Kroketak.eus, bi ekintzaile arabarren omenaldia euskal gastronomiari
Bizi-aldaketak, gogoak eta gastronomiarekiko grina izan ziren Kroketak.eus -en osagai nagusiak, Juan Gil eta Patxi Ruiz de Samaniego ekintzaile arabarren proiektua. 2017an beren bideak batu zituztenean, euren bi pasio nagusiak uztartu zituzten, gastronomia eta ekitaldien antolaketa. Euren apustuari esker, lau urte geroago etxera eramateko kalitatezko sukaldaritza autoktonoa eskaintzen hasi ziren.
Gasteizko Abastos Merkatuan duten salmenta-puntuarekin, 2021ean ireki zutena, izena ematen dien produktua da nagusi: kroketak. “Km0 dira eta, horien bidez, kroketaren garapen gastronomikora soilik bideratutako berrikuntzaren aldeko konpromisoari balioa eman nahi diogu”, diote Gil eta Ruiz de Samaniegok. Horretarako, funtsezko bi irizpidetan oinarritzen dira: prozesuan eta produktuan.
Izan ere, Kroketak.eus-ek denboraldiaren eta lurraren arabera definitzen ditu bere produktuak, tokiko ekoizle sare bati esker, hala nola Kanpezuko Iringilea, Euskadin jardunean dirauen bakarra; Lekunberriko Maskarada enpresako Euskal Txerri tokiko txerria; Jeingenekoaren Etxarriko esnea; Añuako Zelaitxo gaztandegia, 2017an Iñaki Eceiza gazte arabarrak sortutako abeltzaintza ustiategi txiki bat; edo Arabako Ilarduian dagoen La Leze gaztandegi ospetsu eta saritua.
“Oso sentsibilizatuak gaude gure ingurunearekin eta bertan bizi diren pertsonekin, eta horregatik arlo profesionaletik harago doazen harremanak sortzen ditugu gure ekoizleekin, lehengai onenak jaso eta eskaintzeko eta gure km0 filosofiarekin koherenteak izateko”, adierazi dute Gil eta Ruiz de Samaniegok. Azken batean, proiektu honekin “produktuaren, ekoizleen eta azken kontsumitzailearen artean sinergiak sortzeko gai den komunitatea” osatu nahi dute.
Kroketaz gain, ‘Guisote!’ marka komertzialarekin prestatutako platerak ere eskaintzen ditu enpresak, besteak beste, albondigak, belarria saltsan, txahal-masailak edo txipiroiak tintan. “Gisatuak egiten bagenituen gero gure bexameletara gehitzeko, zergatik ez egin beste negozio ildo bezala?”, azaldu dute Gil eta Ruiz de Samaniegok.
Negozio lerroen bilakaera eta garapen gisa, bezeroek janari on bat zerekin amaitu ere aurki dezakete: postreak. ‘Tarrikos!’ marka komertzialaren pean, bi ekintzaileek gourmet postreak egitea eta saltzea bilatu zuren, bai HORECA kanalerako, bai txikizkako kontsumorako.
Azken bezerora ez ezik, HORECA kanalera ere iristen da Gasteizen, Euskadin eta beste autonomia erkidego batzuetan ere. Ibilbide horren guztiaren ondorioz, enpresak Araba Ekinean 2025 saria jaso du. Aitorpen hori Gasteizko Udalak, Arabako Foru Aldundiak, Vital Fundazioak eta BIC Arabak ematen dute, eta enpresa-proiektu baten sustatzaile diren Arabako ekintzaileak aintzatesten ditu, baldin eta enplegu sorrera esanguratsua badute eta proiektuaren bultzadaren ondorioz nabarmentzen badira.
Horrela, Jundizen duten lantegitik, Kroketak.eus-ek zuzenean eramaten du bere bezeroen mahaira produktu artisaua, tokiko sare batean oinarritutako euskal ekoizleek hornituta eta kalitatea, tokiko konpromisoa eta gastronomiari omenaldia uztartuz.
SPRI Taldeak laguntza integralaren bidez berrikuntza, ekintzailetza eta barne-ekintzailetza laguntzen ditu, ideiak merkatura modu arrakastatsuan irits daitezen. Aurrera, Basque Fondo, Bind 4.0, Ekintzaile edo Barnekintzailetza ekintzailetzarako laguntza-programen bidez egiten du hori.
