital erostea formalizatu du – zerbitzu digitaletan eta soluzio teknologiko aurreratuetan liderra den taldeetako bat. Eragiketaren balio osoa 480 milioi eurokoa da. Transakzioa datozen hilabeteetan ixtea espero da, agintari eskudunen aldetiko onespena lortu ondoren. Aldi berean, partzuergoan beste bazkide batzuk sartzeko aukera ere aurreikusten da, adibidez Vital Fundazioa, zeina bere parte-hartzea aztertzen ari baita.

2013an galdu zen Ibermática zenaren erabaki-zentroa Euskadira itzultzea dakar operazio horrek. Horrela, Euskadik eragile teknologiko handienetako baten alde egiten du hazkunde handiko sektore estrategiko batean, nola baita irtenbide digital aurreratuena eta hazkunde-ziklo berri bat hasi du, Europako zerbitzu digitalen hornitzaile nagusietako bat izateko. Talde berria enpresen eta erakundeen digitalizazioa bultzatzeko helburuarekin sortu da, zenbait arlo estrategikotan (adimen artifizial, zibersegurtasun, cloud, quantum computing eta abarretan) gaitasunak garatuz. Berrikuntzaren eta lanpostu kualifikatuak eta ezagutza aurreratuko lanpostuak sortzearen alde egiten duen sektorea da.

Proiektuak enpleguari jarraipena emango dio eta aukera berriak irekitzen ditu Euskadin sektore teknologikoko profesionalentzat. Euskal Autonomia Erkidegoan 2.000 langile baino gehiago ditu, eta sendotutako sarea Estatu osoan eta nazioartean. Kualifikazio handiko talentua erakartzearen alde egingo du Taldeak, gaitasun digitaletan prestakuntza eta berrikuntzarekin eta garapenarekin lotutako lanpostuen sorrera sustatuz. Gainera, balio teknologikoaren katea indartu eta sinergiak sortuko ditu euskal ekosistemako ETE (enpresa txiki eta ertain) eta startup-ekin, euskal industria-sarea indartzeko eta ekonomian eragin edo inpaktu positiboa sortzeko.

Bere gaitasunei esker, erakunde handiei lagundu ahal die eraldaketa digitalaren prozesu osoan, eta IBEX 35eko konpainia nagusiak ditu bere bezero-zorroan, baita erakunde publiko eta pribatu handiak ere.

Euskal partzuergoak konfiantza mantenduko du egungo zuzendaritza-taldearen kudeaketan –negoziazioan identifikatutako aktibo nagusietako bat–, eta taldearen jarraipenaren alde egiten du. Jose Luis Manzanares Ayesa Digitaleko CEOak karguan jarraituko du trantsizioa amaitu arte. Euskal partzuergoak ematen duen akzio-egonkortasunari esker, Ayesa Digital negozio autonomo bihurtuko da, bere hazkunde-plana garatzen jarrai dezan, bai zorroari eta bai gaitasun teknologikoei dagokienean.

Noël d´Anjou Ogasun eta Finantza Sailburuak adierazi duenez, “bere sektorean liderra den enpresa bat errotzeko eta hazteko erosketa hau Euskal Finantza Aliantzak gure indarrak batuta lor dezakeenaren beste adibide bat da”. Bestalde, Mikel Jauregi Industria Sailburuak esan duenez, “irtenbide digital aurreratuena HAZI sektore bat da ‘Industria Plana Euskadi 2030’ean, eta ‘industria hobearen’ jarduera-ardatzean ere kokatzen da. Gure industriak ezagutza aurreratua duten bazkide teknologikoak behar ditu, eraldaketa digitalean lagundu eta lehiakorragoak egin ditzan”.

Indar Karterako zuzendari nagusia den José Iturriagak azaldu duenez, “talde teknologiko berriak zeregin erabakigarria izango du industriaren eraldaketan eta ekonomia berriaren garapenean. Ayesa Digitaleko taldeak lan- eta lankidetza-ekosistema bat sortzea lortu du, bezeroarekiko hurbiltasunean oinarritua, eta funtsezkoa da balio bereizgarri hori zaintzea. Gure babesak talentuarentzako aukera berriak sortzea, gaitasunak indartzea eta lortutako eskala aprobetxatzea du helburu, gure lurraldeekiko eta bere jarduera-eremu dituen polo teknologiko nagusiekiko konpromisoa mantenduz”.

Bestalde, Joseba Lekube Tekneiko CEOak esan duenez, “eraldaketa digitalak lankidetzarako aukerak zabalduko ditu, eta Teknei-tik industria digitalari eta teknologikoari buruz dugun ezagutza eskaini nahi dugu, Ayesa Digital osatzen duten pertsona guztientzako proiektu ilusionagarri batean”.

Sektoreko eragile nagusien artean eta nazioarteko talde handien mailan

Euskal partzuergoak Ayesaren negozio digitala erosi du, antzinako Ibermática barne. Ayesa Digital Espainiako zerbitzu teknologikoen erreferente nagusietako bat bilakatu da (sektoreko bost eragile nagusien artean dago), eta nazioarteko talde handien mailan kokatzen da.

Hazkunde-ibilbide batean oinarritzen da bere lidergoa, zeinak konpainia enblematikoak (Ibermáticaren kasua bezala) eta erosi berriak (hala nola M2C, Proxya eta Emergya. Azken hori hodeiko soluzioetan eta adimen artifizialean espezializatua dago, eta Googleren Espainiako partner nagusia da.) integratzen baititu. Gaitasunen, berrikuntzaren eta eskalaren konbinazio horrek aktore estrategiko gisa kokatzen du talde berria, Europan eraldaketa digitala gidatzeko.

2022tik, Ayesa Digitalek hirukoiztu egin du bere fakturazioa, 569 milioi eurotik gorakoa da, eta ia 50 milioi euroko Ebitda sortzen du. Euskadin ez ezik, ia estatuko merkatu osoan aritzen da konpainia, eta presentzia iraunkorra du Erresuma Batuan, Ameriketako Estatu Batuetan, Mexikon, Kolonbian, Perun eta Txilen.

JB Capital eta Cuatrecasas euskal partzuergoaren finantza- eta lege-aholkulari gisa aritu dira, eta Deloitte eta Barrilerok due diligence delakoa egiten parte hartu dute. A&M Capital Europe eta Ayesak, berriz, Houlihan Lokey izan dute finantza-aholkulari, Pérez-Llorca eta Weil, Gotshal & Manges lege-aholkulari, eta Alvarez & Marsal, berriz, operazio-aholkulari korporatiboak.

Euskal partzuergoko bazkideei buruz

Indar Karterak Donostian du egoitza, Kutxabanken inbertsio-ibilgailu bat da, eta bere inguruko trakzio-enpresak, negozio-eredu finkatua dutenak edo hazkunde- eta hedapen-proiektuetan murgilduta daudenak, epe luzera garatzen laguntzen du. Merkatu-irizpideen arabera egiten ditu inbertsioak, eta enpresa erakargarrietan inbertitzen du, bai finantza- eta bai estrategia-ikuspegitik. Indar Karterarekin, ekonomia- eta industria-sarearen erakunde dinamizatzaile eta enplegu-sortzaile gisa duen posizioa indartzeko helburuari erantzuten dio Kutxabankek, enpresa-ekimen estrategikoak bultzatu eta finantzatuz.

BBK Banku Fundazioa irabazi-asmorik gabeko fundazio pribatua da, eta Bizkaian eta Euskadin garapen soziala, kulturala eta ekonomikoa sustatzea eta babestea du helburu. Hainbat sektoretako enpresetan partaidetza-zorro gero eta dibertsifikatuagoa du, Kutxabank Bankuaren % 57ko jabetza nabarmentzen da, eta bere baliabideak proiektu sozial eta kulturaletara bideratzen ditu, baita eskualdeko ekonomia sustatzera ere aipatutako inbertsioen bidez.

Finkatuz sozietate publikoa Finantzen Euskal Institutuaren (FEI) jabetzakoa da % 100, eta Eusko Jaurlaritzak finantzatzen du oso-osorik. Finkatuz sozietatearen helburua Euskal Autonomia Erkidegoko enpresetan epe luzerako finantza-partaidetza estrategikoak eskuratzea da.

Teknei enpresa liderra da sektore teknologikoan, Euskadin errotua, eta aholkularitzan, software-garapenean eta IT, AA eta BPO soluzioetan espezializatuta dago. Aurreikuspenen arabera, 300 milioi euroko fakturazioa izango du 2026an, eta Espainiako hainbat hiritan dago, baita Mexikon eta Estatu Batuetan ere. Banku, aseguru eta administrazio publikoaren sektoreetan egindako ibilbide sendoari esker, Teknei erreferente bihurtu da berrikuntzan eta bere bezeroen eraldaketa digitala bultzatzeko irtenbideen garapenean. Business Automation, Identitate Digital, Adimen Artifizial eta datuaren kudeaketa eta ustiapenari buruzko proiektuak sartzen dira bere eskaintzan, baita azpiegituren hedapena eta aplikazioen modernizazioa ere.

Eusko Jaurlaritzako Industria, Trantsizio Energetiko eta Jasangarritasun sailburua den Mikel Jauregiren hitzak, Balenciaga akordioari buruz

• Oso positibotzat jotzen ditugu Balenciagako langileen eta inbertsore berrien (Abu Dhabi Ports) arteko negoziaziaok eta soldata akordioa. Ezinbesteko pausu bat eman da gaur inbertsio hau gauzatzeko. Orain operazioa guztiz ixteko sinadura guztiak gauzatu behar dira hurrengo egunetan. Soka asko tenkatu da azken asteetan, baina ez da inoiz hautsi. Eskerrik asko guztiei zuen konpromezuarengatik.
• Ez da prozesu erraza izan. Bidean aurkitu ditugun zailtasunak zailtasun, ez gara inoiz ezkortasunean erori. Gogor lan egitea, zuhurtziaz eta diskrezioz oso garrantzitsua da horrelako operazioak burutzeko. Akordio hau konpromiso honen emaitza da.
• Denok asko genuen jokoan operazio honetan. Ez bakarrik Balenciagaren eta bere langileen etorkizuna, baita ontziolak inguruan sortzen duten industria-jarduera eta zeharkako enplegu guztia ere.
• Beste albiste on bat, gure herriaren etorkizun industrialerako oso garrantzitsua izan den asteari amaiera emate