Eusko Jaurlaritza Industria Plan berriaren sozializazio-prozesua egiten ari da, eta Ekonomia eta Gizarte Arazoetarako Batzordean aurkeztu du
Eusko Jaurlaritzaren Industria Plan berria onartzeko prozesuaren baitan, Mikel Jauregi Industria, Trantsizio Energetiko eta Jasangarritasuneko sailburuak agerraldia egin du Javier Muñecas buru duen EGAB – Euskadiko Ekonomia eta Gizarte Arazoetarako Batzordearen osoko bilkuran. Bertan, Euskadiko 2030 Industria Plana aurkeztu du, Ekonomia eta Gizarte Arazoetarako Batzordeak bere irizpena eman dezan, nahiz eta izapide hori nahitaezkoa ez izan prozeduraren fase honetan.
Jauregik nabarmendu duenez, “Industria Plan berria dokumentu bizia da, eragile sozioekonomikoen ekarpenei irekia, ezinbestekoak baitira gure ekoizpen-sarearen egungo erronkekin bat egiten duen industria-politika diseinatzeko. Plan berriak lanpostu egonkorrak eta ondo ordaindutakoak sortzeko oinarriak ezartzen ditu, gure seme-alaben nahiei erantzuteko eta haien potentziala Euskadin erabat garatzeko aukera emateko. Horregatik, guztiok partekatzen dugun Industria Plana nahi dugu, dinamikoa, aldatzen ari den agertoki ekonomiko eta industrial honetan”.
“Industria Plan berria garatu dugu Euskadiko gainerako erakunde publikoen, Europako Batzordearen eta kluster industrialen, enpresa-erakundeen eta erreferentziazko enpresen ekarpenekin. Hemendik aurrera, sozializazio-prozesua egiten ari gara hainbat gizarte-, ekonomia- eta enpresa-eragilerekin, plana haien ekarpenekin aberasteko eta proiektu eraldatzaileak sortzeko. Prozesu honetan, Ekonomia eta Gizarte Arazoetarako Batzordea eragile garrantzitsua da”, amaitu du sailburuak.
EGABen egindako agerraldiak gardentasunarekin, entzute aktiboarekin eta Euskadiko industriaren lehiakortasuna, jasangarritasuna eta eraldaketa bultzatuko duten politika publikoen eraikuntza partekatuarekin Eusko Jaurlaritzak duen konpromisoari erantzuten dio. Prozesu parte-hartzailearen ondotik, planaren azken bertsioa Gobernu Kontseiluan onartuko dute eta uda ostean Legebiltzarrera igorriko dute.
Euskadiko Ekonomia eta Gizarte Arazoetarako Batzordea
EGAB Eusko Jaurlaritzaren eta Legebiltzarraren erakunde aholku-emailea da, Euskadiko politika ekonomiko eta sozialean interes ekonomiko eta sozialen parte-hartzea eraginkorra izan dadin. Eginkizunen artean, politika ekonomiko eta sozialaren arloan Eusko Jaurlaritzaren plan orokorrei, dekretuei eta lege-proiektuei buruzko nahitaezko informazioa ematea du. 32 kide ditu guztira, eta erakunde eta konfederazio sindikalen, enpresa-konfederazioen, merkataritza-ganberen, finantza-erakundeen, kooperatiben, lan-sozietate anonimoen, nekazaritza- eta arrantza-erakundeen, kontsumitzaile-elkarteen eta gizarte-ekintzako hirugarren sektoreko erakundeen ordezkariak dira.
