Ismael Igartua (Galbaian): “Patenteak erabili behar ditugu gure balio-proposamena babesteko”
Gaur egun, berrikuntza teknologikoaren emaitzak babestea ezinbesteko baldintza da lehiatzeko. Helburu horrekin ari da lanean Galbaian Intellectual Property, jabetza industrialean eta intelektualean espezializatutako enpresa, zerbitzu integrala eskaintzen diena enpresa industrialei, zentro teknologikoei eta unibertsitateei.
Ismael Igartua zuzendariak azaldu duenez, “patenteen eta marken erregistratzaile hutsak baino gehiago gara”. Patenteei, erabilgarritasun-ereduei, diseinu industrialei, markei, enpresa-sekretuei eta egile-eskubideei buruzko aholkularitza ematen du Galbainek, lehia-abantaila sortzera bideratutako ikuspegi estrategiko batekin. “Erakundeei lagundu nahi diegu hirugarrenen eskubideak urratzeko arriskuak minimizatzen eta haien balio-proposamena babesten”, azpimarratu du.
Testuinguru honetan, patenteek funtsezko zeregina dute enpresa-berrikuntzaren estrategiaren barruan. “Funtsezkoa da berrikuntza teknologikoaren emaitzak babesteko gai izatea, hirugarrenen patenteak urratu gabe berrikuntzak eginez eta garapen horien inguruan esklusibotasun-eremuak lortuz”, adierazi du Igartuak.
Berritzen hasi diren enpresa txiki eta ertain industrialei begira, jabetza industriala hasieratik integratzearen garrantzia azpimarratu du Galbaianeko zuzendariak: “Funtsezkoa da taldearen barruan jabetza industrialaren kudeaketaren ardura esleitzea, eta estrategia bat zehaztea zuzendaritzatik bertatik”.
Horrez gain, patenteak proiektuaren funtsezko hiru unetan kontuan hartzea gomendatzen du: hasieran, patenteak bilatuz teknikaren egoera ezagutzeko; garapenean zehar, eragiketa-askatasunaren analisi batekin; eta merkaturatu aurretik, babestea merezi duten alderdi teknikoak ebaluatuz. “Zorrotz jokatu behar dugu gure garapenen konfidentzialtasunarekin, dagokion patente-eskaera aurkeztu arte; izan ere, munduko nobedadea da patentagarritasun-baldintzetako lehena”, amaitu du.
Euskal enpresen artean berrikuntza bultzatzeko, enpresa txiki eta ertainetatik konpainia handietaraino, SPRI Taldeak Hazinnova, BDHI Konexio edo Innobideak bezalako berrikuntzarako programak eta laguntzak ditu.
