Euskadik bere startupen azken berrikuntza teknologikoak aurkeztu ditu 4YFNan

Euskadik “Four Years From Now” (4YFN) nazioarteko ekitaldian parte hartu du aste honetan, Mobile World Congress Barcelona-ren esparruan startupentzat egiten den nazioarteko erreferentziazko ekitaldian. Eusko Jaurlaritzaren eta hiru foru-aldundien laguntzarekin, hiru lurraldeetako 12 startupek osasuna, zibersegurtasuna, industria eta jasangarritasuna bezalako sektoreetan dituzten soluzio berritzaileak azaldu dituzte.

 “Startup Innovation Land” lelopean, Euskadi – Basque Countryk lankidetza publiko-pribatuko eredu bat —enpresa-proiektu berritzaileak sortzera eta haztera eta nazioartean proiektatzera bideratua— erakutsi du 4YFN azokan. Bertaratutakoek Euskadi – Basque Countryren stand-a bisita dezakete (8.1 hall-a, 8.1 B11 standa), eta oinarri teknologikoa eta berritzailea duten 900 enpresa baino gehiago biltzen dituen ekosistema bat ezagutu, ikerketa-zentroen, finantza-eragileen eta laguntza instituzionaleko erakundeen sare zabal batekin batera.

4YFN mundu osoko startup, enpresa berritzaile eta inbertitzaileentzako urteko topaketa da. Bertan, erakundeen arteko loturak eta lankidetzak indartzen dira, ekosistema berritzaileak ezagutarazten dira eta azken berrikuntza teknologikoak aurkezten dira. 

Testuinguru horretan, Eusko Jaurlaritzak eta hiru foru-aldundiek ekintzailetzarako eta berrikuntzarako laguntza-ekimenak aurkeztu dituzte, besteak beste, Basque Tek Ventures, Euskal Autonomia Erkidegoan Deep Tech startupak sortzea sustatzen duen ekimena, eta BIND, berrikuntza irekirako eredu gisa finkatu den plataforma.  Gainera, Euskadi-Basque Countryren standak 16 euskal startupen pitch-ak ditu, eta beste 9 euskal startupek 4YFN ekitaldiaren agertoki ofizialean ordezkatu dute Euskadi.

Erakundeen aldetik, honako hauek eskaini diete babesa startupei beren lan-bileretan: Eusko Jaurlaritzako Ekintzailetza eta Nazioartekotzearen zuzendari Ane Miren de Ariñok; Arabako Foru Aldundiko Ekonomia Garapenaren eta Berrikuntzaren zuzendari Ander Larrinagak; Beazeko Ekimen Estrategikoen zuzendari Ander Muñozek; Gipuzkoako Foru Aldundiko Ekonomia Sustapeneko zuzendari nagusi Amaia Arregik; Gipuzkoako Foru Aldundiko koordinatzaile Ekain Lakak; eta Gipuzkoako Foru Aldundiko Proiektu Estrategikoen zuzendari nagusi Koldo Peciñak; eta Beazeko zuzendari nagusi Olatz Goitiak.

12 euskal startupek beren soluzioak aurkeztu dituzte 4YFNan

 Araba ordezkatuz honako hauek izan dira:

–   The Pulse: startup honek ongizate psikosozialeko soluzio digitalak garatzen ditu lantokietarako eta hezkuntza-esparrurako;

–   Vyne: langileak hautatzeko eta talentua bilatzeko teknologia eta Adimen Artifiziala erabiltzen espezializatua;

–   Fitwoody: jarduera-eskumuturretatik datuak ateratzen dituen fitness-aplikazioa, erabiltzailearen eguneroko mugimendua, entrenamenduak, loa eta beste adierazle metaboliko batzuk aztertzeko, eta

–   Kimaiwi: adimen artifizialean eta blockchain-en oinarritutako soluzioak garatzen ditu sektore turistikoarentzat.

Bizkaitik:

–   Baisma: jasangarritasuneko startupa, enpresei, erakundeei eta eskualdeei eredu zirkularrak, birsortzaileak eta deskarbonizatuak hartzen laguntzen espezializatua;

–   Nymiz: adimen artifizialak bultzatuta, datuak anonimizatzeko eta idazteko softwarean adituak; datuen pribatutasuna bermatzen du, edozein identifikazio-arrisku ezabatuz eta, aldi berean, erabilgarritasuna eta testuingurua zainduz;

–   Qcentroid: konputazio kuantikoa benetako enpresa-inguruneetan hartzeko, integratzeko eta eskalatzeko plataforma bat garatzen du

–   SamiraDTX: gaixotasun kronikoak dituzten pertsonen bizi-kalitatea hobetzen duten terapia digital berritzaileetarako irisgarritasuna errazten duen health tech startupa.  

Gipuzkoatik hurbildutakoen artean daude:

–   Safeloc: instalazioan aktiboak denbora errealean lokalizatzeko eta prozesu industrialak optimizatzeko segurtasun- eta produktibitate-soluzioetan espezializatua;

–   Nutrenaissance: ezagutza zientifikoa nutrizioa, jarduera fisikoa eta osasuna bezalako arloetan integratzen du, nutrizio- eta osasun-tresna pertsonalizatua sortzeko;

–   Acuratio: adimen artifizialeko plataforma bat diseinatu du neurona-sareak entrenatzeko, informazioaren segurtasunari eutsiz, eta

–   Scott & Irwin: markei eta enpresei produktu eta prozesu interaktiboak garatzen laguntzen dien berrikuntza digitalaren azterketa.