70 korporazio startupen soluzioen bila BIND Corporaten, Eusko Jaurlaritzaren ekimenean

BINDek, Eusko Jaurlaritzako Industria, Trantsizio Energetiko eta Jasangarritasun Sailak SPRIrekin lankidetzan garatutako berrikuntza irekiko ekimenak, startup teknologikoak bilatzen ditu industria adimendunaren, energia garbien eta jasangarritasunaren, osasunaren eta elikaduraren arloetan liderrak diren bezero korporatiboekin proiektuak garatzeko. 

BIND Corporateren 10. edizioan erreferentziazko enpresek parte hartzen dute, besteak beste: Mercedes-Benz, ITP Aero, Iberdrola, Orona, DanobatGroup, Tubos Reunidos, Eroski, Erreka, GHCranes, Arania, Sacyr eta Ulma. Parte hartu duten 70 enpresek 12 erabilera-kasu planteatu dituzte startupekin lan egiteko:

1. Prozesu industrialen digitalizazioa eta trazabilitatea
2. Automatizazioa eta robotika industria-inguruneetarako
3. Informazioaren kudeaketa eta segurtasuna eta araudia betetzea
4. Mantentze prediktiboa eta industria-kalitatearen kontrola
5. Hornidura-katearen optimizazio logistikoa eta kudeaketa adimenduna
6. Ingurumen-inpaktuaren neurketa, murrizketa eta konpentsazioa
7. Eraginkortasun energetikoa eta kontsumoaren kudeaketa adimenduna
8. Energia berriztagarria sortzea eta biltegiratzea
9. Ekonomia zirkularra eta hondakinen eta baliabideen kudeaketa jasangarria
10. Osasun digitala, diagnostiko aurreratua eta eraldaketa asistentziala
11. Mugikortasun konektatua, elektrifikatua eta floten optimizazioa
12. Salmenta-gunearen optimizazioa eta azken bezeroaren esperientzia

IA, IoT eta Clean Tech, euskal industria bultzatzeko

Deialdi berri honetan, industriako enpresa liderrek startup teknologiko berritzaileenak bilatzen dituzte, industria lehiakorragoa, eraginkorragoa eta jasangarriagoa sustatuko duten proiektuak garatzeko. Horretarako, hauek dira teknologia interesgarrietako batzuk: adimen artifiziala, IoT, robotika, murgiltze-teknologiak, Clean Tech eta Health Tech. 

Hamargarren edizio honetan, BINDek Corporate programaren arrakasta sendotuko du. Izan ere, dagoeneko 320 arrakasta-kasu baino gehiago bildu dira euskal startupen eta korporazioen arteko lankidetzaren emaitzaz. Horietako bat Lowerton startup bizkaitarrarena da, 9. edizioan Ramondin, Talgo, Elecnor eta Enagásekin lankidetzan aritu zena, adimen artifizialean oinarritutako kudeaketa-plataformaren bidez berrikuntza industrialeko prozesuak bizkortzeko. “BIND izan da gure lehen bezeroak lortzeko biderik onena”, adierazi du Gorka Muñecasek, Lowertoneko CEOk eta sortzaileak.

BINDen beste foku bat industria jasangarriago bat lortzen laguntzea da, soluzio teknologiko berriak aplikatuta. Arlo horretan, Powerfultree startup arabarrak, Iberdrolarekin batera, enpresa eta erakundeen karbono-aztarna murrizteko sistema agrovoltaikoa garatu zuen. “Soluzio horrek aukera ematen du teknologia berriztagarrien ekoizpena sustatzeko, nekazaritzako elikagaien ekoizpenarekin batera, lurragatik lehiatu gabe”, azaldu du Imanol Olaskoagak, Powerfultreeko CEOk. 

BINDen 10. edizioan parte hartzeko azken aukera

BIND programak merkatuan edo bere azken garapen-fasean eskuragarri dagoen soluzio teknologiko bat duten startupak bilatzen ditu, Euskal Autonomia Erkidegoan liderrak diren enpresen proiektuetan ezartzeko. Hautatutako startupek onura hauek lortuko dituzte:

• Euskal Industriaren berrikuntza-ekosistemarekiko eta teknologia berriekiko konexioa: Egoitza Euskadin duten erreferentziazko konpainiak izango dituzte eskura, eta Networking jardueretan parte hartuko dute, industria lehiakorragoa eta jasangarriagoa lortzeko.
• Lehen bezeroak lortzea: Beren teknologia berritzailea inplementatu ahal izango dute sektoreko erreferentziazko enpresa liderren eskutik, merkatuan duten bideragarritasuna babesteko. 
• Adituen aholkularitza: 40 mentore baino gehiago, enpresen azelerazioan, teknologia berrien merkatu-estrategietan, berrikuntza irekian eta ekintzailetzan espezializatuak.
• Inbertitzaileentzako sarbidea: BINDek Venture Club bat du, inbertitzaileen klub bat, azeleratzailearen espezializazioarekin lerrokatua, eta laguntza-zerbitzuak indartzea eta startup parte-hartzaileen eta inbertsio-erakunde espezializatuen arteko harremana sustatzea du helburu. 

BINDeko kide izan nahi duten startupek datorren edizioan parte hartzeko hautagaitzak aurkeztu ahal izango dituzte, irailaren 5eko eguerdira arte, bind.spri.eus programaren webgunearen bidez. 

BINDen hamargarren edizioko 12 erronka teknologikoak xehetasunez ezagutzeko, egin klik hemen.

BINDi buruz

BIND industria adimendunaren berrikuntza irekiko plataforma publiko-pribatua da, Industria, Trantsizio Energetiko eta Jasangarritasun Sailak SPRI Taldearen bidez sortua. BINDek hiru ekimen ditu: BIND Corporate, BIND SME eta BIND GovTech, Euskadiko enpresak, ETEak eta sozietate publikoak mundu osoko startup disruptiboekin konektatzeko, haiekin berrikuntza-proiektuak garatzea helburu. 2016an jarduera hasi zuenetik, 250 startup eta scaleup baino gehiago bizkortu dira, eta 350 proiektu baino gehiago garatu dira, 9,6 milioi euroko fakturazioa gaindituta. Era berean, plataforma erreferente gisa kokatu da sektorean, industriaren digitalizazioari eta lurraldeko enpresa-sareari emandako laguntzagatik.