Berrikuntzako 200 aditu europarrek hartu dute parte EBN (European Business and Innovation Centre Network) Kongresuan
Ekintzailetzan eta industria-berrikuntzan erreferente den BIC Bizkaia Ezkerraldea izango da EBN (European Business and Innovation Centre Network) Nazioarteko Kongresuaren anfitrioia. Ekainaren 18, 19 eta 20an egingo da Barakaldoko instalazioetan. Ekitaldiak Europako berrikuntza-zentro, startup, kluster eta erakundeetako 200 ordezkari baino gehiago bildu ditu.
“Clean Energy Transition” (Energia Garbiaren Trantsizioa) izenburupean, kongresuak Euskadi, Bizkaia eta bereziki Ezkerraldea kokatu ditu industriaren eraldaketa jasangarrian Europako erreferente gisa. Energia-trantsizioa izango da programaren ardatz nagusia, eta mahai-inguruak, lurraldeko ekimen estrategikoetara bisitak, hitzaldi inspiratzaileak eta goi-mailako networking espazioak uztartuko ditu. Ekitaldian Eusko Jaurlaritzako Energia Trantsizioko sailburuorde Irantzu Allendek parte hartu du.
Bere hitzaldian, Allendek Mikel Jauregi sailburuak berriki aurkeztutako Industria Planari balioa eman dio. Plan horrek, «Industria gehiago, industria hobea eta emisio gutxiago» lelopean, 3.900 milioi euroko zuzkidura publikoa aurreikusten du lau urtean, 12.000 milioiko inbertsio pribatua bultzatuko duena, guztira 16.000 milioi euroko inbertsio publiko-pribatua mobilizatuz.
Industria Plan berriak funtsezko lau ideia ditu:
– Guztizko laguntza ekonomikoa % 50 handitzea, laguntza-programen guztizko kopurua erdira sinplifikatuz.
– Burokrazia % 30 murriztea, inbertsio berriak arintzeko.
– Herri Plana izango da, 20 proiektu eraldatzailerekin, 10 gobernuak gidatuta eta 10 industriak gidatuta.
– Plan praktikoa ere izango da: laguntza publikoak emaitzak eskatuko ditu.
Sailburuordeak azpimarratu duenez, “ildo estrategikoen eta erronken artean, deskarbonizazioa nabarmendu nahi nuke. Deskarbonizazioa lehiakortasunerako faktore gisa ulertzen dugu, gure gizartearen ongizaterako faktore gisa. Eusko Jaurlaritzak gure industriaren deskarbonizazio adimenduna sustatu nahi du, lehiakortasunerako palanka gisa.
Programak 400 milioi euroko aurrekontua du, eta legealdian zehar 1.200 milioi euroko finantzaketa publiko-pribatua mobilizatu nahi du. “Programa honekin, — gaineratu du Allendek– efizientzia energetikoa handitu nahi dugu, oinarritzat hartuta energiarik onena kontsumitzen ez dena dela; autokontsumoa sustatzea hornidura elektrikoaren segurtasuna bermatzeko, eta teknologia garbien aldeko apustua egiten dugu, faktore bereizle gisa”.
Urteurren bat, etorkizunari begira
Kongresua BIC Bizkaia Ezkerraldearen 25. urteurrenaren ospakizunaren barruan kokatzen da. Zentroak ehunka startup eta ETE berritzaile lagundu ditu hazkunde-prozesuan, bereziki sektore estrategikoetan: energia, jasangarritasuna, osasuna eta digitalizazioa.
“Kongresu hau aukera paregabea da gure ekintzailetza-ekosistemaren potentziala, Bizkaiaren gaitasun industriala eta Ezkerraldeak etorkizuneko erronka nagusietan joka dezakeen papera erakusteko”, azpimarratu dute antolatzaileek.
Ekitaldia honako erakundeen babesarekin antolatu da: Bizkaiko Foru Aldundia, Eusko Jaurlaritza, SPRI, Barakaldoko Udala, BBK, Petronor eta EBN, ekintzailetza eta berrikuntza sustatzen duten 150 zentro baino gehiago biltzen dituen sare europarra.
Energia, industria eta lankidetza europarra
Kongresuaren programak teknologia eta jasangarritasunaren arteko elkargunean dauden gai nagusiak jorratzen ditu. Nabarmendu behar dira energia-iraultza industrialari buruzko saioak, startup-en eta enpresa handien arteko lankidetza trantsizio digital eta berdea bultzatzeko, eta hidrogeno berdearen aplikazio industriala.
Gainera, ibilgailu elektriko eta hidrogenozkoen birziklatze-aukerak aztertzen dira, eta berrikuntza digitalaren eta adimen artifizialaren rola aztertzen da trantsizio energetiko jasangarrian.
Ekitaldian Bizkaiko ekosistemako startup-en pitch saioak, energia berriztagarrien eta itsas jasangarritasunaren inguruko panelak, eta Industria 5.0 eta Europako Itun Berdea bezalako estrategiekin bat datozen politika publikoen inguruko eztabaidak ere jasotzen dira.
Ekitaldiaren puntu nabarmenenak:
- Energia berdearen iraultzari eta industriaren etorkizun jasangarriari buruzko saio magistralak
- Ekonomia Zirkularra, Hidrogeno Berdea, Ekonomia Urdina eta Energia Berriztagarriak jorratzen dituzten panel eta tailerrak
- Europako Itun Berdearekin eta Industria 5.0 estrategiekin bat datozen eztabaida politikoak
- Networking espazioak: startup-ak, enpresak, erakunde publikoak eta komunitateko liderrak elkartzeko
- Pitch saioak: enpresen eta ekimen berritzaileen arteko lankidetzak balioan jartzeko
EU|BIC 2025 Bikaintasun Sariak: Trantsizio Berdea
Kongresuaren baitan, sarien bigarren edizioa ospatzen da. Ekintzailetza-sistemako programarik jasangarrienak eta soluzio berdeak bultzatzeko konpromiso handiena dutenak saritzen dira. Finalistek euren proposamenak aurkezten dituzte EU|BIC komunitatearen aurrean, eta trantsizio berdean eragin handiena duen proiektua hautatzen da.
Euskadi eta Bizkaia, berrikuntzaren mapa europarrean
Nazioarteko ekitaldi honek ez du soilik BIC Bizkaia Ezkerraldearen 25 urteko ibilbidea ospatzen; baizik eta Bizkaia eta Euskadi Europa mailako lurralde berritzaile, jasangarri eta konektatu gisa sendotzen ditu.
“Kongresu honek arrastoa utzi nahi du: bisitatzen gaituztenengan, bertatik ekiten dutenengan, eta ekonomia adimentsuago, garbiago eta lankidetzazkoago baten alde egiten duen lurralde baten kontakizunean”, nabarmendu dute antolatzaileek
