Mecanizados Vitoria, Europako hegazkintza berriaren zerbitzura dagoen ingeniaritza
Aeronautikako tresneriaren hornitzaile estrategikoa bihurtu da Gasteizko Mecanizados Vitoria sektore horretako nazioarteko fabrikatzaile nagusietako batzuentzat. Ingeniaritza aurreratuaren, industriako dibertsifikazioaren eta jasangarritasunaren aldeko apustu argiarekin, enpresak hegazkintzarekin lotutako ibilbide luzeko Europako proiektuetan hartu du parte eta aurrerapausoak eman ditu ekoizpen-gaitasuna handitzeko. Made in Basque Countryn bere sortzailearekin, Ismael Carlos de Bergararekin, hitz egin dugu hazkundeari, berrikuntzari eta Euskadiko industriak etorkizuneko erronketan duen rolari buruz.
Mecanizados Vitoria erreferentziazko hornitzaile bihurtu da aeronautikako fabrikatzaile handientzat. Nolakoa izan da azken urteko balantzea?
2025a urte ona izan da. Hazkunde jasangarria izan dugu, eta ez gara modu desordenatuan hazi. Proiektu garrantzitsuetan jardun dugu Airbusekin eta, aldi berean, gure bezero historikoentzako proiektuak garatzen jarraitu dugu. Ondo egiten duguna finkatzea izan da gakoa.
Aeronautika zuen fakturazioaren zati oso garrantzitsua da. Dibertsifikatzea planteatu duzue?
Bai, lehentasuna da. Egun, aeronautikak gure jardueraren % 75 eta % 80 bitartean hartzen du, baina dibertsifikatzeko ari gara lanean. Adibidez, 2025ean, tren-sektorea fakturazioaren % 5 inguru izatera iritsi da dagoeneko, eta automobilgintzarako makina bereziak ere garatzen ditugu, Mercedes-Benzentzat. Dibertsifikatzea garrantzitsua da sektore bakar baten mende ez egoteko, nahiz eta aeronautika oso indartsu egon une honetan, defentsaren arloan batik bat.
Aeronautikako tresneria da zuen jardueraren kontzeptu gakoetako bat. Nola azalduko zenuke zer den modu erraz batean?
Tresneria hegazkineko pieza bat fabrikatzeko edo muntatzeko makina berezia da. Adibidez, hego batek pieza asko ditu. Bezeroak hegoaren diseinua ematen digu eta pieza horiek bere fabrikan muntatu ahal izateko tresneria garatzeko eskatzen digu. Guk soluzioak proposatzen dizkiogu, bezeroarekin adosten ditugu —Airbus, Aernnova edo Aciturri— eta, baliozkotu ondoren, tresneria osoa garatzen dugu. Neurrira egindako ingeniaritza da.
Ibilbide luzeko Europako proiektuetan ere hartzen duzue parte…
Bai, Europako proiektu oso anbiziotsu batean gaude, hegazkin jasangarriagoak garatzeko, fuselaje termoplastikoarekin, soldadura bereziekin eta hidrogenoan oinarritutako propultsioarekin. Partzuergo oso handia da, Airbus edo Aernnovaren moduko enpresekin, Leonardorekin eta Europako beste bazkide batzuekin. Guk goiko fuselajean egiten dugu lan. Epe oso luzeko proiektua da: orain garatzen ari garena 2035 inguruan jarriko da martxan.
Beste sektore batzuetan ez da oso ohikoa denbora-muga hori…
Hala da. Automobilgintzaren mundutik gatoz gu eta bertan garapenak berehalakoak dira. Aeronautikan, berriz, baliozkotze-prozesuak oso zorrotzak dira. Gaur egun, bi material termoplastiko soilik daude onartuta hegan egiteko. Segurtasuna izugarria da: akatsa ez da aukeren artean sartzen. Horregatik dira epeak hain luzeak, baina beharrezkoak dira.
Hazkunde teknologikoaz gain, Gasteizko ekoizpen-gaitasuna handitzen ari zarete. Zer esan diezagukezu proiektu horri buruz?
Hala da, bai. Orain arte hiru pabilioitan egin dugu lan eta espazio gehiago behar genuen Aernnovarekin dugun proiektu garrantzitsu baterako. Inguruko industria-instalazio bat erosteko aukera sortu zitzaigun eta martxan jartzen ari gara orain. Gaur gaurkoz, bertako gaitasun operatiboaren % 50 dago martxan eta, horri esker, tresneria handiak munta ditzakegu, besteak beste, hegazkinaren eskailera-mailak eta palak. Espazio asko behar da horretarako.
Nola egiten diozue aurre industria-sektorean dagoen ustezko talentu-faltari?
Lankidetzan aritzen gara Gasteizko Lanbide Heziketako zentroekin, batez ere Miguel Altuna LHIIrekin eta inguruko beste zentro batzuekin. Ondo formatutako pertsonak lortzen ditugu bertatik. Hala ere, garrantzitsua da familiei helaraztea industria aukera profesional sendoa, egonkorra eta etorkizunekoa dela. Industriako enpresak ez dira etsaiak; kontrara, enplegua, aberastasuna eta ongizatea sortzen dute. Industriako ETEak gehiengoa gara Euskadiko ekonomia-ereduan eta funtsezko rola dugu. Euskadin dugun bizitza maila enpresa-ehundura indartsuari, askotarikoari eta ETE industrialez betetakoari esker sostengatzen da. Gurearen moduko enpresak ekosistema horren ezinbesteko parte dira.
