Arantxa Tapia sailburua eta Juan Mari Aburto alkatea.
Albisteak 2021eko martxoaren 17a

Eusko Jaurlaritzak eta Bilboko Udalak Europako Hegoaldeko ekonomia zirkularraren zerbitzu aurreratuen lehen zentroa sortu dute

  • Basque Circular Hub zentroak zerbitzu-zorro zabala eskainiko dio euskal industriari, eta Ihobe sozietate publikoaren bidez kudeatuko da.

  • 2024an, 1200 profesional izango ditu trebatuta ekonomia zirkularraren alorrean, eta 1500 euskal enpresak haren zerbitzuak erabiliko dituzte

  • Euskadiko Ekonomia Zirkularraren 2030erako Estrategiaren helburuak lortzeko tresnetako bat da

-

 

Arantxa Tapia Ekonomiaren Garapen, Jasangarritasun eta Ingurumen sailburua eta Juan Mari Aburto Bilboko Alkateak Basque Circular Huba aurkeztu dute gaur, hau da, Europako Hegoaldeko ekonomia zirkularraren zerbitzu aurreratuen lehenengo zentroa. Ihobe sozietate publikoak kudeatuko duen zentro aditu berri hori lankidetza publiko-pribatuaren emaitza da, zeren eragile hauek parte hartu baitute haren eraketan: Eusko Jaurlaritzak, Bilboko Udalak, Deustuko Unibertsitateak, UPV/EHU Euskal Herriko Unibertsitateak, Mondragon Unibertsitateak, Tknika – Euskadiko LHren Ikerketa Aplikatuko Zentroak eta Novia Salcedo Fundazioak.

Ezaugarri horiekin Estatuan eta Europako Hegoaldean dagoen zentro bakarra da. Merkatuko prospektiba-zerbitzuak eta prestakuntza aurreratuko zerbitzuak ditu, eta baita joerak aztertzeko eta ezagutza aditua sortzeko zerbitzuak ere, ekonomia zirkularraren alorrean.

Beste helburu batzuen artean, 2024. urterako espero da 1500 enpresak erabiltzea zentro honen zerbitzuak; ehun irakasle eta 1200 profesional inguruk ekonomia zirkularrari buruzko prestakuntza jaso izana, eta zaintza sektorialeko 20 txosten eginda egotea. Halaber, Ihobek Bilbo hiriari lagunduko dio ekonomia zirkularreko bide-orri bat prestatzen eta irtenbide berriak bilatzen herritarrek zein bertoko enpresa-ehunak proposatutako erronketarako.

Zentro berritzaile hau Ekonomia Zirkularraren 2030erako Estrategiaren helburuak lortzeko tresnetako bat da, eta ahalbidetuko du euskal industriaren lidergoa indartzea, eredu jasangarriagoetara eta zirkularragoetara zuzendutako eraldaketan.  Gaurtik aurrera, Euskadiko enpresek zerbitzu-zorro zabala dute eskura euren lehiakortasuna hobetzeko, prozesu zirkularrak euren ekoizpen-sistemetan txertatzearen bidez.

Basque Circular Hubak, gainera, sostengua eskainiko die ekonomia berdearen alorreko ekintzailetza-ekimen berriei eta prestakuntza aurreratua emango die irakasleei, jardunean edo langabezian dauden langileei eta eremu horretan espezializatu nahi duten ikasleei. Horretarako, Deustuko, Mondragon eta UPV/EHU unibertsitateen, Tknika – Euskadiko LHren Ikerketa Aplikatuko Zentroaren eta Novia Salcedo Fundazioaren laguntza izango du.

Gaur egun Bilboko Auzo Factory Irazabal-Matikon kokatuta, Basque Circular Hubean elkartzen dira, alde batetik, ekodiseinuaren metodologien eta ekoidiseinuko espezialistak prestatzeko programen garapenean Ihobe sozietate publikoak 15 urtez baino gehiagoz metatu duen esperientzia, eta, bestetik, Bilboko Udalak ekintzailetzaren aldeko ekimenetan duen esperientzia. Horrela geratu da islatuta Estatuan eta Europako Hegoaldean aurrendari den ekimen hau abiatzeko xedez bi erakundeek sinatu duten hitzarmenean.

Ekimen hau industriaren oraingo eta etorkizuneko beharrei eta beste merkatu-aukera batzuei erantzuten dieten zerbitzu aurreratuak bultzatzeko xedez Bilbon garatzen ari den espezializazio adimendunaren estrategiaren zati da.

Ekonomiaren Garapen, Jasangarritasun eta Ingurumen sailburu Arantxa Tapiak eta Bilboko alkate Juan Mari Aburtok Basque Circular Hubaren instalazioak bisitatu dituzte gaur goizean; bertan, Ihobeko zuzendari Alexander Botok aurkeztu dizkie zentroak eskainiko dituen espezializazio handiko zerbitzuak, hau da, bai euskal ehun industrialari eta bai unibertsitateko eta lanbide heziketako komunitateari eskainiko dizkien zerbitzuak.

Lau jarduera ardatz

Basque Circular Hubak honako gai hauek jorratzen ditu, besteak beste: negozio-eredu zirkular berriak; ekoberrikuntza eta ekonomia zirkularreko teknologiak; material jasangarri berriak; produktu eta eraikinen ekodiseinua; fabrikazio efizientea; elikagaien xahuketa; plastikoen kontsumoa; eta kontsumo zirkularra.

Ihobe sozietate publikoa da zentro honen jardun osoa koordinatzeaz arduratzen den erakundea; beraren pertsonala, berriz, ingeniaritza, ekonomia eta marketinaren alorreko adituez osatuta dago.

Zentro honek gauzatuko dituen lanei dagokienez, lau jarduera-eremu hartuko dituzte barne: ekonomia zirkularreko proiektuak euskal enpresetan gauzatzea; Euskadiko ekonomia zirkularraren Behatoki gisa jardutea; ekonomia zirkularrari buruzko prestakuntza aurreratua eskaintzea; eta enpresei tresna teknikoak eskaintzea.

Zehazki, ekonomia zirkularreko proiektu teknikoen garapena bultzatuko da, euskal enpresetan, HUBean prestatutako profesional gazteen parte-hartzearekin. Enpresek eskura izango dituzte ekonomia zirkularra haien prozesuetan integratzeko prestatuta dauden gazte espezializatuak, eta ikasleak lan-ingurune batera iritsi ahal izango dira ikasitakoa praxira eramateko. Zehazki, 2024. urterako espero da mila gaztek baino gehiagok jarduera horretan parte hartu izana.

Euskadiko ekonomia zirkularraren Behatoki gisa, zaintza estrategikoko lanak egingo ditu negozio-aukera berriak detektatzeko; bide-orriak prestatuko ditu negozio berrietarako; eta sektore industrialei egokitutako zaintza-txostenak egingo ditu.

Ekintzailetzaren alorrean, berriz, proiektuen diseinuan lagunduko du, eta orientazioa eskainiko du une bakoitzean eskura dauden laguntzak eskuratzeko bideei buruz.

Ekonomia zirkularraren alorreko prestakuntza adituaren jarduerek rol garrantzitsua izango dute, zeren ez baitira graduatu berri diren ikasleengana soilik zuzenduko, baizik eta baita irakasleengana ere, bai unibertsitatekoengana eta bai lanbide heziketako zentroetakoengana. Prestakuntza hori, gainera, gai horretan espezializatutako profesionalak izan nahi dituzten enpresetara ere iritsiko da.

Bilbon kokatutako zentro bat

Basque Circular Hubaren egoitza Bilboko Udalaren “Auzo Factory Irazabal-Matiko” ekintzailetza-zentroan dago kokatuta, Ihobe sozietate publikoaren eta udal horren artean sinatutako hitzarmenari esker; izan ere, hitzarmen horren arabera, Udalak uzten du Hubaren instalazioak hartzeko beharrezkoa den espazioa, eta bi erakundeek konpromiso hauek hartzen dituzte: ekonomia zirkularraren alorreko tokiko ekintzailetza-ekimenei laguntzea eta aholkua eskaintzea; eta negozio-aukerak detektatzea eremu horretan, merkataritza, turismo eta sorkuntzaren industriaren sektoreetan, besteak beste. Halaber, Ihobek laguntza emango dio Bilbo hiriari ekonomia zirkularreko bide-orri bat egiteko eta irtenbide berritzaileak bilatzeko herritarrek edo bertoko enpresa-ehunak proposatzen dituzten erronketarako.

Hubaren jarduera osoa eskuragarri egongo da beraren web korporatiboan. Hala, beraren bitartez, interesatuta dauden enpresek euren prozesu industrialen zirkulartasun mailari buruzko autodiagnostikoak egin ahal izango dituzte, euren produktuen ingurumen-inpaktuak kuantifikatu, edo erakusketa birtuala bisitatu: euskal enpresek ekodiseinatutako ia 200 produktu, jadanik merkaturatzen ari direnak.

 

 

Lotutako albisteak

BATTIA  Recycling  Technologies  eta  Inspectrail,  2026ko  Toribio  Echevarria  Sarien  irabazleak
2026/11/05 Ekintzailetza

BATTIA Recycling Technologies eta Inspectrail, 2026ko Toribio Echevarria Sarien irabazleak

Sari-banaketan Euskadiko ekintzaileen, enpresen, zientziaren, hezkuntzaren eta erakundeen alorreko ordezkariak bildu dira Eibarren

ESA  BIC  Euskadi:  ekintzailetza  eta  teknologia  konektatzeko  espazioa
2026/10/23 Ekintzailetza

ESA BIC Euskadi: ekintzailetza eta teknologia konektatzeko espazioa

Urriaren 26an irekiko den Europako Espazio Agentziak Euskadin duen inkubazio-programak 60.000 eurora bitarteko finantzaketa eta bi urteko laguntza eskaintzen dizkie espazioko aplikazioa duten teknologiak garatzen dituzten startupei eta ekintzaile-taldeei. Soluzio berritzaileak enpresa-proiektu berri bihurtzeko aukera da, Euskadiko egitura zientifikoaren, teknologikoaren eta industrialaren laguntzarekin.

Euskadi  ekintzailetza-marka  haustetik  gertu  dago
2026/10/08 Ekintzailetza

Euskadi ekintzailetza-marka haustetik gertu dago

El Informe GEM 2025-2026 refleja que, por primera vez, se encadenan cuatro años consecutivos de crecimiento y queda a solo una décima del máximo de 2007. Los negocios nacientes superan por primera vez el 4%, mientras que el emprendimiento potencial asciende al 8,7%, casi dos puntos más que en 2024...

Eusko  Jaurlaritzaren  berrikuntza  irekiko  BIND  plataformak  5  kontinenteetako  98  herrialdeko  966  startup  erakarri  ditu  Euskadiko  100  enpresarekin  lan  egiteko
2026/09/21 Ekintzailetza

Eusko Jaurlaritzaren berrikuntza irekiko BIND plataformak 5 kontinenteetako 98 herrialdeko 966 startup erakarri ditu Euskadiko 100 enpresarekin lan egiteko

966 startupek 1.297 proiektu aurkeztu dituzte Euskadiko 100 enpresa handi eta ETEren erronkei erantzuteko. Hautaketa-prozesua 2027ko apirilean amaituko da, eta emaitzak uztailaren 1eko BIND Demo Day ekitaldian aurkeztuko dira.

BATTIA  startupak  8 M€  lortu  ditu,  ibilgailu  elektrikoen  baterien  birziklapena  Gipuzkoatik  bultzatzeko
2026/09/16 I+G+B

BATTIA startupak 8 M€ lortu ditu, ibilgailu elektrikoen baterien birziklapena Gipuzkoatik bultzatzeko

Euskal Autonomia Erkidegoan erreferente diren Ceit eta Tekniker ikerketa-zentroen spin-offak teknologia propioa garatu du litioa, nikela, kobaltoa eta manganesoa berreskuratzeko.

Hiru  erronka,  bost  sozietate  publiko  eta  startupentzako  aukera  bat;  horrela  hasten  da  BIND  GovTech  ekimenaren  4.  edizioa
2026/09/09 Ekintzailetza

Hiru erronka, bost sozietate publiko eta startupentzako aukera bat; horrela hasten da BIND GovTech ekimenaren 4. edizioa

Startup hautagaiek sozietate publikoek planteatutako hiru erronketako bati edo batzuei erantzun beharko diete, urriaren 1eko 16:00ak arte.

Zabalik  dago  Top  101  Spain  Up  Nation-en  III.  ediziorako  hautagaitzak  aurkezteko  epea
2026/07/07 Ekintzailetza

Zabalik dago Top 101 Spain Up Nation-en III. ediziorako hautagaitzak aurkezteko epea

Parte hartu nahi duten enpresek 2026ko irailaren 11ra arte izena eman ahal izango dute

Eusko  Jaurlaritzak  BINDen  11.  deialdia  jarri  du  abian,  azken  hamarkadan  euskal  enpresen  eta  startupen  arteko  kontratuetan  lortutako  10  milioi  euroko  balantzearekin
2026/07/02 Up Euskadi

Eusko Jaurlaritzak BINDen 11. deialdia jarri du abian, azken hamarkadan euskal enpresen eta startupen arteko kontratuetan lortutako 10 milioi euroko balantzearekin

Deialdi berria irailaren 4ra arte egongo da zabalik, eta soluzio disruptiboak bilatzen ditu industria adimendunean, antolamendu efizientean, energian eta jasangarritasunean eta merkaturatzean.

Euskadiko  Parke  Teknologikoak  40  urte  ospatu  ditu  Bizkaian  eta  Zamudio/Derio  Campusaren  hedapena  iragarri  du,  bere  tamaina  bikoizteraino

Euskadiko Parke Teknologikoak 40 urte ospatu ditu Bizkaian eta Zamudio/Derio Campusaren hedapena iragarri du, bere tamaina bikoizteraino

Imanol Pradales Lehendakariak, Zamudio/Derio Campusean 1,2 milioi metro karratu gehitzeko aukera emango duen Mantuliz (Derio) bisitatu du

Euskadiko  895  startup  teknologikoek  324  milioiko  inbertsioa  erakarri  zuten  2025ean
2026/06/04 Ekintzailetza

Euskadiko 895 startup teknologikoek 324 milioiko inbertsioa erakarri zuten 2025ean

Euskadik industriarekin konektatutako ekintzailetza-eredu bat sendotu du, 8.919 enplegu eta 1.000 milioi baino gehiagoko fakturazioarekin

Joan blogera

Jarrai gaitzazu

Kanal espezializatuak eta eguneroko gaurkotasuna gure sareetan.