ETEKIN Ekonomia Topaketak: datorren astezkenean egingo da Gasteizen aurtengo bigarren saioa.
Ekonomia eta finantzen arloan gaurkotasunezko gai bat jorratuko du ETEKIN ekonomia topaketen aurtengo bigarren saioak: Amaia Jugo (Artizarra fundazioa), Asier Aranbarri (Eusko Jaurlaritza) eta Ekhi Atutxa (Deustuko Unibertsitatea) adituek hartu dute parte Geopolitika eta enpresa: arriskuak eta erabakiak ziurgabetasunean izenburupean egingo den jardunaldian. Saioa amaitzean, gosaria eskainiko da, parte-hartzaileen arteko iritzi-trukaketa eta sare profesionalen sendotzea errazteko. Izena emateko epea zabalik dago.
JAUZIA GARA aurkeztu du Lehendakariak, euskararen inguruko adostasun zabala lortzeko bide berria.
“Oso urrats handiak egin dira, baina beste paradigma bat behar dugu, lortu dugunetik abiatuta jauzi kualitatiboa emango duen paradigma”. Hala adierazi du Pradales lehendakariak “Jauzia Gara” lelopean Azkuna Zentroan antolatutako ekitaldian. 270 lagunen aurrean, lehendakariak aditzera eman du Eusko Jaurlaritzak “Euskararen Erabilera Biziberritzeko Biltzarra” antolatuko duela 2027an, “datozen hamarkadetan euskararen oinarrizko printzipio eta ardatzei buruzko adostasun zabala” lor dadin.
LANHITZ, enpresetan euskararen erabilera sustatzen laguntzeko programaren aurtengo deialdia argitaratu du Eusko Jaurlaritzak.
Euskara eta eguneroko lana uztartu eta indartzeko ekimena da Lanhitz, enpresetan euskararen presentzia eta erabilera areagotzea izanik bere helburua, baita euskara entitateen kudeaketa-sisteman txertatzea ere. Laguntza mota desberdinak aurreikusten ditu programak: ekintza solteak; diagnostikoa eta euskara plana; urteko kudeaketa plana; eta proiektu estrategikoa. Eskaerak aurkezteko epea ekainaren 11n zabaldu da eta uztailaren 10ean amaituko da.
“Nanoeskala” Industria Berriaren Spri Hiztegian.
Nanoteknologiari aplika dakiokeen luzera-eskala duten egiturak, eskuarki 1-100 nanometro bitartekotzat jotzen direnak. Ia solido gehienetan erabiltzen den eskala mesoskopikoaren behe-mugan dago. Helburu teknikoetarako, honela ulertzen da: eskala nanoskopikoan, eta partikula indibidualen mugimenduaren eta portaeraren ondorioz, neurtutako propietateen fluktuazioak eragin nabarmena izaten hasten dira sistema baten portaeran (askotan ehuneko txiki bat), eta, beraz, fluktuazio horiek kontuan hartu behar dira sistema aztertzean.
ChatGPT Prompt Engineering eraginkortasunez erabiltzen ikasteko aukera Enpresa Digitalaren eskutik, uztailaren 10ean.
Ikastaro honetan, Prompt Engineering teknikak baliatuz ChatGPT teknologia modu eraginkorragoan nola erabili aztertuko dugu.
Azken urteotan, adimen artifizialak azkar egin du aurrera, eta, horri esker, makinekin interakzioan aritzeko modu berriak ezagutu dituzte erabiltzaileek. Bereziki, ChatGPTren teknologia oso tresna erabilgarria da aplikazio askotarako, hala nola bezeroarentzako arreta, testu-sorkuntza eta, are, laguntzaile birtualak. Hala ere, eraginkorra izan arren, ChatGPT erabiltzea erronka bat izan liteke adimen artifizialarekin ohituta ez dauden erabiltzaileentzat.
