IndeusBerri: industria eta euskara uztartzen dituen informazioaren topagunea
Hemen da IndeusBerri, oporrak amaituta indarberrituta eta irudi berriarekin datorkigu euskara eta industria, industria eta euskara uztartzen dituen buletina. Indeus Elkarrizketak ekimenak bederatzi elkarrizketa berri ekarriko dizkigula, irailaren 24 eta 25ean Enpresa Digitalaren eskutik Power Bi tailerra egingo dela euskaraz eta irailaren 11an UIKen udako ikastaroen barruan Itzultzaile neuronalei eta euskarari buruz egindako ekitaldia dira nabarmendutako albisteak. Amaitzeko Neurona-sarea da gaur hiztegian aukeratu dugun kontzeptua.
Itzultzaile neuronalen eragina euskararen erabileran ikastaroa egin da irailaren 11n.EHUren UIKen udako ikastaroen eskaintzaren barruan Itzultzaile neuronalek euskararen erabileran duten eraginari buruzko ikastaroa egin da Donostiako Miramar jauregian. Itzulinguru proiektua izan zen ikastaroaren ardatz nagusi, egitasmoan parte hartu duten eragileen eskutik emaitzak eta ondorioak ezagutzeko aukera izan zuten bertaratutakoek. Informazio hori herritar guztientzat eskuragarri izango da datozen egunotan, Soziolinguistika klusterraren eskutik. Ikerketa proiektuaren helburuen artean egon da identifikatzea zein diren landu beharreko ahalmen berriak eta arau berriak, euskara biziberritzearen ikuspegitik, itzultzaile neuronala maila praktikoan erabiltzeko.
Business Intelligence Power BI-rekin tailerra euskaraz irailaren 24 eta 25ean Enpresa Digitalaren eskutik.Datuak eta datuen tratamendua alderdi kritiko bilakatu dira enpresen ezagutza-esparru guztietan. Eta gero eta gehiago dira merkatuan eskuragarri dauden adimen-tresnak eta datuen analisirako tresnak, enpresa horiek dituzten analisi- eta bistaratze-beharrizanei irtenbide bat ematen saiatzen direnak. Ikastaro honetan, parte-hartzaileek Power BI erabiltzeko oinarrizko ezagutzak eskuratuko dituzte, beren negozioetarako erabilgarriak izan daitezkeen kontrol-koadroak eta bistaratzeak sortu, modelatu eta eraldatzeko. Ikastaro erabat praktikoa izango da, non parte-hartzaileek beren datuen eredu propioa sortzen ikasiko duten.
INDEUS ELKARRIZKETAK ekimena itzuli da bederatzi solasaldi berrirekin.CAF, Ceit, Ekin, Fagor Taldea, Gislan, i+Med, Larraioz Taldea, Metaposta eta Soziolinguistika Klusterra dira ekimenarekin bat egin duten enpresak.Orain dela bi urte Indeus, Industriaren Euskal Plataformak abiarazitako Indeus Elkarrizketak ekimenak bederatzi solasaldi gehitu dizkio aldez aurretik zuen zerrendari; honenbestez 29 dira guztira ekimena osatzen duten elkarrizketak. Indeus Elkarrizketen bidez enpresa hauen jarduna ezagutzearekin batera, bakoitzak euskararekiko duen ikuspegira eta konpromisora hurbiltzeko aukera dago, bakoitzaren sektore, egoera eta berezitasunetik abiatuz. Solasaldi guztiak euskaraz egin dira, baina gaztelaniaz eta ingelesez azpititulatuta daude beste hizkuntza batzuetako hiztunek ere ikusi eta ulertzeko aukera izan dezaten.
“Neurona-sare” Industria Berriaren Spri Hiztegian.Ikaste automatikoaren azpimultzoa, ikasketa sakoneko algoritmoen muinean dagoena. Izena eta egitura giza garunean inspiratuta daude, sare neuronalek imitatu egiten baitute neurona biologikoek elkarri seinaleak bidaltzeko duten modua. Nodoz eratutako geruzez osatuta daude: sarrera-geruza bat, geruza ezkutu bat edo gehiago eta irteera-geruza bat. Nodo —neurona artifizial— bakoitza beste batekin konektatzen da, eta pisu bat eta atalase bat ditu. Nodo indibidual baten irteera aurrez zehaztutako atalase-balioaren gainetik badago, nodo hori aktibatu egiten da, eta datuak bidaltzen ditu sareko hurrengo geruzara. Bestela, ez dira datuak pasatzen sareko hurrengo geruzara.
